Yokuthoma YamaKhosi

8 Ngesikhatheso uSolomoni wabizela ndawonye+ abadala bakwa-Israyeli, zoke iinhloko zeenkoro, amakhosana weenkoro zakwa-Israyeli.+ Beza eKosini uSolomoni eJerusalema bakhuphuka nomfaji wesivumelwano sakaJehova usuka eDorobheni lakaDavida,+ okuyiZiyoni.+ 2 Woke amadoda wakwa-Israyeli abuthana phambi kweKosi uSolomoni emnyanyeni* ngenyanga ka-Ethanimi,* okuyinyanga yekhomba.+ 3 Nje-ke bafika boke abadala bakwa-Israyeli begodu abaphristi bathwala umFaji.+ 4 Bakhuphuka nomFaji kaJehova, itende lokuhlangana+ nazo zoke izitja ezicwengileko ebezingetendeni. Abaphristi namaLevi* bakhuphuka nazo. 5 IKosi uSolomoni nayo yoke ihlangano yakwa-Israyeli, ebeyiyalwe bona iyokuhlangana nayo, bebajame phambi komFaji. Bekwenziwa imihlatjelo+ eminengi yezimvu neyeenkomo kangangobana bebangakghoni nokuzibala.

6 Yeke abaphristi bangenisa umfaji wesivumelwano sakaJehova endawenawo,+ ekumbeni efihlekileko yendlu, okuyiNdawo eCwengeke Khulu, ngaphasi kwamaphiko wamakherubhi.+

7 Amaphiko wamakherubhi bewavulekele phezu kwendawo yomFaji, ukwenzela bona amakherubhi asithe umFaji neembambo zawo.+ 8 Iimbambo+ zawo bezizide kangangobana iimpente zazo bezibonakala ngeNdaweni eCwengileko ephambi kwekumba efihlekileko kodwana bezingabonakali nawungaphandle. Ziseselapho bekube kunamhlanjesi. 9 Bekunganalitho ngaphakathi komFaji ngaphandle kwemiqebethu emibili+ eyabekwa nguMosi lapho+ eRhorebe, lokha uJehova nakenza isivumelwano+ nabantu bakwa-Israyeli nabaphuma enarheni yeGibhide.+

10 Abaphristi nabaphuma endaweni ecwengileko, ilifu+ lazala indlu kaJehova.+ 11 Abaphristi bebangakghoni ukujama benze imisebenzabo ngebanga lelifu ngombana iphazimulo kaJehova yazala indlu kaJehova.+ 12 Ngesikhatheso uSolomoni wathi: “UJehova wathi uzokuhlala elifini elinzima.+ 13 Ngiphumelele ukukwakhela indlu ephakemeko, indawo enzinzileko bona uhlale kiyo isiphelani.”+

14 Ngemva kwalokho, ikosi yaphenduka, yathoma ukubusisa loke ibandla lakwa-Israyeli kukulapho loke ibandla lakwa-Israyeli lijame ngeenyawo.+ 15 Yathi: “Kwanga uJehova uZimu ka-Israyeli angadunyiswa, loyo ngomlomakhe athembisa ubaba uDavida nangesandla sakhe wenza bona isithembiswesi sizaliseke, wathi, 16 ‘Kusukela ngelanga engakhupha ngalo abantu bami u-Israyeli eGibhide, akhenge ngikhethe idorobho hlangana neentjhaba zakwa-Israyeli lapho ngizokwakhela khona igama lami indlu bonyana lihlale khona,+ kodwana ngikhethe uDavida bona aphathe abantu bami u-Israyeli.’ 17 Nje-ke ubaba uDavida bekafisa ngehliziywakhe yoke ukwakhela igama lakaJehova uZimu ka-Israyeli indlu.+ 18 Kodwana uJehova wathi kubaba uDavida, ‘Bewufisa ngehliziywakho yoke ukwakhela igama lami indlu begodu wenze intwehle ngokufisa lokhu ehliziywenakho. 19 Nanyana kunjalo, angekhe uyakhe indlu leyo, indodanakho ozoyibeletha, ngiyo ezokwakhela igama lami indlu.’+ 20 UJehova ufeze isithembiso asenzileko ngombana ngimi ongene esikhundleni sakababa uDavida, ngahlala esihlalweni sobukhosi saka-Israyeli njengombana uJehova athembisile. Godu ngakhele igama lakaJehova uZimu ka-Israyeli indlu,+ 21 khonapho ngenza nendawo yokubeka umFaji onesivumelwano+ uJehova asenza nabokhokho bethu nakabakhupha enarheni yeGibhide.”

