USamyela Wesibili
9 UDavida wathi: “Usesekhona na oseleko endlini kaSawula engingaba nomusa kuye* ngebanga lakaJonathani?”+ 2 Bekunesisebenzi sendlu kaSawula ekuthiwa nguTsiba.+ Yeke basibiza saya kuDavida, ikosi yasibuza yathi: “UnguTsiba na?” Waphendula wathi: “Ngisisebenzi sakho.” 3 Ikosi yaraga yathi: “Ukhona na oseleko endlini kaSawula engingaba nomusa kaZimu* kuye?” UTsiba waphendula ikosi wathi: “Kunendodana kaJonathani yinye; irholophele iinyawo zombili.”+ 4 Ikosi yambuza yathi: “Iphi?” UTsiba waphendula ikosi wathi: “Isendlini kaMakiri+ indodana ka-Amiyeli eLo-Debhara.”
5 Khonokho iKosi uDavida yathumela bona iyokuthathwa endlini kaMakiri indodana ka-Amiyeli eLo-Debhara. 6 Kwathi uMefi-Bhotjheti indodana kaJonathani indodana kaSawula nakangena ngakuDavida, wahloma ihloko phasi bewaguqa. Yeke uDavida wathi: “Mefi-Bhotjheti!” Yena waphendula wathi: “Nasi isisebenzi sakho.” 7 UDavida wathi kuye: “Ungasabi ngombana ngokuqinisekileko ngizokuba nomusa kuwe*+ ngebanga lakayihlo uJonathani, ngizokubuyisela yoke inarha egade kungeyakabamkhulwakho uSawula begodu uzokuhlala udla etafulenami.”+
8 Nakezwa lokho waguqa wathi: “Siyini isisebenzi sakho bona ungabe utjheje inja+ efileko njengami?” 9 Nje-ke ikosi yathumela bona kuyokubizwa uTsiba, isisebenzi sakaSawula, yathi kuye: “Koke ebekungekwakaSawula nendlwakhe yoke ngikunikela umzukulwana wekosakho.+ 10 Uzomlimela inarha, wena namadodanakho neensebenzi zakho begodu uzokubuthelela isivuno sayo bona wondle umndeni womzukulwana wekosakho. Kodwana uMefi-Bhotjheti, umzukulwana wekosakho, uzokuhlala adla etafulenami.”+
UTsiba bekanamadodana ali-15 neensebenzi ezima-20.+ 11 UTsiba wathi ekosini: “Isisebenzi sakho sizokwenza koke ikosami eyala isisebenzi sayo bona sikwenze.” Yeke uMefi-Bhotjheti wadla etafuleni lakaDavida* njengomunye wamadodana wekosi. 12 Godu uMefi-Bhotjheti bekanendodana eseseyincani okuthiwa nguMika;+ boke ebebahlala endlini kaTsiba baba ziinsebenzi zakaMefi-Bhotjheti. 13 UMefi-Bhotjheti wahlala eJerusalema ngombana bekadla etafuleni lekosi qobe;+ bekarholophele iinyawo zombili.+