Hezekiyeli
17 Ilizwi lakaJehova lafika kimi godu, lathi: 2 “Ndodana yomuntu, yenza isirarejo begodu utjho isaga ngendlu ka-Israyeli.+ 3 Kufuze utjho lokhu, ‘Nakhu iKosi ePhakemeko uJehova ekutjhoko: “Ikhozi elikhulu,+ elinamaphiko amakhulu, amaphiko amade nazeleko, namaphiko anemibalabala, leza eLibhanoni+ lathatha isitlhori somsedari.+ 4 Laruthula ihlumela eliphezulu laliletha enarheni yabathengisi begodu lalibeka edorobheni labathengisi.*+ 5 Ngemva kwalokho, lathatha enye ingcenye yembewu yenarha.+ Layitjala esimini enothileko. Layitjala njengomuthi womdubi hlanu kwamanzi amanengi. 6 Yatlhurha yaba mumuthi omfitjhani, umuthi wamadiribe onabako+ amakarawo aqale ngaphakathi begodu imirabhawo ikhulela ngaphasi. Waba sidiribe waveza amahlumela begodu wanabisa iimpande zawo.+
7 “‘“Kwaba nelinye ikhozi elikhulu,+ elinamaphiko amakhulu begodu amade.+ Isidiribesi sazimisela ukululela imirabhaso ngakilo, kude nalapha sitjalwe khona begodu sanabisela amakaraso ngakilo bona silithelelele.+ 8 Besele sitjalwe esimini ehle hlanu kwamanzi amanengi, bona siveze iimpande, siveze iinthelo, begodu sibe sidiribe esikhulu.”’+
9 “Ithi, ‘Nakhu iKosi ePhakemeko uJehova ekutjhoko: “Kghani sizokuphumelela? Kghani akunamuntu ozokuruthula imirabhaso+ enze iinthelo zaso zibole begodu enze amahlumelaso atjhwabe?+ Sizokoma kere kangangobana akunamkhono onamandla namkha abantu abanengi abazokutlhogeka bona baruthule imirabhaso. 10 Ngitjho nanyana sitjalwa kabutjha, inga-kghani sizokuphumelela? Angekhe na, some kere nakufika umoya wepumalanga usiphephule? Sizokoma lapha sitjalwe khona, lapha sihlume khona.”’”
11 Ilizwi lakaJehova lafika kimi godu, lathi: 12 “Ngibawa utjele indlu ehlubukako uthi, ‘Kghani aniboni na ukuthi izintwezi zitjho ukuthini?’ Itjele ukuthi, ‘Qalani! Ikosi yeBhabhiloni ize eJerusalema yathatha ikosayo namakhosanayo yabuyela nawo emuva eBhabhiloni.+ 13 Ngaphezu kwalokho, yathatha esinye sesizukulwana sebukhosini+ yenza naso isivumelwano begodu yasifungisa.+ Ngemva kwalokho yathatha amadoda adumileko wenarha,+ 14 bona umbuso wehliswe, ungakghoni ukuphakama, umbuso uzokuhlala ukhona+ kwaphela nange abantu bakwa-Israyeli baphetha isivumelwano. 15 Kodwana emaswapheleni ikosi* yahlubuka kiyo*+ ngokuthumela iinthunywa eGibhide bona ziyokuthatha iinjomani+ nebutho elikhulu kibo.+ Kghani izokuphumelela? Kghani owenza izintwezi uzokuphunyurha esijezisweni? Kghani angasiphula isivumelwano nanyana kunjalo aphunyurhe?’+
16 “‘“Nangisaphilako,” kutjho iKosi* ePhakemeko uJehova, “izokuhlongakalela eBhabhiloni, lapho kuhlala khona ikosi emenze ikosi,* njengombana idelele isifungo sayo yaphula nesivumelwano sayo.+ 17 Ibutho elikhulu namasotja amanengi kaFaro angekhe abe lisizo epini,+ lokha iindunduma zokuvimbezela ziphakanyisiwe kwakhiwa namaboda bona kutjhatjalaliswe ukuphila okunengi. 18 Idelele isifungo yaphula isivumelwano. Ngitjho nanyana ithembisile, izenze zoke izintwezi begodu angekhe iphunyurhe.”’
19 “‘Nakhu iKosi ePhakemeko uJehova ekutjhoko: “Nangisaphilako, ngizoyijezisa ngokudelela isifungo sami+ nokuphula isivumelwano sami. 20 Ngizokuphosela inedami kiyo, izokubanjwa yinedami yokuzuma.+ Ngizoyiletha eBhabhiloni ngiyingenise esahlulelweni ngingene nayo esahlulelweni lapho ngebanga lokungathembeki ekwenzileko ngokujamelene nami.+ 21 Boke ababaleki bamasotjakhe bazokuwa ngesabula, labo abaseleko bazokurhatjhekela mahlangothi woke.+ Kuzokufuze bazi bona mina Jehova ngikhulumile.”’+
22 “‘Nakhu iKosi ePhakemeko uJehova ekutjhoko: “Ngizokuthatha ihlumela phezu komuthi omude womsedari,+ ngilitjale phezu kwamahlumelawo ngizokubeka ihlumela elithambileko,+ mina ngizolitjala endaweni ephakemeko entabeni ephezulu.+ 23 Ngizolitjala entabeni ephakemeko ka-Israyeli; amakaralo azokukhula, athele iinthelo ube mumuthi womsedari omkhulu. Yoke imihlobo yeenyoni izokuphila ngaphasi kwawo ihlale emithunzini wamakarawo. 24 Yoke imithi esimini kuzokufuze yazi bona mina, Jehova, ngigawule umuthi omkhulu ngaphakamisa umuthi ebewuphasi;+ ngomise umuthi ohlaza bengenza umuthi owomileko watlhurha.+ Mina Jehova ngikhulumile begodu ngenzile.”’”