22 Ngemva kwalokho, uSolomoni wajama phambi kwe-aldara lakaJehova phambi kwalo loke ibandla lakwa-Israyeli, walulela izandla zakhe ezulwini,+ 23 wathi: “Jehova Zimu ka-Israyeli, akakho omunye uZimu onjengawe+ ezulwini phezulu namkha ephasini phasi, ophetha isivumelwano nothanda*+ iinceku zakhe ezikhamba phambi kwakho ngeenhliziyo zazo zoke.+ 24 Ukwenzile owakuthembisa incekwakho uDavida ubaba. Wenza isithembisweso ngomlomakho begodu namhlanjesi, usenze sazaliseka ngesandla sakho.+ 25 Nje-ke Jehova Zimu ka-Israyeli, phetha isithembiso owasenza nencekwakho uDavida ubaba nawuthi: ‘Kuzokuhlala kunomuntu osizukulwana sakho esihlalweni sobukhosi sakwa-Israyeli, kwaphela nangabe amadodanakho atjheja indlela akhamba ngayo phambi kwami, ngendlela wena okhambe ngayo phambi kwami.’+ 26 Nje-ke Zimu ka-Israyeli, ngibawa bona isithembiso owasenza encekwinakho uDavida ubaba sizaliseke.

27 “Kodwana kwamambala uZimu uzokuhlala ephasini?+ Qala! Izulu, iye, izulu lezulu, angeze lakghona ukukuthwala;+ iyini-ke indlu engiyakhileko le!+ 28 Nje-ke Jehova Zimami, ngibawa ulalelisise umthandazo wencekwakho nesibawo sayo somusa, ulalele nesililo sokubawa isizo nomthandazo incekwakho ewuthandaza phambi kwakho namhlanjesi. 29 Kwanga amehlwakho angavulekela ngendlini le ubusuku nemini, aqale indawo owathi ngayo, ‘Igama lami lizokuba lapho,’+ bona ulalele umthandazo incekwakho ewuthandaza iqale endaweni le.+ 30 Lalela isibawo sencekwakho somusa nesibawo sabantu bakho u-Israyeli lokha nabathandaza baqale endaweni le begodu kwanga ungezwa usendawenakho yokuhlala ezulwini;+ iye, kwanga ungezwa begodu ulibalele.+

31 “Nakungenzeka umuntu one komunye umuntu bese enziwa bona afunge,* abe ngaphasi kwesifungo esiletha isijeziso, kuthi asesengaphasi kwesifungweso eze phambi kwe-aldara lakho endlini le,+ 32 kwangathi ungalalela usezulwini, uthathe igadango wahlulele iinceku zakho ngokuthi komumbi umlandu, ukubeke ehlokwakhe koke akwenzileko bese uthi kolungileko umsulwa, umtlomelise ngokuvumelana nokulunga kwakhe.+

33 “Abantu bakho u-Israyeli nabahlulwe sisitha ngebanga lokuthi bebasolo bona kuwe+ bese babuyela kuwe baphazimulise igama lakho,+ bathandaze basendlini le bakuncenge bona ube nomusa,+ 34 kwanga ungabezwa usezulwini, ulibalele isono sabantu bakho u-Israyeli, ubabuyisele enarheni owayinikela abokhokho babo.+

35 “Umkayi nawuvaliweko begodu kunganazulu elinako+ ngebanga lokuthi bebasolo bona kuwe,+ bese bathandaza baqale endaweni le baphazimulise igama lakho batjhuguluke esonweni sabo ngebanga lokuthi ubahlunguphazile,*+ 36 kwanga ungezwa usezulwini ulibalele isono seenceku zakho, abantu bakho u-Israyeli ngombana uzobafundisa+ indlelehle okufuze bakhambe ngayo; unise nezulu enarhenakho+ owayinikela abantu bakho bona ibe lilifa labo.

