Yokuthoma YamaKhosi
1 Nje-ke iKosi uDavida besele iluphele,+ sekukade idla amabele, ngitjho nanyana bebayimbesa ngeengubo beyingafuthumali. 2 Yeke iinsebenzi zayo zathi kiyo: “Ikosethu ayifunelwe itlawu, elizokuba mtlhogomeli wekosi. Lizokulala esifubeni sakho bona ikosethu ifuthumale.” 3 Bakhamba inarha yoke yakwa-Israyeli bafunana nomntazana omuhle, bafumana u-Abitjhagi+ weTjhunemi+ bamngenisa ngekosini. 4 Umntazana lo bekasiphalaphala sakosiphalaphala, waba mtlhogomeli wekosi kodwana ikosi azange iye naye emabhayini.
5 Njengombana kwenzeka lokho, u-Adoniya+ indodana kaRhagithi bekaziphakamisa, athi: “Ngizokuba yikosi!” Wayala bona enzelwe ikarana, wabuthelela nabakhweli beenjomani namadoda ama-50 agijima phambi kwakhe.+ 6 Kodwana uyise azange amkhalime* athi: “Ukwenzeleni lokhu?” Godu bekalisokana elinejamo tle begodu unina wambeletha ngemva kokubelethwa kwaka-Absalomu. 7 Wabonisana noJowabi indodana kaTseruya no-Abhiyathari+ umphristi, bavuma ukusiza nokusekela+ u-Adoniya. 8 Kodwana uTsadokhi+ umphristi, uBhenaya+ indodana kaJehoyada, uNathani+ umphorofidi, uTjhimeyi,+ uReyi neengorho+ zakaDavida azange bamsekele u-Adoniya.
9 Ekugcineni u-Adoniya wenza umhlatjelo+ wezimvu, weenkomo neweenlwana ezinonileko* ngelitjeni leZorhelethi, eliseduze ne-Eni-Rogeli. Wamema boke abafowabo okumadodana wekosi nawo woke amadoda wakwaJuda aziinsebenzi zekosi. 10 Kodwana azange ameme uNathani umphorofidi, uBhenaya, iingorho noSolomoni umfowabo. 11 Yeke uNathani+ wathi kuBhathi-Tjheba+ unina kaSolomoni:+ “Uzwile na ukuthi u-Adoniya+ indodana kaRhagithi sekayikosi nokuthi ikosethu uDavida ayazi litho ngendaba leyo? 12 Yeke izapha ngikulume indlebe bona usindise ukuphila kwakho nokuphila kwendodanakho uSolomoni.+ 13 Ngena ngeKosini uDavida, uthi kiyo, ‘Kghani akusinguwe na kosami owafunga esisebenzini sakho wathi: “Indodanakho uSolomoni izokuba yikosi ngemva kwami begodu ngiyo ezokuhlala esihlalweni sami sobukhosi”?+ Alo-ke kubayini u-Adoniya sekayikosi?’ 14 Uzokuthi usakhuluma nekosi, ngingene ngemva kwakho ngifakazele okutjhoko.”
15 Yeke uBhathi-Tjheba wangena ngekosini, ngekumbeni yekosi esithekileko. Ikosi beyiluphele khulu begodu beyitlhogonyelwa ngu-Abitjhagi+ weTjhunemi. 16 UBhathi-Tjheba wakhothama bewaguqa phambi kwekosi, ikosi yathi: “Ulila ngani?” 17 Waphendula wathi: “Kosami, nguwe owafunga esisebenzini sakho ngoJehova uZimakho wathi, ‘Indodanakho uSolomoni izokuba yikosi ngemva kwami begodu ngiyo ezokuhlala esihlalweni sami sobukhosi.’+ 18 Kodwana qala! U-Adoniya sekayikosi begodu ikosami ayazi litho ngalokho.+ 19 Wenze umhlatjelo ngeenkunzi, iinlwana ezinonisiweko nezimvu ezinengi, wamema woke amadodana wekosi no-Abhiyathari umphristi noJowabi isikhulu samabutho;+ kodwana azange ameme incekwakho uSolomoni.+ 20 Nje-ke kosami, u-Israyeli woke uqale wena bona utjho ukuthi ngubani ozokuhlala esihlalweni sobukhosi sekosami ngemva kwayo. 21 Nakungasinjalo, kuzakuthi msinyana ngemva kokukhothama kwekosami,* mina nendodanami uSolomoni kuthiwe simavukelambuso.”
22 Kuthe asakhuluma nekosi, uNathani umphorofidi wangena.+ 23 Msinyana ikosi yabikelwa ukuthi: “Nangu uNathani umphorofidi!” Wangena ngekosini, waguqa phambi kwayo wahloma ihloko phasi. 24 UNathani wathi: “Kosami, nguwe na othe, ‘U-Adoniya uzokuba yikosi ngemva kwami begodu nguye ozokuhlala esihlalweni sami sobukhosi’?+ 25 Ngombana namhlanjesi wehlile wayokwenza umhlatjelo+ ngeenkunzi, ngeenlwana ezinonisiweko nangezimvu ezinengi begodu umeme woke amadodana wekosi, iinkhulu zamabutho no-Abhiyathari umphristi.+ Bayadla bebasela naye, basolo bathi, ‘Bayede Kosi Adoniya!’ 26 Kodwana mina, akakangimemi; akakamemi noTsadokhi umphristi, uBhenaya+ indodana kaJehoyada nendodanakho uSolomoni. 27 Kghani ikosami ikuvumele lokho ingakatjeli isisebenzi sayo ukuthi ngubani okufuze ahlale esihlalweni sobukhosi sekosami ngemva kwayo?”
