Isaya
7 Nje-ke emihleni ka-Arhazi,+ indodana kaJothamu indodana ka-Uziya, ikosi yakwaJuda, iKosi yeSiriya uRetsini noPhekharhi,+ indodana kaRemaliya, ikosi yakwa-Israyeli, bakhuphuka bona bayokulwa neJerusalema kodwana akhenge akghone* ukuyithumba.+ 2 Kwafika umbiko endlini kaDavida wathi: “ISiriya ibambisene nebakwa-Efrayimu.”
Ihliziyo ka-Arhazi neenhliziyo zabantu bakhe zathoma ukuhlengezela, njengemithi yehlathi nayisikinywa mumoya.
3 UJehova wathi ku-Isaya: “Ngibawa uphume uyokuhlangana no-Arhazi, wena nendodanakho uTjheyari-Yatjhubi,*+ emaphethelweni womsele wesiziba esiphezulu+ esisendleleni ekulu yesimu yomhlanzi wezambatho. 4 Kufuze uthi kuye, ‘Zitjheje bese wehlise umoya. Ungasabi begodu ungangenwa mamanzi emadolweni ngebanga leendindi ezimbilezi zeengodo ezithunyako, nangebanga lelaka elivuthako lakaRetsini ikosi yeSiriya nendodana kaRemaliya.+ 5 Ngombana iSiriya nebakwa-Efrayimu nendodana kaRemaliya baluka amano wokukulimaza, bathi: 6 “Asikhuphukeni siyokusahlela inarha yakwaJuda, siyigirize* siyithumbe* ibe ngeyethu, sibeke indodana kaThabeyeli ibe yikosayo.”+
7 “‘Nakhu iKosi ePhakemeko uJehova ekutjhoko:
“Lokhu angekhe kuphumelele,
Angekhe kwenzeke.
8 Ngombana ihloko yeSiriya yiDamaseku,
Bese ihloko yeDamaseku yiRetsini.
Hlangana neminyaka ema-65 kwaphela
Bakwa-Efrayimu bazabe baphahlazeke ngokupheleleko begodu angeze basaba sitjhaba.+
Ngaphandle kokuthi nibe nokukholwa okuqinileko,
Angeze nidzinyeleliswe.”’”
10 UJehova waragela phambili akhuluma no-Arhazi wathi: 11 “Bawa itshwayo kuJehova uZimakho;+ lingazika njengeThuna* namkha liphakame njengomkayi.” 12 Kodwana u-Arhazi wathi: “Angekhe ngilibawe namkha ngilinge uJehova.”
13 U-Isaya wathi: “Ngibawa nilalele nina bantu bendlu kaDavida. Akukaneli na bona nilinge ukubekezela kwabantu? Kufuze nilinge nokubekezela kwakaZimu?+ 14 Ngalokho, uJehova ngokwakhe uzokwenzela itshwayo: Qala! Intombi izokuba sidisi, izokubeletha indodana,+ izoyibiza ngokuthi ngu-Imanuweli.*+ 15 Izokudla ibhodoro neliju nasele ikwazi ukuhlukanisa okuhle nokumbi. 16 Ngombana ngaphambi kobana umsana akwazi ukuhlukanisa okuhle nokumbi, inarha yamakhosi amabili owasabako izabe ilahlwe ngokupheleleko.+ 17 UJehova uzokuvumela wena, abantu bakho nendlu kayihlo bona niphile esikhathini esingakhenge khesibe khona kusukela ngelanga u-Efrayimu aphambuka ngalo kuJuda+ ngombana uZimu uzokuletha ikosi ye-Asiriya ukuthi inisahlele.+
18 “Ngelangelo uJehova uzokubetha umlozi bese abize iimpukani emilanjeni ekude yeNayili yeGibhide neenyosi enarheni ye-Asiriya, 19 Zoke zizokuza begodu zihlale emirhobeni yamawa, emarharheni wamatje, kiyo yoke imithi yameva nakizo zoke iindawo ezinamanzi.
20 “Ngelangelo uzokusebenzisa umuntu oqatjhiweko orhuna iinhluthu ovela esifundeni soMlambo,* ikosi ye-Asiriya,+ uJehova uzokurhuna ihloko noboya obusemilenzeni neendevu zakho.
21 “Ngelangelo umuntu uzokulisa ithole lomhlambi nezimvu ezimbili bona ziphile. 22 Ngebanga lebisi elinengi, uzokudla ibhodoro, abantu abaseleko enarheni leyo bazokudla ibhodoro neliju.
23 “Ngelangelo nanyana kukuphi lapho bekuneendiribe eziyikulungwana ezibiza iimpaparwana zesiliva eziyikulungwana, kuzokuba nemithi yameva nekhula. 24 Abantu bazokuya lapho baphethe umsubela nomcibitjholo, ngombana yoke inarha izokuba mimithi yameva nekhula. 25 Zoke iintaba ebezirhulwa ngelembe, angeze utjhidele kizo ngebanga lokusaba imithi yameva nekhula; zizokuba yindawo iinkunzi ezidla kiyo nalapho izimvu zizikhambela khona umathanda.”