37 “Nakungenzeka kube nendlala enarheni le+ namkha isifo, ubori, ukukghora,+ isikhonyani; namkha iintethe ezirhiribidelako namkha nakungenzeka isitha sabo sibavimbezele kinanyana ngiliphi idorobho lenarha le namkha nabangehlelwa nginanyana ngimuphi umhlobo wesibetho namkha isifo,+ 38 nanyana ngimuphi umthandazo nanyana ngisiphi isibawo somusa+ esenziwe nginanyana ngimuphi umuntu namkha esenziwa babantu bakho boke u-Israyeli (ngombana ngamunye uyakwazi okutshwenya ihliziywakhe)+ nabalulela izandla zabo ngendlini le, 39 kwanga ungezwa usezulwini, indawo ohlala kiyo+ begodu kwangathi ungalibalela+ uthathe igadango; ubuyisele ngamunye ngokuvumelana nazo zoke iindlela zakhe+ ngombana uyayazi ihliziywakhe (nguwe wedwa oyazi kwamambala ihliziyo yawo woke umuntu),+ 40 bona bakusabe yoke imihla abayiphila enarheni owayinikela abokhokho bethu.

41 “Godu malungana nomuntu wakwesinye isitjhaba ongasiyingcenye yabantu bakho u-Israyeli, ovela enarheni ekude ngebanga legama lakho*+ 42 oza begodu athandaze aqale endlini le (ngombana bazokuzwa ngegama lakho elikhulu+ nangesandla sakho esinamandla nomkhonwakho olulekileko), 43 kwanga ungalalela usezulwini, indawo ohlala kiyo,+ wenze koke umuntu wakwesinye isitjhaba akubawa kuwe bona zoke iintjhaba zephasi zilazi igama lakho, zikusabe+ njengabantu bakho u-Israyeli, zazi nokuthi igama lakho libizwe endlini engikwakhele yona le.

44 “Nakwenzeka abantu bakho batjhinga epini bayokulwa nenaba labo ngendlela obathume ngayo+ bese bathandaza+ kuJehova baqale edorobheni olikhethileko+ begodu baqale endlini engiyakhele igama lakho,+ 45 kwanga ungezwa umthandazwabo usezulwini nesibawo sabo somusa ubasize.

46 “Nangabe bayakonela (ngombana akunamuntu ongoniko),+ bese uvuthe ngelaka ngebanga labo, ubalahlele enabeni, abathumbi babo babathumbele enarheni yenaba, kude namkha eduze;+ 47 bese bayaqaquluka enarheni abathunjelwe+ kiyo, babuyele kuwe,+ babawe umusakho basenarheni yabathumbi babo,+ bathi, ‘Sonile begodu senze okumbi; senze ubukhohlakali,’+ 48 bese babuyele kuwe ngeenhliziyo+ zabo zoke nangomphefumulwabo* woke enarheni yamanaba abathumbileko, bathandaze kuwe baqale inarhabo oyinikele abakhokho babo nedorobho olikhethileko nendlu engiyakhele igama lakho,+ 49 nje-ke usezulwini, indawo ohlala kiyo,+ sibawa uzwe umthandazwabo nesibawo sabo somusa ubasize, 50 ulibalele abantu bakho abakoneleko, ulibalele yoke imitjhapho abayenze kuwe. Uzobenza batlhuwise phambi kwabathumbi babo begodu bazobarhawukela+ 51 (ngombana babantu bakho, ilifa lakho,+ labo owabakhupha eGibhide,+ ekehleni yomlilo wokuncibilikisa isimbi).+ 52 Kwanga amehlwakho angabona isibawo somusa+ sencekwakho nesibawo somusa esenziwa babantu bakho u-Israyeli ngokubalalela nanyana kunini nabakubizako.+ 53 Ngombana wena wabakhetha bona babe lilifa lakho hlangana nabo boke abantu ephasini,+ njengombana wabikezela ngoMosi incekwakho nawukhupha abokhokho bethu eGibhide, Maye! Kosi ePhakemeko Jehova.”

