Hezekiyeli

18 Ilizwi lakaJehova lafika kimi godu, lathi: 2 “Sitjho ukuthini isitjho enisitjhoko enarheni yakwa-Israyeli, ‘Abobaba badle amadiribe ababako kodwana madodanabo ababelwako’?+

3 “‘Nangisaphilako,’ kutjho iKosi ePhakemeko uJehova, ‘angekhe nisaphinda nisitjho isitjhwesi kwa-Israyeli. 4 Qalani! Yoke imiphefumulo, ingeyami. Njengombana umphefumulo* kababa ungewami nomphefumulo wendodana, ungewami. Umphefumulo owonako uzokufa.*

5 “‘Akhe sithi umuntu ulungile begodu wenza okulungileko nokuhle. 6 Akadli ukudla okuhlatjelwe iinthombe eentabeni;+ akalotjhi iinthombe ezinyenyisako* zendlu yakwa-Israyeli; akafebi nomfazi kamakhelwana+ namkha aye emabhayini nomma osesikhathini;+ 7 akaphathi kumbi abanye abantu+ kodwana ubuyisela lokho umbolekisi amboleke khona;+ akebeli muntu+ kodwana upha olambileko ukudla kwakhe+ begodu umbathisa ohlubule ngesambatho;+ 8 akabhadelisi ngenzalo namkha enze inzalo ngalabo ababolekako+ kodwana uyakubalekela ukwenza ngokunganabulungiswa;+ ukhupha isahlulelo esilungileko hlangana namadoda amabili;+ 9 uragela phambili akhamba emthethwenami begodu uphetha iinqunto zami zokwahlulela bona enze ngokuthembeka. Umuntu onjalo ulungile begodu nakanjani uzokuhlala aphila,’+ kutjho iKosi ePhakemeko uJehova.

10 Akhesithi uba ngubaba wendodana eyebako+ namkha ebulalako+ namkha eyenza nanyana ngiyiphi yezintwezi 11 (nanyana ubaba angakhenge enze yinye yezintwezi) idla imihlatjelo yeenthombe eentabeni, ifeba nomfazi kamakhelwanayo, 12 iphatha kumbi onganalitho notlhagako,+ iyadlelezela, ayibuyiseli isibambiso, ilotjha iinthombe ezinyenyisako,+ yenza nezenzo ezinyenyisako,+ 13 ibolekisa ngenzalo, ingezelela namakonyana nayibolekisako.+ Nje-ke indodana angekhe iragele phambili iphila. Ngebanga lazo zoke izintwezi ezinyenyisako ezenzileko, izokufa nakanjani. Iingazi zayo zizokuba phezu kwayo.

14 “‘Akhe sithi ubaba unendodana ebona zoke izono ezenziwa nguyise, nanyana izibona ayizenzi izinto ezinjalo. 15 Ayidli ukudla okuhlatjelwe iinthombe eentabeni; ayilotjhi iinthombe ezinyenyisako zendlu yakwa-Israyeli; ayifebi nomfazi kamakhelwana; 16 ayiphathi kumbi abanye abantu; ayithathi okusibambiso; ayebeli muntu; ipha olambileko ukudla kwakhe, yembese ohlubule ngesambatho; 17 Ayigandeleli abatlhagako; ayibolekisi ngenzalo namkha ibhadelise ngenzalo; iphetha iinqunto zami zokwahlulela, ikhamba emthethwenami. Indoda enjalo angekhe ihlongakale ngebanga lomtjhapho kababayo. Nakanjani izokuragela phambili iphila. 18 Ngebanga lokuthi uyise ukhwabanisile, wadlelezela umfowabo, wenza okumbi hlangana nabantu bekhabo, uzokufa ngebanga lomtjhaphwakhe.

19 “‘Kodwana uzokuthi: “Kubayini indodana ingathwali umlandu ngebanga lomtjhapho kayise?” Njengombana indodana yenze okuhle nokulungileko, iyiphethe yoke imithethwami yayenza, nakanjani izokuragela phambili iphila.+ 20 Umphefumulo owonako uzokufa.+ Indodana angekhe ithwale umlandu ngebanga lomtjhapho kayise, ubaba angekhe athwale umlandu ngebanga lendodanakhe. Ukulunga kolungileko kuzokuba phezu kwakhe nobukhohlakali bokhohlakeleko buzokuba phezu kwakhe.+

21 “‘Nange umuntu okhohlakeleko alisa zoke izono azenzileko, aphethe imithethwami, enze okuhle nokulungileko, nakanjani uzokuragela phambili aphila. Angekhe ahlongakale.+ 22 Angekhe ajeziselwe izono azenzileko.+ Uzokuragela phambili aphila ngokwenza okulungileko.’+

23 “‘Kghani ngiyathaba na ngokufa kwabo boke abakhohlakeleko?’+ Kutjho iKosi ePhakemeko uJehova. ‘Kghani angifisi na bona aphenduke eendleleni zakhe aragele phambili aphila?’+

24 “‘Lokha umuntu olungileko nakatjhiya okulungileko enze okumbi, enze zoke izinto ezinyenyisako ezenziwa ngokhohlakeleko, kghani uzokuphila? Zoke izinto ezilungileko azenzileko angekhe zikhunjulwe.+ Ngebanga lokungathembeki kwakhe nesono asenzileko, uzokufa.+

25 “‘Nizokuthi: “Indlela kaJehova ayikalungi.”+ Maye! Ndlu ka-Israyeli. Ngibawa nilalele, kghani yindlelami engakalungi?+ Kghani akusiziindlela zenu ezingakalungi?+

26 “‘Lokha umuntu olungileko nakatjhiya okulungileko enze okumbi, afe ngebanga lezenzo zakhe, uzokufa ngebanga lobumbi bakhe.

27 “‘Nange umuntu okhohlakeleko alisa ukukhohlakala akwenzileko, athome ukwenza okuhle nokulungileko, uzokusindisa ukuphila kwakhe.*+ 28 Lokha nakalemukako, atjhiye zoke izono azenzileko, nakanjani uzokuragela phambili aphila. Angekhe afe.

29 “‘Indlu ka-Israyeli izokuthi: “Indlela kaJehova ayikalungi.” Maye! Ndlu ka-Israyeli.+ Kghani kwamambala iindlela zami azikalungi, kghani akusiziindlela zenu ezingakalungi?’

30 “‘Nje-ke, ngizokwahlulela ngamunye wenu ngokweendlela zakhe,+ maye! Ndlu ka-Israyeli,’ kutjho iKosi ePhakemeko uJehova. ‘Tjhiyani, iye, tjhiyani ngokupheleleko zoke izono zenu, bona zingabi siqabo esiletha umlandu phezu kwenu. 31 Maye! Ndlu ka-Israyeli. Lahlani zoke izono enizenzileko,+ nifune ihliziyo etja nommoya omutjha+ ngombana kubayini kufuze nife?’+

32 “‘Angithabi ngokufa kwananyana ngubani,’+ kutjho iKosi ePhakemeko uJehova. ‘Nje-ke phendukani, niphile.’”+