Yesibili YamaKhosi
8 U-Elitjha wathi kunina lomsana amvusa kwabafileko:+ “Sikima ukhambe nomndenakho, uyokuhlala kwenye inarha nanyana kukuphi la ungakghona khona ngombana uJehova ubikezele bona kuzokuba nendlala+ enarheni begodu izokuthatha iminyaka elikhomba.” 2 Nje-ke unina lomsana wasikima wenza njengombana umuntu kaZimu weqiniso atjhwile. Wakhamba nomndenakhe bayokuhlala enarheni yamaFilista+ iminyaka elikhomba.
3 Ekupheleni kweminyaka elikhomba, umfazi lo wabuya asuka enarheni yamaFilista, wayokulila ekosini malungana nendlwakhe nesimakhe. 4 Nje-ke ikosi beyikhuluma noGerhazi umsizi womuntu kaZimu weqiniso, ithi: “Ngibawa ungicocele zoke izinto ezihle ezenziwe ngu-Elitjha.”+ 5 Kuthe asacocela ikosi ngendlela u-Elitjha avusa ngayo umuntu,+ kwafika ekosini unina lomsana amvusako, walila ekosini malungana nendlwakhe nesimakhe.+ Khonokho uGerhazi wathi: “Nguye umfazi lo kosami begodu le yindodanakhe eyavuswa ngu-Elitjha.” 6 Ikosi ithe nayizwa lokho, yabuza umfazi lo, yena wayicocela indaba yoke. Nje-ke ikosi yabiza isikhulu sesigodlo yathi kiso: “Mbuyiseleni koke okungokwakhe nimnikele nemali ebekazoyizuza ngeentjalo zakhe kusukela ngesikhathi akhamba ngaso bekube nje.”
7 U-Elitjha wafika eDamaseku+ lokha uBhen-Hadadi+ ikosi yeSiriya agula. Nje-ke wabikelwa lokhu: “Umuntu kaZimu weqiniso+ ufikile.” 8 Ikosi yathi kuRhazayeli:+ “Thatha isipho ukhambe uyokuhlangabeza umuntu kaZimu weqiniso.+ Ubuze uJehova ngaye uthi, ‘Ngizokuphola na ekugulenokhu?’” 9 URhazayeli wakhamba wayomhlangabeza wathatha isipho nayo yoke imihlobo yezinto ezihle zeDamaseku, zalayitjhwa emakameleni ama-40. Wafika wajama phambi kwakhe, wathi: “Indodanakho uBhen-Hadadi ikosi yeSiriya, ingithume kuwe, iyabuza ithi, ‘Ngizokuphola na ekugulenokhu?’” 10 U-Elitjha wathi kuye: “Khamba uyomtjela uthi, ‘Kwamambala uzokuphola,’ kodwana uJehova ungitjengisile ukuthi ngokuqinisileko yena uzokufa.”+ 11 U-Elitjha wasolo amrhudulele amehlo bewaphathwa ziinhloni. Ngemva kwalokho, umuntu kaZimu weqiniso walila. 12 URhazayeli wambuza: “Ikosami ililelani?” Waphendula wathi: “Ngombana ngiyazi bona uzobalimaza kangangani abantu bakwa-Israyeli.+ Iindawo zabo ezivikelekileko uzozitjhisa ngomlilo, amadoda anamandla uzowabulala ngesabula, abantwababo uzobahlahlela nabafazi babo abazithweleko uzobarathula izisu.”+ 13 URhazayeli wathi: “Isisebenzi sakho esiyinja nje kwaphela, singayenza njani into enjalo?” Kodwana u-Elitjha wathi: “UJehova ungitjengisile bona uzokuba yikosi eSiriya.”+
14 Ngemva kwalokho, wasuka ku-Elitjha wabuyela ekosinakhe, eyathi kuye: “Utheni u-Elitjha?” Wathi: “Uthe ngokuqinisekileko uzokuphola.”+ 15 Ngelanga elilandelako, uRhazayeli wathatha ingubo wayifaka ngemanzini, wavala ubuso bekosi beyahlongakala.+ URhazayeli waba yikosi esikhundleni sayo.+
16 Ngomnyaka wesihlanu wokubusa kwakaJehoramu+ indodana ka-Arhabi ikosi yakwa-Israyeli, ngesikhathi uJehotjhafathi ayikosi yakwaJuda, uJehoramu+ indodana kaJehotjhafathi ikosi yakwaJuda waba yikosi. 17 Bekaneminyaka ema-32 nakaba yikosi bewabusa iminyaka ebunane eJerusalema. 18 Wakhamba emtlhaleni wamakhosi wakwa-Israyeli,+ njengombana kwenza bendlu ka-Arhabi+ ngombana bekatjhade nendodakazi+ ka-Arhabi. Wasolo enza okumbi phambi kwakaJehova.+ 19 Kodwana ngebanga lencekwakhe uDavida, uJehova akhenge afune ukutjhabalalisa uJuda,+ ngombana wathembisa uDavida ukuthi uzokuhlala anikela yena+ namadodanakhe isibani.
20 Emihleni kaJehoramu, u-Edomu wahlubuka kuJuda+ begodu wazibekela ikosi.+ 21 Nje-ke uJehoramu wayamela eTsayire neenkarana zakhe zoke zepi, wavuka ebusuku wasahlela ama-Edomu ebewaragelele yena nabalawuli beenkarana zepi, wawahlula. 22 Kodwana u-Edomu usolo ahlubuke kuJuda bekube kunamhlanjesi. ILibhina+ nayo yahlubuka ngesikhatheso.
23 Woke omunye umlando kaJehoramu, koke akwenzileko, akukatlolwa na encwadini yomlando weenkhathi zamakhosi wakwaJuda? 24 Nje-ke uJehoramu walaliswa nabokhokho bakhe, wabulungwa nabokhokho bakhe eDorobheni lakaDavida.+ Indodanakhe u-Arhaziya+ waba yikosi esikhundleni sakhe.
25 Ngomnyaka we-12 wokubusa kwakaJehoramu indodana ka-Arhabi ikosi yakwa-Israyeli, u-Arhaziya indodana kaJehoramu iKosi yakwaJuda waba yikosi.+ 26 U-Arhaziya bekaneminyaka ema-22 nakaba yikosi, wabusa umnyaka munye eJerusalema. Igama lakanina bekungu-Ataliya+ umzukulwana* ka-Omri ikosi+ yakwa-Israyeli. 27 Wakhamba emtlhaleni wabantu bendlu ka-Arhabi,+ waragela phambili nokwenza okumbi phambi kwakaJehova njengabantu bendlu ka-Arhabi ngombana bekahlobene ngomtjhado nendlu ka-Arhabi.+ 28 Nje-ke wakhamba noJehoramu indodana ka-Arhabi wayokulwa noRhazayeli ikosi yeSiriya eRamothi-Giliyadi,+ kodwana amaSiriya alimaza uJehoramu.+ 29 IKosi uJehoramu yabuyela eJizriyela+ bona iyokupholisa amanceba ewabangelwe maSiriya eRama lokha nayilwa noRhazayeli ikosi yeSiriya.+ U-Arhaziya* indodana kaJehoramu ikosi yakwaJuda wehlela eJizriyela bona ayokuhlola uJehoramu indodana ka-Arhabi ngombana bekalimele.