54 Msinyana ngemva kobana uSolomoni sele aqede ukuthandaza kuJehova nokubawa umusa, wasikima phambi kwe-aldara lakaJehova, lapho ebekaguqe khona izandla zakhe zilulekele ezulwini.+ 55 Ngemva kwalokho, wasikima wabusisa loke ibandla lakwa-Israyeli ngelizwi elikhulu, wathi: 56 “Akadunyiswe uJehova, onikele abantu bakhe u-Israyeli indawo yokuphumula, njengombana athembisa.+ Alikho nalinye ilizwi hlangana nazo zoke iinthembiso zakhe ezihle azenza ngoMosi incekwakhe elingazange liphumelele.+ 57 Kwanga uJehova uZimethu angaba nathi njengombana bekanabokhokho bethu.+ Angasilahli namkha asihloboke.+ 58 Kwanga angatjhideza iinhliziyo zethu kuye,+ bona sikhambe kizo zoke iindlela zakhe begodu silalele imiyalwakhe, iinqophiso zakhe nezahlulelo zakhe, ayala abokhokho bethu bona bazilalele. 59 Godu kwanga amezwami wokubawa umusa la engincenge ngawo uJehova angaba seduze kwakaJehova uZimethu imini nobusuku bona enzele incekwakhe nabantu bakhe u-Israyeli ubulungiswa ngokwalokho abakutlhoga qobe langa, 60 bonyana zoke iintjhaba zephasi zazi ukuthi uJehova unguZimu weqiniso.+ Akekho omunye!+ 61 Yeke iinhliziyo zenu azizinikele ngokupheleleko+ kuJehova uZimethu ngokukhamba eenqophisweni zakhe nangokulalela imiyalwakhe njengombana kunjalo namhlanjesi.”

62 Nje-ke ikosi no-Israyeli woke benzela uJehova umhlatjelo omkhulu.+ 63 USolomoni wanikela ngemihlatjelo+ yetjhebiswano kuJehova: Wanikela ngeenkomo ezizii-22 000 nezimvu ezizii-120 000. Ngokunjalo-ke ikosi nama-Israyeli woke avula indlu kaJehova.+ 64 Ngelangelo kwatlhogeka bona ikosi icwengise indawo ephakathi yesirhodlo esiphambi kwendlu kaJehova ngombana bekufuze ayinikele lapho imihlatjelo etjhiswako, iminikelo yeenthoro nomhlwehlwe wemihlatjelo yetjhebiswano ngombana i-aldara lekhopha+ eliphambi kwakaJehova belilincani khulu bona lingamumatha iminikelo etjhiswako, iminikelo yeenthoro nomhlwehlwe+ wemihlatjelo yetjhebiswano. 65 Ngesikhatheso uSolomoni wenza umnyanya+ no-Israyeli woke, ibandla elikhulu kusukela eLebo-Rhamathi* kwehle bekuyokufika emRhobeni* weGibhide,+ phambi kwakaJehova uZimethu amalanga ali-7 ngemva kwalokho kwaba ngamanye amalanga ali-7, kwaba malanga ali-14 sewawoke. 66 Ngelanga elilandelako,* waphadlhalaja abantu, babusisa ikosi babuyela emakhabo bathabile begodu bathabe khulu eenhliziyweni ngebanga labo boke ubuhle+ uJehova abenzele uDavida incekwakhe nabantu bakhe u-Israyeli.