Eksodusi

39 Bathunga izambatho zokulotjha endaweni ecwengileko ngerhara ehlaza komkayi, iwulu esipiridzana netjhila elibomvu be.+ Bathunga izambatho ezicwengileko zaka-Aroni+ njengombana uJehova ayala uMosi.

2 Wenza i-efodi+ ngegolide, ngerhara ehlaza komkayi, iwulu esipiridzana, itjhila elibomvu be nelineni elisezingeni eliphezulu. 3 Bakhanda igolide laba sipara, balisika laba ziinrhara bazihlanganisa nerhara ehlaza komkayi, iwulu esipiridzana, itjhila elibomvu be nelineni elisezingeni eliphezulu. Bazithungelela etjhileni lelineni. 4 Benza amatjhila amabili, langaphambili nelangemva bawahlanganisa emahlombe. 5 Ibhande ledinini ebelithungelelwe phezu kwe-efodi ukwenzela bona ihlale kuhle,+ belenziwe ngezinto ezifanako, ngegolide, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu njengombana uJehova ayala uMosi.

6 Bafaka amatje we-oniksi ngeensekelweni zegolide, bagobhodlha kizo amagama wamadodana ka-Israyeli njengalokha nakugobhodlhwa itshwayo.+ 7 Wawabeka phezu kwamatjhila amabili asemahlombe we-efodi bona abe mamatje wesikhumbuzo wamadodana ka-Israyeli+ njengombana uJehova ayala uMosi. 8 Nje-ke wathunga isikhwanyana esisesifubeni+ njengombana bekuthungwe i-efodi, wasithunga ngegolide, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu.+ 9 Isikhwanyana esisesifubeni nasibhinciweko besilingana mahlangothi woke, besingaba masentimitha* ama-22.2 ubude namasentimitha ama-22.2 ububanzi. 10 Benza amarhemo amane wamatje. Erhemweni lokuthoma bekuyirubi, ithophazi ne-emeraldi. 11 Erhemweni lesibili bekusimaragidu, isafire nejasiperi. 12 Erhemweni lesithathu bekuyiletjhemu,* i-agade ne-amethisti. 13 Erhemweni lesine bekunekhrisolithe, i-oniksi nejayide. Bewenzelwe iinsekelo zegolide. 14 Amatje bewakhambisana namagama wamadodana ka-Israyeli ali-12 begodu amagama lawo bewatlolwe ngokugobhodlhwa njengalokha nakugobhodlhwa itshwayo. Igama ngalinye belijamele ikoro yinye eenkorweni ezili-12.

15 Ngemva kwalokho, baphotha iintambo ngegolide elihlwengileko, bazinamathisela esikhwanyaneni esisesifubeni.+ 16 Benza iinsekelo ezimbili ngegolide namasongo amabili wegolide bafaka amasongo amabili lawo emakhoneni amabili wesikhwanyana esisesifubeni. 17 Ngemva kwalokho, bafaka iintambo ezimbili zegolide emasongweni amabili asemakhoneni wesikhwanyana esisesifubeni. 18 Bafaka iintambo ezimbilezo eensekelweni ezimbili bazihlanganisa namatjhila amabili we-efodi asemahlombe ngaphambili. 19 Ngemva kwalokho, benza amasongo amabili wegolide bawafaka emakhoneni amabili ngaphakathi emphethweni wesikhwanyana esisesifubeni ahlanu kwe-efodi.+ 20 Ngemva kwalokho benza amanye amasongo amabili wegolide bawafaka lapho ibhande lihlangana khona ne-efodi, ngaphambili kwe-efodi ngenzasana kwamatjhila amabili asemahlombe ngaphezudlwana kwebhande ledinini. 21 Emaswapheleni bathatha intambo ehlaza komkayi bayibophelela emasongweni wesikhwanyana esisesifubeni yaya emasongweni we-efodi, lokhu kwenza bona isikhwanyana esisesifubeni sihlale kuhle e-efodini ngaphezudlwana kwebhande ledinini njengombana uJehova ayala uMosi.

