Eksodusi

19 Ngenyanga yesithathu ngemva kokuthi ama-Israyeli aphume enarheni yeGibhide, afika emmangweni weSinayi. 2 Asuka eRefidimu+ afika emmangweni weSinayi akampa emmangwenapho, phambi kwentaba.+

3 Ngemva kwalokho uMosi wakhuphuka waya kuZimu weqiniso, uJehova wabiza uMosi asentabenapho+ wathi: “Nakhu okufuze ukutjele indlu kaJakopo nama-Israyeli, 4 ‘Nizibonele ngokwenu engikwenze kumaGibhide,+ ukwenzela bona nginibambe njengekhozi nalibamba abantwabalo, nginilethe kimi.+ 5 Nje-ke nanilalela ilizwi lami, niphethe isivumelwano sami, nizokuba babantu bami abakhethekileko* hlangana nabantu boke+ ngombana loke iphasi ngelami.+ 6 Nizokuba baphristi ababusa njengamakhosi nesitjhaba esicwengileko.’+ Ngilokhu okufuze ukutjele ama-Israyeli.”

7 Nje-ke uMosi wakhamba wabiza abadala wabatjela woke amezwi uJehova amyale ngawo.+ 8 Ngemva kwalokho boke abantu baphendula ngokuvumelana bathi: “Koke uJehova akukhulumileko sizimisele ukukwenza.”+ Khonokho uMosi wabuyisela ipendulo yabantu kuJehova. 9 UJehova wathi kuMosi: “Ngiza kuwe ngiselifini elimnyama, ukwenzela bona abantu bezwe ukuthi ngikhulume nawe nokuthi bahlale bakuthemba.” Nje-ke uMosi watjela uJehova ngalokho abantu abakutjhwileko.

10 UJehova wathi kuMosi: “Khamba uye ebantwini ubacwengise namhlanjesi nakusasa begodu kufuze bahlanze izambatho zabo. 11 Kufuze balungele ilanga lesithathu ngombana ngelanga lesithathu uJehova uzokwehlela eNtabeni iSinayi abe phambi kwabo boke abantu. 12 Kufuze ubekele abantu imikhawulo magega nentaba bewuthi kibo, ‘Yelelani bonyana ningakhuphukeli entabeni namkha nithinte umkhawulwayo. Nanyana ngubani othinta intaba leyo uzokufa. 13 Akunamuntu okufuze athinte umuntu loyo kodwana kufuze akghadlhwe ngamatje namkha ahlatjwe ngemicibitjholo. Kungaba sibandana namkha umuntu, uzokufa.’+ Abantu nabezwa iphondo leramu+ kufuze bakhuphukele entabeni.”

14 Yeke uMosi wehla entabeni weza ebantwini, wathoma ukubacwengisa begodu abantu bahlanza izambatho zabo.+ 15 Wathi ebantwini: “Lungelani ilanga lesithathu. Ningayi emabhayini.”

16 Ekuseni elangeni lesithathu, kwararamba, umbani, ilifu elinzima+ entabeni netjhada elikhulu lephondo, kangangokuthi boke abantu ekampeni barhidlwa livalo.+ 17 Nje-ke uMosi wakhupha abantu ngekampeni bona bazokuhlangana noZimu weqiniso, bebajama phasi ekuthomeni kwentaba. 18 INtaba yeSinayi yazala intuthu ngombana uJehova wehlela kiyo ngomlilo;+ intuthwayo yakhuphuka njengentuthu ye-ondo begodu intaba yasikinyeka ngamandla.+ 19 Njengombana itjhada lephondo lisolo lililela phezulu, uMosi wakhuluma, kwazwakala ilizwi lakaZimu weqiniso limphendula.

20 Nje-ke uJehova wehlela esiqongolweni seNtaba iSinayi. UJehova wabiza uMosi bona eze entabeni, uMosi wakhuphukela kuye.+ 21 UJehova wathi kuMosi: “Yehla uyokuyelelisa abantu bona bangalingi ukudlula imikhawulo bazokubona uJehova, nakungasinjalo inengi labo lizokutjhabalala. 22 Abaphristi abeza qobe phambi kwakaJehova abazicwengise, ukwenzela bona uJehova angabarhayili.”+ 23 UMosi wathi kuJehova: “Abantu angekhe beze eNtabeni yeSinayi ngombana usiyelelisile wathi, ‘Bekani imikhawulo magega nentaba begodu niyicwengise.’”+ 24 UJehova wathi kuye: “Yehlela kibo ubuye no-Aroni kodwana ungavumeli abaphristi nabantu bona bakatelele ukukhuphukela kuJehova, ukwenzela bona bangafi.”+ 25 UMosi wehlela ebantwini wabatjela lokho uZimu akutjhwileko.