Eksodusi
18 UJetero umphristi wakwaMidiyani, umukhwe kaMosi+ wezwa ngakho koke uZimu akwenzele uMosi nabantu bakhe u-Israyeli nokuthi uJehova uwakhuphe njani ama-Israyeli eGibhide.+ 2 UJetero umukhwe kaMosi wathatha uTsiphora umkaMosi ngesikhathi abuyiselwe kuye, 3 wathatha namadodanakhe amabili.+ Enye bekunguGeritjhomu*+ ngombana uMosi wathi: “Ngibe mumuntu ovela kwenye inarha,” 4 enye wayithiya wathi ngu-Eliyezeri* ngombana wathi: “UZimu kababa umsizami, ungisindise esabuleni kaFaro.”+
5 Nje-ke uJetero umukhwe kaMosi wakhamba namadodana kaMosi nomkaMosi baya kuMosi emmangweni lapha bekahlome khona amatende entabeni kaZimu weqiniso.+ 6 Wathumela ilizwi kuMosi wathi: “Mina Jetero umukhwe wakho+ ngiza kuwe nomkakho namadodanakhe amabili.” 7 Khonokho uMosi waphuma wayokuhlangabeza umukhwe wakhe, waguqa bewammanga. Yeke babuzana amavuko ngemva kwalokho bangena ngetendeni.
8 UMosi watjela umukhwe wakhe koke uJehova akwenze kuFaro neGibhide ngebanga lama-Israyeli+ nangabo boke ubudisi abaqalana nabo endleleni,+ nendlela uJehova abasindisa ngayo. 9 UJetero wathaba nakezwa ngokuhle uJehova akwenzele ama-Israyeli ngokuwatjhaphulula eGibhide. 10 UJetero wathi: “Akadunyiswe uJehova onisindise eGibhide nakuFaro nosindise abantu ekulawulweni yiGibhide. 11 Nje sengiyazi ukuthi uJehova mkhulu kunabo boke abanye abozimu+ ngombana uvikele abantu bakhe emanabeni azikhakhazisako.” 12 Ngemva kwalokho uJetero umukhwe kaMosi weza nomnikelo otjhiswako nemihlatjelo kaZimu, u-Aroni nabo boke abadala bakwa-Israyeli beza bazokudla nomukhwe kaMosi phambi kwakaZimu weqiniso.
13 Ngelanga elilandelako uMosi wahlala phasi njengemhleni bona ahlulele abantu begodu abantu bebasolo bajamile phambi kwakaMosi, kusukela ekuseni bekwaba ntambama. 14 Umukhwe kaMosi nakabona koke lokho uMosi akwenzela abantu wathi: “Kubayini wenza ngendlela le? Kubayini usolo uhlezi wenza umsebenzi lo uwedwa begodu abantu basolo beza kuwe bajame phambi kwakho kusukela ekuseni bekube sentambama?” 15 UMosi wathi kumukhwe wakhe: “Kungombana abantu basolo beza kimi bazokubuza kuZimu. 16 Nakuba nomlandu uza kimi, mina-ke kufuze ngahlulele ukuthi ngubani onganamlandu ngemva kwalokho ngibatjele umthetho kaZimu weqiniso.”+
17 Umukhwe kaMosi wathi kuye: “Ayisiyihle into oyenzako le. 18 Kwamambala uzokudinwa, wena nabantwaba ngombana umthwalo lo mkhulukhulu kuwe begodu angeze wakghona ukuwuthwala uwedwa. 19 Nje-ke ngilalela, ngizokweluleka begodu uZimu uzokuba nawe.+ Uzokuba mkhulumeli wabantu phambi kwakaZimu weqiniso+ begodu uzokuletha imilandu kuye.+ 20 Kufuze ubayelelise ngeenqophiso nangemithetho+ begodu ubatjele indlela ekufuze bakhambe ngayo nomsebenzi okufuze bawenze. 21 Nje-ke kufuze ukhethe hlangana nabantu amadoda anekghono,+ asaba uZimu, athembekileko, angazifuneli inzuzo+ bewuwabeke bona abe ziinduna zeenkulungwana, zamakhulu, zamatjhumi amahlanu nezamatjhumi.+ 22 Kufuze bahlulele abantu nakunemilandu, kuzakuthi emikhulu bayilethe kuwe+ kodwana emincani bazakuqunta. Zenzele kube bulula, ngokwabelana nabo umthwalo.+ 23 Nawenza lokho begodu wenza ngokuvumelana nomyalo kaZimu uzokukghona ukuthwala umthwalo begodu woke umuntu uzokubuyela ekhaya anelisekile.”
24 UMosi akhenge ariyade ukulalela umukhwe wakhe, wenza koke amtjele khona. 25 Nje-ke wakhetha amadoda anekghono kwa-Israyeli, wawabeka bona aphathe abantu abaziinduna zeenkulungwana, zamakhulu, zamatjhumi amahlanu nezamatjhumi. 26 Ahlulela abantu nakuvela imilandu, bekuthi nakuvela imilandu ebudisi bayilethe kuMosi+ kodwana emincani bebayahlulela. 27 Ngemva kwalokho uMosi walayelisa umukhwe wakhe+ bewakhamba.