Yokuthoma YamaKhosi

10 Nje-ke indlovukazi yeTjheba yezwa umbiko ngoSolomoni omalungana negama lakaJehova,+ yeke yeza izomlinga ngemibuzo erarejako.*+ 2 Yafika eJerusalema nesiqhema esikhulu seensebenzi zayo,+ namakamela athwele amafutha webhalisamu,+ igolide elinengi khulu namatje aligugu. Yangena ngakuSolomoni yakhuluma naye ngakho koke ebekusehliziywenayo. 3 USolomoni waphendula yoke imibuzwayo. Ayikho into ikosi eyabhalelwa kuyihlathululela yona.

4 Kwathi indlovukazi yeTjheba nayibona koke ukuhlakanipha kwakaSolomoni,+ indlu ayakhileko,+ 5 ukudla okusetafulenakhe,+ indlela iinceku zakhe ezihlala ngayo, indlela iinsebenzi zakhe eziletha ukudla ezisebenza ngayo nendlela ezivunule ngayo, abaphathikapho bakhe nemihlatjelwakhe yokutjhiswa ebekayinikela qobe endlini kaJehova, yabamba ongenzasi. 6 Yeke yathi ekosini: “Bewuliqiniso umbiko engawuzwa ngisenarhenami malungana nepumelelo* nokuhlakanipha kwakho. 7 Kodwana akhenge ngiyikholwe imibiko leyo bekwaba kulapho ngizibonela ngewami. Qala! Bengingakatjelwa ngitjho nesiquntu. Ukudlule kude ukuhlakanipha nepumelelo ebengizwe ngakho. 8 Bayathaba abantu bakho begodu ziyathaba iinsebenzi zakho ezijama phambi kwakho qobe, zilalele ukuhlakanipha kwakho!+ 9 Akadunyiswe uJehova uZimakho,+ otjengise ukuthi uyathaba ngawe ngokukubeka esihlalweni sobukhosi sakwa-Israyeli. Ngebanga lethando elingapheliko uJehova athanda ngalo u-Israyeli, ukubeke ukuthi ube yikosi bona ulethe ubulungiswa nokulunga.”

10 Ngemva kwalokho, yanikela ikosi amatalende* ali-120 wegolide, amafutha webhalisamu+ amanengi khulu namatje aligugu.+ Azange kwenzeke godu bona kulethwe amafutha webhalisamu amanengi ukudlula lawa indlovukazi yeTjheba eyawapha iKosi uSolomoni.

11 Imikhumbi kaRhiramu ebeyithwala igolide ivela e-Ofira,+ beyiletha neengodo ze-almugi+ ezinengi ngokurarako namatje aligugu+ kusukela e-Ofira. 12 Ikosi yenza iinsekelo zendlu kaJehova nezendlu yekosi* ngeengodo zom-almugi, yenza namaharibha neenliliso zesinara zabavumi.+ Iingodo zom-almugi ezinjalo azange zisalethwa namkha zibonwe bekube kunamhlanjesi.

13 Godu iKosi uSolomoni yanikela indlovukazi yeTjheba nanyana yini ebeyiyifisa namkha iyibawa, ngaphezu kwananyana yini ayinikela yona ngesandla sakhe esivulekileko. Ngemva kwalokho yakhamba yabuyela enarhenayo ikunye neensebenzi zayo.+

14 Ubudisi begolide ebelilethwa kuSolomoni qobe mnyaka bebumatalende wegolide ama-666,+ 15 ngaphandle kwalelo ebelilethwa bathengisi neliyinzuzo ebeyifunyanwa barhwebi nelivela kiwo woke amakhosi wama-Arabhu nakubabusi benarha.

16 IKosi uSolomoni yenza iimviko ezikulu ezima-200 zegolide elivangwe nenye isimbi+ (esivikweni ngasinye bekunamatjhekeli* ama-600 wegolide)+ 17 neemviko ezincani* ezima-300 zegolide elivangwe nenye isimbi (esivikweni ngasinye bekunabomina* abathathu begolide). Ikosi yazibeka ngeNdlini yeHlathi leLibhanoni.+

18 Ikosi yenza nesihlalo sobukhosi esikhulu ngezinyo lendlovu+ yasinameka ngegolide elitsengiweko.+ 19 Bekuneentepisi ezisithandathu eziya esihlalweni sobukhosi begodu isihlalo sobukhoseso besinetende eyindulungu ngemva kwaso, ngemaqadi kwesihlalo bekunendawo yokubeka imikhono begodu bekunamabhubezi+ amabili ajame ngemaqadi kwalapho kubekwa khona imikhono. 20 Bekunamabhubezi ali-12 ajame eentepisini ezisithandathu, kujame ibhubezi linye ngapha nangapha kwesitepisi ngasinye. Awukho omunye umbuso owakhe wenza into enjalo.

21 Zoke izinto iKosi uSolomoni ebeyisela ngazo bezenziwe ngegolide begodu zoke izitja zeNdlu yeHlathi leLibhanoni+ bekungezegolide elicwengileko. Bekunganalitho elenziwe ngesiliva ngombana isiliva beliqalwa njengento engatjho litho ngeenkhathi zakaSolomoni.+ 22 Phela ikosi beyinemikhumbi eminengi yeTaratjhitjhi+ elwandle kuhlanganise nemikhumbi eminengi kaRhiramu. Kanye ngemva kweminyaka emithathu, imikhumbi yeTaratjhitjhi beyiza ithwele igolide nesiliva, amazinyo wendlovu,+ iimfene namaphigogo.

23 Nje-ke iKosi uSolomoni beyinjinge+ begodu ihlakaniphe+ ukudlula woke amanye amakhosi wephasi. 24 Boke abantu ephasini bebafuna ukubona uSolomoni bona bezwe ukuhlakanipha kwakhe, lokho uZimu akufake ehliziywenakhe.+ 25 Ngamunye bekaletha isipho, izinto zesiliva, izinto zegolide, izambatho, izambatho zepi, amafutha webhalisamu, iinjomani neemeyila begodu lokhu kwaraga qobe mnyaka.

26 USolomoni wasolo abuthelela iinkarana neenjomani; bekaneenkarana ezi-1 400 neenjomani* ezizii-12 000,+ wazibeka emadorobheni weenkarana eduze nekosi eJerusalema.+

27 Ikosi yenza isiliva eJerusalema laba linengi njengamatje, yenza iingodo zomsedari zaba zinengi njengemithi yamafeyi wommango* eTjhefela.+

28 Iinjomani zakaSolomoni bezithengwa eGibhide, isihlopha sabathengisi bekosi besithenga imihlambi yeenjomani* ngentengo engatjhugulukiko.+ 29 Ikarana ngayinye ethengwe eGibhide beyibiza iimpaparwana zesiliva ezima-600 bese injomani ibize iimpaparwana ezili-150; kuthi isihlopha sabathengisi sizithengisele woke amakhosi wamaRhiti+ neweSiriya.