USamyela Wokuthoma

15 USamyela wathi kuSawula: “UJehova wangithuma bona ngizokuzesa ukuthi ube yikosi yabantu bakhe u-Israyeli;+ nje-ke lalela ukuthi uJehova uthini.+ 2 UJehova wamabutho uthi: ‘Ngizokwenza ama-Amalekhi aqalane nemiphumela yalokho akwenza kuma-Israyeli ngesikhathi ajamelana nawo endleleni nawaphuma eGibhide.+ 3 Nje-ke khamba uyokurhayila ama-Amalekhi+ begodu uwatjhabalalise+ nakho koke anakho. Ungawarhawukeli; kufuze uwabulale,+ ubulale indoda nomfazi, umntwana nesana, ikunzi nemvu, ikamela nodumbana.’”+ 4 USawula wabiza abantu begodu wababala eThelayimi: Bekumajoni akhamba ngeenyawo azii-200 000 namadoda wakwaJuda azii-10 000.+

5 USawula wakhamba bewafika edorobheni laka-Amalekhi bese wazifihla eduze nomrhoba bona asahlele ama-Amalekhi. 6 USawula wathi kumaKheni:+ “Phumani hlangana nama-Amalekhi bona ngingazonithanyela kunye nawo.+ Ngombana natjengisa ukuthi niyabathanda* boke abantu bakwa-Israyeli+ ngesikhathi bakhuphuka baphuma eGibhide.” Nje-ke amaKheni aphuma hlangana nama-Amalekhi. 7 Ngemva kwalokho uSawula warhayila ama-Amalekhi+ kusukela eRhavila+ kufikela eTjhuri,+ ehlanu kweGibhide. 8 Wabamba u-Agagi+ ikosi yama-Amalekhi asaphila kodwana boke abanye abantu wabarhayila ngesabula.+ 9 Nanyana kunjalo, uSawula nabantu bamrhawukela u-Agagi nekhethelo lezimvu, leenkomo, leenlwana ezinonisiweko, lamaramu, nakho koke ebekukuhle.+ Azange bafune ukukutjhabalalisa. Kodwana zoke izinto ezinganamsebenzi nezingafunwako bazitjhabalalisa.

10 Yeke ilizwi lakaJehova lafika kuSamyela lathi: 11 “Ngiyazisola ukuthi* ngibeke uSawula bona abe yikosi ngombana ujikile, akasangilandeli begodu azange awaphethe amezwami.”+ Lokho kwamzwisa ubuhlungu obukhulu uSamyela, walilela uJehova ubusuku boke.+ 12 USamyela wavuka ngamasa bona ayokuhlangana noSawula kodwana watjelwa ukuthi: “USawula utjhinge eKarameli+ begodu lapho uzijamisele ilitje lesikhumbuzo.+ Ngemva kwalokho wajika wehlela eGiligali.” 13 Ekugcineni uSamyela nakafika kuye, uSawula wathi kuye: “Kwanga uJehova angakubusisa. Ngiliphethile ilizwi lakaJehova.” 14 Kodwana uSamyela wathi: “Alo-ke ngelani itjhada lezimvu neleenkomo engilizwakweli?”+ 15 USawula waphendula wathi: “Zithethwe kuma-Amalekhi ngombana abantu barhawukele ikhethelo lezimvu neenkomo bona bazokwenza ngazo umhlatjelo kuJehova uZimakho; kodwana okuseleko sikutjhabalalisile.” 16 Nakezwa lokho uSamyela wathi kuSawula: “Ibambe lapho! Akhengikutjele ukuthi uJehova utheni kimi ebusuku bayizolo.”+ Wathi kuye: “Khuluma!”

