USamyela Wokuthoma
10 Nje-ke uSamyela wathatha umjeka wamafutha wawathela ehloko kaSawula.+ Wamncwanga wathi: “UJehova akakakuzesi na bona ube mrholi+ welifa lakhe?+ 2 Nawuhlukana nami namhlanjesi, uzokufumana amadoda amabili eduze nethuna lakaRarheli+ esifundeni sakwaBhenjamini eTselitsarha, azokuthi kuwe, ‘Abodumbana egade uyobafuna bafunyenwe kodwana uyihlo sekakhohliwe ngabodumbana+ begodu utshwenyeke ngani. Uthi: “Ngizakubona ngenzeni ngendodanami?”’ 3 Dlula lapho bewuyokufika emthini omkhulu weTabori, lapho uzokuhlangana namadoda amathathu akhuphukela kuZimu weqiniso eBhetheli,+ enye izabe iphethe iimbuzana ezintathu, enye iphethe uburotho obuthathu begodu enye izabe iphethe umjeka omkhulu wewayini. 4 Azokubuza amavuko akunikele noburotho obubili, kufuze ubuthathe uburothobo. 5 Ngemva kwalokho, uzokufika embundwini kaZimu weqiniso, lapho kunekampa yamajoni wamaFilista khona. Nawufika edorobheni, uzokuhlangana nesiqhema sabaphorofidi sehla sivela endaweni ephakemeko, phambi kwaso kuzabe kudlalwa iinliliso zesinara, abosotjherere, ifuludi neharibha njengombana siphorofida. 6 Ummoya kaJehova uzokupha amandla,+ uzokuphorofida kunye naso begodu uzokutjhugululwa ube mumuntu ohlukileko.+ 7 Nakwenzeka amatshwayo la, yenza nanyana yini okghona ukuyenza, ngombana uZimu weqiniso unawe. 8 Ngemva kwalokho, khamba wehlele eGiligali,+ mina ngizokulandela lapho ngizokwenza imihlatjelo yokutjhiswa nemihlatjelo yetjhebiswano. Kufuze ulinde amalanga alikhomba bengifike. Ngemva kwalokho, ngizokutjela bona wenzeni.”
9 Kwathi msinyana uSawula nakaphendukako bona atjhiye uSamyela, uZimu wathoma ukutjhugulula ihliziywakhe bona ifane neyomunye umuntu begodu woke amatshwayo la azaliseka ngelangelo. 10 Yeke basuka lapho batjhinga embundwini, wahlangana nesiqhema sabaphorofidi. Khonokho ummoya kaZimu wamupha amandla+ wathoma ukuphorofida+ hlangana naso. 11 Kwathi boke ebebamazi phambilini, nabambona aphorofida nabaphorofidi, babuzana bathi: “Kwenzekeni endodaneni kaKhitjhi? Kghani noSawula sekangomunye wabaphorofidi?” 12 Yeke indoda evela lapho yathi: “Kodwana ngubani ubababo?” Ngalokho kwaba sisitjho* ukuthi: “Kghani noSawula sekangomunye wabaphorofidi?”+
13 Nakaqeda ukuphorofida, waya endaweni ephakemeko. 14 Ngokukhamba kwesikhathi, umfowabo kayise kaSawula wathi kuye nomsizakhe: “Beniyephi?” USawula waphendula: “Besiyokufuna abodumbana,+ kodwana sathi nasibona ukuthi abekho lapho, satjhinga kuSamyela.” 15 Umfowabo kayise kaSawula wathi kibo: “Ngibawa ningitjele, utheni uSamyela kini?” 16 USawula wamphendula wathi: “Usitjele ukuthi abodumbana sebafunyenwe.” Kodwana uSawula azange ayiphathe indaba yobukhosi ekhulunywe nguSamyela.
17 USamyela wabiza abantu bona bahlangane eMitsipha phambi kwakaJehova+ 18 bewathi kuma-Israyeli: “UJehova uZimu ka-Israyeli uthi: ‘Ngimi owakhuphula u-Israyeli bona aphume eGibhide, owanisindisa esandleni seGibhide+ nesandleni sayo yoke imibuso ebeyinigandelela. 19 Kodwana namhlanjesi nimalile uZimenu+ obekamSindisenu kibo boke ubumbi nokugandeleleka kwenu begodu nithe: “Awa, kufuze usibekele ikosi.” Nje-ke jamani phambi kwakaJehova ngokweentjhaba zenu nangokweenkulungwana zenu.’”
20 Nje-ke uSamyela wabiza zoke iintjhaba zakwa-Israyeli,+ kwakhethwa isitjhaba sakwaBhenjamini.+ 21 Yeke wabiza isitjhaba sakwaBhenjamini ngokwemindenaso, kwakhethwa umndeni kaMatri. Ekugcineni kwakhethwa uSawula indodana kaKhitjhi.+ Kodwana nabayomfuna, azange bamfumane. 22 Yeke babuza uJehova+ bathi: “Umuntu lo sekafikile na?” UJehova waphendula wathi: “Nanguya, uzifihle hlangana nemithwalo.” 23 Nje-ke bagijima bayomthatha lapho. Nakajame hlangana nabantu, bekamude kunabo boke abantu kusukela emahlombe ukuya phezulu.+ 24 USamyela wathi kibo boke abantu: “Niyambona na loyo okhethwe nguJehova,+ ukuthi akekho onjengaye ebantwini boke?” Boke abantu barhuwelela bathi: “Bayede kosi!”
25 USamyela wahlathululela abantu ilungelo lamakhosi,+ wakutlola encwadini begodu wayibeka phambi kwakaJehova. Ngemva kwalokho, uSamyela wakhambisa boke abantu, ngamunye waya endlinakhe. 26 NoSawula waya ekhabo eGibeya, aphekelelwa ziingorho uJehova azithinte iinhliziyo. 27 Kodwana amanye amadoda angazisiko athi: “Umrhali lo uzosisindisa njani?”+ Yeke amdelela, azange amlethele isipho.+ Nanyana kunjalo yena azange atjho litho ngalokho.