USamyela Wesibili

4 Kwathi indodana kaSawula u-Itjhi-Bhotjhethi+ nayizwa bona u-Abineri uhlongakele eRhebroni,+ yaphelelwa mamandla begodu u-Israyeli woke wasaba. 2 Bekunamadoda amabili ebekaphethe amabutho wabadlelezeli wendodana kaSawula: igama lenye bekunguBhana begodu enye kunguRekabi. Bewamadodana kaRimoni umBherothi, wekoro yakwaBhenjamini. (Ngombana uBherothi+ naye bekabalwa njengengcenye kaBhenjamini. 3 AmaBherothi abalekela eGitayimu+ begodu aba babantu abavela kwenye inarha lapho bekube kunamhlanjesi.)

4 Nje-ke indodana kaSawula uJonathani+ beyinomntwana womsana orholephele iinyawo.+ Umtwana lo bekaneminyaka emihlanu nakufika umbiko omalungana noSawula noJonathani ovela eJizriyela,+ yeke imbelesakhe yamguga yabaleka, kodwana njengombana ibaleka ithukiwe, umntwana wawa bewarholophala. Igama lakhe bekunguMefi-Bhotjheti.+

5 Amadodana kaRimoni umBherothi, okunguRekabi noBhana, aya endlini ka-Itjhi-Bhotjhethi emini nakutjhisa ilanga, lokha u-Itjhi-Bhotjhethi nakasaphumulileko. 6 Angena ngendlini enza ngasuthi ayokuthatha ikoroyi, amhlaba emathunjini; ngemva kwalokho uRekabi nomfowabo uBhana+ babaleka. 7 Lokha nabangena ngendlini, bekalele embhedenakhe ngekumbenakhe, yeke bamhlaba bebambulala, ngemva kwalokho baqunta ihlokwakhe. Bathatha ihlokwakhe bakhamba ubusuku boke endleleni eya e-Araba. 8 Baletha ihloko ka-Itjhi-Bhotjhethi+ kuDavida eRhebroni begodu bathi ekosini: “Nasi ihloko ka-Itjhi-Bhotjhethi indodana kaSawula inaba lakho+ ebelifuna ukuphila kwakho.+ Namhlanjesi uJehova ubuyiselele ikosami kuSawula neenzukulwaneni zakhe.”

9 Nokho uDavida waphendula uRekabi nomfowabo uBhana amadodana kaRimoni umBherothi, wathi kibo: “Ngifunga ngoJehova uZimu ophilako, ongisindise kiwo woke amatshwenyeko,+ 10 kwathi umuntu nakangibikela ukuthi, ‘USawula uhlongakele,’+ begodu acabanga bona bekangilethela iindaba ezimnandi, ngambamba ngambulala+ eTsikhilagi. Lowo bekumtlomelo wesithunywa awufumana kimi! 11 Kangangani-ke amadoda akhohlakeleko nakabulele indoda elungileko ngendlinayo embhedenayo! Kghani akukafuzi ngifune iingazi zayo ezandleni zenu+ bese nginisuse ephasini?” 12 Yeke uDavida walayela amasokana bona ababulale.+ Aqunta izandla neenyawo zabo+ begodu abaphanyeka hlanu kwesiziba eRhebroni. Kodwana athatha ihloko ka-Itjhi-Bhotjhethi ayibulunga ethuneni laka-Abineri eRhebroni.