Isaya
5 Ngibawa ukubhinela engimthandako ingoma,
Ingoma ngaloyo engimthandako nesimakhe yamadiribe.+
Engimthandako bekanesimu yamadiribe embundwini onothileko.
2 Wayemba wakhupha amatje kiyo.
Watjala amadiribe abomvu akhethekileko kiyo,
Wakha umbhotjhongo hlangana nayo,
Wenza umgodi wokutlhodlhela iwayini elitjeni.+
Wasolo alinde bona izokuthela amadiribe,
Kodwana yaveza amadiribe wommango kwaphela.+
3 “Nje-ke, nina zakhamuzi zeJerusalema namadoda wakwaJuda,
Ngibawa nahlulele phakathi kwami nesimami yamadiribe.+
4 Yini enye ebengingayenza esiminami yamadiribe
Engingakayenzi?+
Kubayini lokha nangilindele amadiribe,
Ingivezela amadiribe wommango kwaphela?
5 Nje-ke, ngibawa ukunitjela
Ukuthi yini engizoyenza esiminami yamadiribe:
Ngizokususa umthangalayo wameva,
Begodu ngiyitjhise.+
Ngizokugiriza iboda layo lamatje,
Begodu izokugadangwa.
6 Ngizoyenza ibe njengenarha elahliweko;+
Angekhe ithenwe namkha ihlakulwe.
7 Ngombana isimu yamadiribe kaJehova wamabutho, iyindlu ka-Israyeli;+
Abantu bakwaJuda basitjalo ebekasithanda.
Bekasolo alindele ubulungiswa,+
Kodwana qala! Bebungekho ubulungiswa;
Ngombana bekalindele ukulunga,
Kodwana qala! Bekunesililo salabo abaphethwe kumbi.”+
8 Maye! Kilabo abahlanganisa indlu nenye indlu+
Nalabo abahlanganisa isimu nenye isimu+
Bekube kulapho kungasanandawo khona
Begodu nihlala nodwa enarheni!
9 UJehova wamabutho ufungile eendlebeni zami
Ukuthi izindlu ezinengi, nanyana zizikulu begodu zizihle,
Zizokuba marubhi athusako,
Kungabi nomuntu ohlala khona.+
10 Ngombana amahekthara* amane wesimu yamadiribe azokukhiqiza isilinganiso sinye sebhada* kwaphela,
Nesilinganiso sembewu esilihomere,* sizokukhiqiza i-efa* kwaphela.+
11 Maye! Kilabo abavuka ekuseni khulu bona basele utjwala,+
Bahlala bekube sebusuku bekube kulapho badakwa liwayini!
12 Baneharibha nesililiso sesinara,
Usotjherere, ifuludi newayini eminyanyenabo;
Kodwana abawutjheji umsebenzi kaJehova,
Begodu abawuboni umsebenzi wezandla zakhe.
13 Nje-ke abantu bami bazokuya ekudingisweni
Ngebanga lokuthi abangazi;+
Abantu babo abahlonitjhwako bazokulamba,+
Begodu boke abantu babo bazokoma.
Begodu iphazimulo yedorobhelo, iinqubuthu zalo ezinetjhada nalabo abathanda zokuzithabisa
Bazokwehlela kilo nakanjani.
15 Begodu umuntu uzokuthotjiswa,
Umuntu uzokwehliswa,
Begodu amehlo wabazikhakhazisako azokwehliswa.
16 UJehova wamabutho uzokuphakanyiswa ngesahlulelo sakhe;
17 Iimvana zizokudla emadlelwenazo;
Abantu abavela kwezinye iinarha, bazokudla eendaweni ezimarubhi lapho bekuhlala khona iinlwana zekhethelo.
18 Maye! Kilabo abanamala!
Ngamalabo badosa umtjhapho nesono njengesilwana esidosa ikarana ngeenrobho;
19 Labo abathi: “Akenze umsebenzakhe msinya;
Bona siwubone.
Umnqopho woCwengileko ka-Israyeli awenzeke.
Bona siwazi!”+
20 Maye! Kilabo abathi okuhle kumbi nokumbi kuhle,+
Labo abajamiselela ubumnyama ngokukhanya nokukhanya ngobumnyama,
Labo abathi okubabako kumnandi nokumnandi kuyababa!
21 Maye! Kilabo abahlakaniphe emehlwenabo
Nabanelemuko ekuboneni kwabo!+
22 Maye! Kilabo abaziinkutani zokusela iwayini
Nalabo abanobukghoni bokuvanga utjwala,+
23 Labo abatjhaphulula okhohlakeleko ngesifumbathiso+
Nalabo abenza olungileko abe mlandu!+
24 Yeke njengombana ilimu lomlilo lirhiribidela umhlanga
Notjani obomileko bunyamalale emalangabini,
Imirabhabo izokubola,
Begodu amathuthumbabo azokurhatjheka njengethuli,
Ngombana balahle umthetho kaJehova wamabutho
Begodu akhenge bahloniphe ilizwi loCwengileko wakwa-Israyeli.+
25 Kungebangelo ilaka lakaJehova livutha malungana nabantu bakhe,
Uzokulula isandla sakhe ngokujamelene nabo begodu abarhayile.+
Iintaba zizokuhlengezela,
Neendumbu zabo zizokuba njengeenzibi eendleleni.+
Ngebanga lakho koke lokhu, ilaka lakhe akhenge libuyele emva,
Isandla sakhe sisajamile bona sirhayile.
26 Uphakamisele isitjhaba esikude itshwayo;+
Wasibiza bona size sivela emaphethelweni wephasi;+
Begodu qala! Siza msinya.+
27 Akekho namunye hlangana naso odiniweko namkha owako.
Akekho namunye oyendako namkha olalako.
Ibhande elisemadininabo alikatjhaphuluki,
Nemitja yamapatlagwanabo ayikaquntuki.
28 Yoke imicibitjholwabo ibukhali,
Begodu imisubelabo ilindele ukudumuza.
Iinqatha zeenjomani zabo ziqine njengamatje aqinileko,
Namavilazo anjengesiwuruwuru.+
29 Sibhodla njengebhubezi;
Sibhodla njengamabhubezi amancani.+
Sizokwenza itjhada, sibambe nenyamazana
Siyithwale kungabi nomuntu ozoyihlenga.
30 Ngelangelo sizoyibangela itjhada
Njengetjhada lelwandle.+
Nanyana ngubani oqala inarha uzokubona ubumnyama obugandelelako;
Ngitjho nomkhanyo sewumnyama ngebanga lamafu.+