Mikha
4 Emihleni yokuphela,
Intaba yendlu kaJehova+ izokudzinyeleliswa
Phezulu esiqongolweni seentaba,
Izokuphakanyiswa ngaphezu kwemibundu
Abantu bazokuya kiyo ngobunengi.+
2 Iintjhaba ezinengi zizokuza, zithi:
“Yenize asikhuphukeleni entabeni kaJehova
Endlini kaZimu kaJakopo.+
Uzosifundisa ngeendlela zakhe
Begodu sizokukhamba eendleleni zakhe.”
Ngombana umthetho uzokuphuma eZiyoni
Nelizwi likaJehova lizokuphuma eJerusalema.
Zizokwenza iinsabula zazo zibe maplurhu
Nemikhontwazo ibe mimikhwa yokuthena imithi.+
Isitjhaba angeze sisaphakamisela esinye isitjhaba isabula,
Namkha sifunde ipi.+
4 Omunye nomunye uzokuhlala ngaphasi komuthakhe wamadiribe nangaphasi komuthakhe wamafeyi,+
Akekho ozobethusa+
Ngombana uJehova wamabutho ukhulumile.
5 Zoke iintjhaba zizokukhamba kube ngileso naleso ngegama lakazimaso,
Kodwana thina sizokukhamba ngegama lakaJehova uZimethu+ ngokungapheliko.
6 UJehova uthi: “Emihleni leyo,
Ngizokubuthelela obekahluza,
Begodu ngibuthelele ndawonye abaphadlhalajiweko,+
Nalabo engabazwisa ubuhlungu.
7 Obekahluza ngizomenza asale,+
Nobekaqothelwe kude ngizomenza isitjhaba esinamandla,+
Begodu uJehova uzokuba yikosabo eNtabeni iZiyoni,
Kusukela nje bekube nini nanini.
8 Wena siThala somhlambi,
Ntaba yendodakazi yeZiyoni,+
Kwamambala umbuso waphambilini uzokubuyela kuwe,+
Umbuso wendodakazi yeJerusalema.+
9 Alo kubayini urhuwelela?
Awunakosi na?
Kghani umelulekakho utjhabalele?
Kungebangelo na uzwa ubuhlungu njengomfazi obelethako?+
10 Zibhudabhude begodu ulile wena ndodakazi yeZiyoni,
Njengomfazi obelethako,
Kusukela nje uzokusuka edorobheni uyokuhlala emmangweni.
Uzokukhamba bewuyokufika eBhabhiloni,+
Nawufika lapho uzokusindiswa,+
Lapho uJehova uzokuthenga esandleni samanabakho.+
11 Iintjhaba ezinengi zizokuhlangana zilwe nawe;
Zizokuthi, ‘Alisilaphazwe,
Kwangathi amehlwethu angakubona lokhu kwenzeka eZiyoni.’
12 Kodwana abayazi imicabango kaJehova,
Abawuzwisisi umnqophwakhe,
Ngombana uzobabuthelela njengeenyanda zekoroyi eselelweni.
13 Sikima uyokubhula ikoroyi ndodakazi yeZiyoni,+
Ngizokwenza ube njengekunzi eneempondo zesimbi
Neenqatha zekhopha,
Uzokutjhabalalisa abantu abanengi.+
Inzuzwabo engakathembeki uzoyinikela kuJehova
Nezinto zabo uzinikele iKosi ePhakemeko yephasi loke.”+