Yesibili YeenKronike
11 Msinyana uRerhobhowamu nakafika eJerusalema, wabuthelela indlu kaJuda noBhenjamini,+ iingorho ezibanduliweko* ezizii-180 000, bona ziyokulwa no-Israyeli ukuze zibuyisele umbuso kuRerhobhowamu.+ 2 Ngemva kwalokho, ilizwi lakaJehova lafika kuTjhemaya+ umuntu kaZimu weqiniso, lathi: 3 “Tjela uRerhobhowamu indodana kaSolomoni ikosi yakwaJuda no-Israyeli woke kwaJuda nakwaBhenjamini uthi, 4 ‘Ngilokhu uJehova akutjhoko: “Ningakhuphuki niyokulwa nabafowenu. Ngamunye wenu akabuyele endlinakhe ngombana ngimi obangele bona lokhu kwenzeke.”’”+ Yeke balilalela ilizwi lakaJehova babuyela emva, akhenge basakhuphuka bayokulwa noJerobhowamu.
5 URerhobhowamu wahlala eJerusalema, wakha namadorobho anemithangala kwaJuda. 6 Yeke wavuselela* iBhetlehema,+ i-Ethamu, iTekhowa, 7 iBhethe-Tsuri, iSoko,+ i-Adulamu,+ 8 iGathi,+ iMaretjha, iZifu,+ 9 i-Adorayimu, iLakitjhi,+ i-Azekha,+ 10 iTsora, i-Ayaloni+ neRhebroni,+ amadorobho anemithangala ebewakwaJuda nakwaBhenjamini. 11 Godu waqinisa iindawo ezinemithangala, wabeka neenduna kizo wazinikela ukudla, amafutha newayini, 12 wanikela nawo woke amadorobho ahlukahlukeneko iinhlangu ezikulu nemikhonto; wawaqinisa kwamambala. UJuda noBhenjamini bahlala bangebakhe.
13 Abaphristi namaLevi ebebakizo zoke iindawo zakwa-Israyeli bathatha ihlangothi lakhe, baphuma kizo zoke iindawo zabo. 14 AmaLevi atjhiya amadlelwawo nezinto zawo+ eza kwaJuda neJerusalema ngombana uJerobhowamu namadodanakhe bawaqotha emsebenzinawo wokuba baphristi bakaJehova.+ 15 Ngemva kwalokho, uJerobhowamu wazibekela bakhe abaphristi beendawo eziphakamileko,+ bamadimoni anjengembuzi*+ nebamakonyana awenzileko.+ 16 Yeke labo abavela kizo zoke iinkoro zakwa-Israyeli, ebebazimisele eenhliziyweni zabo ukufuna uJehova uZimu ka-Israyeli, babalandela eJerusalema bayokwenza imihlatjelo kuJehova uZimu wabokhokho babo.+ 17 Iminyaka emithathu yoke baqinisa ubukhosi bakwaJuda bese basekela uRerhobhowamu indodana kaSolomoni ngombana bakhambe endleleni kaDavida noSolomoni iminyaka emithathu.
18 Ngemva kwalokho, uRerhobhowamu watjhada noMarhalathi indodakazi kaJerimothi oyindodana kaDavida. Unina lakaMarhalathi bekungu-Abihayili indodakazi ka-Eliyabu oyindodana kaJese.+ 19 Ngokukhamba kwesikhathi baba namadodana: UJewutjhi, uTjhemariya noZahamu. 20 Ngemva kwakhe, watjhada noMaka umzukulwana ka-Absalomu.+ Ngokukhamba kwesikhathi baba nabantwana okungu-Abhiya,+ u-Atayi, uZiza noTjhelomithi. 21 URerhobhowamu bekathanda uMaka umzukulwana ka-Absalomu khulu ukudlula boke abanye abafazi bakhe namakhohlwakhe,+ ngombana watjhada nabafazi abali-18 namakhohlo ama-60, godu waba namadodana ama-28 namadodakazi ama-60. 22 Yeke uRerhobhowamu wabeka u-Abhiya indodana kaMaka bona abe yihloko nomdosiphambili hlangana nabafowabo ngombana bekafuna ukumenza ikosi. 23 Nanyana kunjalo, wenza ngokuhlakanipha,* waphadlhalaja* amanye wamadodanakhe kizo zoke iimfunda zakwaJuda nezakwaBhenjamini, kiwo woke amadorobho anemithangala,+ wawanikela inala yokudla, wawathathela nabafazi abanengi.