28 IKosi uDavida yaphendula yathi: “Ngibizelani uBhathi-Tjheba.” Bambiza, weza wajama phambi kwekosi. 29 Ikosi yafunga yathi: “Ikani uJehova nakasaphilako, loyo owangihlenga kilo loke isizi lami,+ 30 njengombana ngafunga kuwe ngoJehova uZimu ka-Israyeli, ngathi, ‘Indodanakho uSolomoni izokuba yikosi ngemva kwami begodu ngiyo ezokuhlala esihlalweni sami sobukhosi!’ Ngilokho-ke engizokwenza kwenzeke namhlanjesi.” 31 Nje-ke uBhathi-Tjheba wakhothama bewaguqa phambi kwekosi ahlome ihloko phasi, wathi: “Kwanga iKosami uDavida ingaphila ngokungapheliko!”
32 Khonokho iKosi uDavida yathi: “Ngibizelani uTsadokhi umphristi, uNathani umphorofidi, noBhenaya+ indodana kaJehoyada.”+ Yeke bangena ngekosini. 33 Ikosi yathi kibo: “Thathani iinsebenzi zekosenu, nikhweze indodanami uSolomoni emeyilenami,+ nehlele naye eGihoni.+ 34 UTsadokhi umphristi noNathani umphorofidi bazomzesela+ lapho bona abe yikosi phezu kwaka-Israyeli; ngemva kwalokho nibethe ipalapala, nithi, ‘Bayede Kosi Solomoni!’+ 35 Nimlandele nakabuyako, uzokungena ahlale esihlalweni sami sobukhosi; uzokuthatha ubukhosi bami begodu ngizombeka bona abe mrholi phezu kwaka-Israyeli noJuda.” 36 Khonokho uBhenaya indodana kaJehoyada wathi ekosini: “Amen! Kwanga uJehova uZimu wekosami angakuqinisekisa lokho. 37 UJehova akabe noSolomoni+ njengombana bekanekosami begodu kwanga angenza isihlalo sakhe sobukhosi sibe sikhulu kunesihlalo sobukhosi seKosami uDavida.”+
38 Yeke uTsadokhi umphristi, uNathani umphorofidi, uBhenaya+ indodana kaJehoyada, amaKereti namaPeleti+ behla bakhweza uSolomoni emeyileni yeKosi uDavida,+ bamusa eGihoni.+ 39 UTsadokhi umphristi wakhupha iphondo lamafutha+ ngetendeni+ wazesa uSolomoni,+ babetha ipalapala, boke abantu barhuwelela bathi: “Bayede Kosi Solomoni!” 40 Ngemva kwalokho, boke abantu bakhuphuka bamlandela, babetha amafuludi bathabe khulu, kangangobana iphasi ladengezeliswa litjhada labo.+
41 U-Adoniya nazo zoke iimenywa zakhe bezwa itjhadelo nabaqeda ukudla.+ Kwathi uJowabi nakezwa itjhada lepalapala, wathi: “Ngekwani ukuvungama okungaka okusedorobheni?” 42 Angakaliginyi lelo, kwafika uJonathani+ indodana ka-Abhiyathari umphristi. U-Adoniya wathi kuye: “Ngena ngombana uyindoda elungileko begodu kufuze ukuthi uze neendaba ezimnandi.” 43 Kodwana uJonathani wathi ku-Adoniya: “Awa! IKosethu uDavida ibeke uSolomoni ukuthi abe yikosi. 44 Ikosi yamkhambisa noTsadokhi umphristi, uNathani umphorofidi, uBhenaya indodana kaJehoyada, amaKereti namaPeleti begodu bamkhweze emeyileni yekosi.+ 45 Ngemva kwalokho, uTsadokhi umphristi noNathani umphorofidi bamzesa bona abe yikosi eGihoni. Nabaqedako, bakhuphuka lapho bathabile begodu idorobho loke lavungama. Ngilo-ke itjhada enilizwilekwelo. 46 Ngaphezu kwalokho, uSolomoni sekahlezi esihlalweni sobukhosi. 47 Nakhu okhunye, kufike iinsebenzi zekosi zazokuthokozisa iKosethu uDavida, zathi, ‘Kwanga uZimakho angenza igama lakaSolomoni libe lihle khulu ukudlula lakho begodu kwanga angenza isihlalo sobukhosi sakaSolomoni sibe sikhulu kunesakho!’ Nayizwa lokho ikosi yaguqa embhedenayo. 48 Godu ikosi ithe, ‘Akadunyiswe uJehova uZimu ka-Israyeli, obeke othileko namhlanjesi bona ahlale esihlalweni sami sobukhosi begodu wangivumela bona ngikubone ngamehlwami lokho!’”
49 Boke labo abamenywe ngu-Adoniya barhidlwa livalo, ngamunye wabo wasikima wabona eze ngayo. 50 U-Adoniya naye wasaba ngebanga lakaSolomoni, yeke wasikima, wakhamba wayokubamba iimpondo ze-aldara.+ 51 Kwafika umbiko kuSolomoni othi: “U-Adoniya usaba iKosi uSolomoni; ubambe iimpondo ze-aldara, uthi, ‘IKosi uSolomoni ayifunge kimi qangi ukuthi angekhe ibulale isisebenzi sayo ngesabula.’” 52 USolomoni waphendula wathi: “Nakangaziphatha kuhle, akunasihluthu sakhe nasinye esizokuwela phasi kodwana nakungafunyanwa ubumbi kuye,+ kuzokufanele afe.” 53 Yeke iKosi uSolomoni yathumela bona ehliswe e-aldareni. Ngemva kwalokho, wangena wakhothama eKosini uSolomoni, uSolomoni wathi kuye: “Khamba uye endlinakho.”