17 USamyela waraga wathi: “Bewungasimncani na emehlwenakho+ nawenziwa ihloko yeentjhaba zakwa-Israyeli nalokha uJehova akuzesa bona ube yikosi yakwa-Israyeli?+ 18 Ngokukhamba kwesikhathi uJehova wakuthumela ejimeni wathi, ‘Khamba uyokutjhabalalisa izonikazi ezima-Amalekhi.+ Yilwa nawo bewuwaqede nya!’+ 19 Alo kubayini ungazange ulalele ilizwi lakaJehova? Kunalokho, ngokuba marhamaru ugijimele ezintweni ezithunjwe+ epini begodu wenza okumbi emehlweni kaJehova!”

20 Nanyana kunjalo, uSawula wathi kuSamyela: “Kodwana ngililalele ilizwi lakaJehova! Ngiyile ejimeni uJehova angithume kilo, ngibuye no-Agagi ikosi yama-Amalekhi begodu ama-Amalekhi ngiwatjhabalalisile.+ 21 Kodwana abantu bathethe izimvu neenkomo kilokho ekuthunjwe epini, ikhethelo lalokho okutjhatjalalisiweko bona benze umhlatjelo kuJehova uZimakho eGiligali.”+

22 Yeke uSamyela wathi: “Kghani uJehova uthatjiswa minikelo yokutjhiswa nemihlatjelo+ ukudlula ukulalela ilizwi lakaJehova? Qala! Ukulalela kungcono kunomhlatjelo,+ nokulalelisisa kungcono kunamafutha+ wamaramu; 23 ngombana ukuhlubuka+ kufana nesono sokuthukula,+ ukugagamela nokuba nekani kufana nokusebenzisa amandla wemilingo nokulotjha iinthombe.* Ngebanga lokuthi ulalile ilizwi lakaJehova,+ naye ukwalile bona ube yikosi.”+

24 Yeke uSawula wathi kuSamyela: “Ngonile ngombana ngeqe umyalo kaJehova namezwakho, ngebanga lokuthi ngisabe abantu begodu ngalalela lokho abakutjhoko. 25 Nje-ke ngibawa ulibalele isono sami, ubuyele nami bona ngikhothame kuJehova.”+ 26 Kodwana uSamyela wathi kuSawula: “Angekhe ngibuyele nawe ngombana ulalile ilizwi lakaJehova, noJehova ukwalile bona uragele phambili uyikosi yakwa-Israyeli.”+ 27 USamyela nakathi uyajika uyakhamba, uSawula wabamba umphetho wejasakhe enganamikhono kodwana yadabuka. 28 Nakwenzeka lokho uSamyela wathi: “UJehova ubudabulile ubukhosi bakwa-Israyeli kuwe namhlanjesi begodu uzobunikela omunye umuntu ongcono kunawe.+ 29 Ngaphezu kwalokho, uZimu oBabazekako ka-Israyeli+ angekhe aleye amala+ namkha atjhugulule umkhumbulwakhe ngombana akasimumuntu nje bona angatjhugulula umkhumbulwakhe.”+

30 Yeke uSawula wathi: “Ngonile. Kodwana ngibawa ungidumise phambi kwabadala babantu bami naphambi kwaka-Israyeli. Buyela nami, ngizokukhothama kuJehova uZimakho.”+ 31 Yeke uSamyela wabuyela akhamba ngemva kwakaSawula begodu uSawula wakhothama kuJehova. 32 USamyela wathi: “Lethani u-Agagi ikosi yama-Amalekhi kimapha.” Yeke u-Agagi watjhinga kuye azaza,* ngombana u-Agagi besele azitjela ukuthi: ‘Ngokuqinisekileko angekhe ngisabulawa.’ 33 Kodwana uSamyela wathi: “Njengombana isabulakho itjhiye abafazi banganabantwana, nonyoko uzokuba dududu namhlanjesi.” Yeke uSamyela wambulala u-Agagi phambi kwakaJehova eGiligali.+

34 Nje-ke uSamyela watjhinga eRama begodu uSawula wakhuphukela endlinakhe eGibeya kaSawula. 35 USamyela azange asambona uSawula bewahlongakala ngombana uSamyela wayokulilela uSawula.+ UJehova wazisola ngokuthi wenza uSawula waba yikosi kwa-Israyeli.+