22 Wenza ijasi enganamikhono embathwa ngaphasi kwe-efodi, wayenza ngerhara ehlaza komkayi.+ 23 Phakathi naphakathi bekunentamo lapho kungena khona ihloko. Lapha kuvuleke khona kufuze kube nomphetho, umphetho loyo bewuthungwe njengomphetho wejasi yamasotja ukwenzela bona ungadabuki. 24 Ngemva kwalokho, benza umhlobiso emphethweni wejasi engamikhono ubumbeke njengamarharinada, bahlanganisa irhara ehlaza komkayi, iwulu esipiridzana netjhila elibomvu be. 25 Benza iinsimbi ngegolide elihlwengileko bazifaka emphethweni hlangana namarharinada; 26 bezilandelana isimbi nerharinada, isimbi nerharinada, njalonjalo magega nomphetho wejasi enganamikhono ebeyisetjenziselwa ukulotjha njengombana uJehova ayala uMosi.

27 Bathungela u-Aroni namadodanakhe iimphuraphura ngelineni elisezingeni eliphezulu,+ 28 itjhila elithwalwa ehloko+ lelineni elisezingeni eliphezulu, iingwani ezihlotjisiweko+ zelineni elisezingeni eliphezulu, amabhrugwana welineni+ elisezingeni eliphezulu, 29 amabhande akghatjisiweko enziwe ngelineni elisezingeni eliphezulu elihlanganiswe nerhara ehlaza komkayi, iwulu esipiridzana netjhila elibomvu be njengombana uJehova ayala uMosi.

30 Emaswapheleni, benza isinjana emanyazelako ngegolide elihlwengileko, itshwayo elitjengisa ukuthi u-Aroni uzinikele kuZimu balitlola njengalokha nakugobhodlhwa itshwayo, lithi: “Ukucwengeka ngekwakaJehova.”+ 31 Bayibophelela etjhileni elithwalwa ehloko ngerhara ehlaza komkayi njengombana uJehova ayala uMosi.

32 Nje-ke woke umsebenzi ebewenziwa ethaberinakeli netendeni lokuhlangana waphela begodu ama-Israyeli enza koke uJehova akuyala uMosi.+ Enza njalo.

33 Yeke aletha kuMosi ithaberinakeli,+ itende+ nazo zoke iinsetjenziswa zalo: Iinghamelo,+ amafremu,+ iinqabo,+ iinsika, iinsekelo;+ 34 iingubuzeso zethaberinakeli okuziinkhumba zamaramu ezidaywe ngokubomvu,+ iinkhumba zesili,* irharideni eliphambi komfaji;+ 35 umfaji wobuFakazi, iingodo zawo+ nesivalo sawo;+ 36 itafula nazo zoke izitja zalo+ noburotho bombukiso; 37 ilithi lesibani elenziwe ngegolide elihlwengileko, iimbani zalo,+ irhemo leembani nazo zoke izitja zalo+ namafutha wokukhanyisa;+ 38 i-aldara+ legolide, amafutha wokuzesa,+ ipepho enuka kamnandi,+ irharideni+ lebungenweni betende; 39 i-aldara lekhopha+ nesefalo yekhopha, iingodo zalo,+ zoke izitja zalo,+ isitja sokuhlambela nesisekelo saso;+ 40 amarharideni wesirhodlo, iinsika zaso neensekelo zaso,+ irharideni+ lebungenweni besirhodlo, iintambo zetende neenkhonkhwani+ nazo zoke izitja zomsebenzi ebewenziwa ethaberinakeleni okulitende lokuhlangana; 41 izambatho ezithungwe kuhle zokusebenza endaweni ecwengileko, izambatho ezicwengileko zaka-Aroni umphristi+ nezambatho zamadodanakhe zokuba baphristi.

42 Ama-Israyeli enza woke umsebenzi ngokwendlela uJehova ebekayala ngayo uMosi.+ 43 UMosi nakahlola umsebenzi owenziwe ma-Israyeli, wabona ukuthi wenziwe ngendlela uJehova ayala ngayo, uMosi wawabusisa.