IsAmbulo Esiya KuJwanisi
21 Ngabona izulu elitjha nephasi elitjha+ ngombana izulu laphambilini nephasi laphambilini kudlulile+ nelwandle+ alisekho. 2 Godu ngabona idorobho elicwengileko, iJerusalema eliTjha, lehla livela ezulwini kuZimu+ lilungiswe njengomakoti ahlotjiselwe indodakhe.+ 3 Ngalokho ngezwa ilizwi elikhulu livela esihlalweni sobukhosi lithi: “Qala! Itende lakaZimu lihlangana nabantu, uzokuhlala nabo, bona bazokuba babantu bakhe. UZimu ngokwakhe uzokuba nabo.+ 4 Uzokusula zoke iinyembezi emehlwenabo,+ ukufa angekhe kusaba khona+ namkha isizi namkha ukulila namkha ubuhlungu angekhe kusaba khona.+ Izinto zaphambilini zidlulile.”
5 Loyo ohlezi esihlalweni sobukhosi+ wathi: “Qala! Ngenza zoke izinto zibe zitjha.”+ Godu wathi: “Tlola ngombana amezwi la athembekile begodu aliqiniso.” 6 Wathi kimi: “Sewenzekile! Ngingu-Alfa no-Omega,* isithomo nesiphetho.+ Nanyana ngubani owomileko ngizomnikela amanzi emthonjeni wokuphila ngesihle.+ 7 Nanyana ngubani ohlulako uzokuzuza izintwezi njengelifa begodu ngizokuba nguZimakhe yena abe yindodanami. 8 Kodwana amatjhatjha, abangakholwako,+ abanyenyisako ekusilaphaleni kwabo, ababulali,+ abaziphatha kumbi ngokomseme,*+ abenza ubungoma, abalotjha iinthombe nabo boke abaleya amala,+ isabelo sabo sizokuba selitsheni elivutha umlilo nesibabuli.+ Lokhu kutjho ukufa kwesibili.”+
9 Enye yeengilozi ezilikhomba eziphethe izitja ezilikhomba ebezizele iimbetho ezilikhomba zamaswaphela+ yeza kimi yathi: “Yizapha, ngizokutjengisa umakoti, umfazi weMvana.”+ 10 Nje-ke yangithatha ngamandla wommoya yangisa entabeni ekulu ephakemeko, yangitjengisa idorobho elicwengileko iJerusalema lehla livela ezulwini kuZimu+ 11 linephazimulo kaZimu.+ Ukuphazimula kwalo bekunjengelitje eliligugu khulu, njengelitje lejasiperi elimanyazela njengekristalu elikhanyako.+ 12 Belineboda elikhulu eliphakemeko begodu linamasango ali-12 neengilozi ezili-12 emasangweni begodu emasangweni lawo bekutlolwe amagama weenkoro ezili-12 zabantwana bakwa-Israyeli. 13 Epumalanga bekunamasango amathathu, etlhagwini bekunamasango amathathu, esewula bekunamasango amathathu netjingalanga bekunamasango amathathu.+ 14 Iboda ledorobho belinesisekelo samatje ali-12 begodu kiwo bekunamagama ali-12 wabapostoli abali-12+ beMvana.
15 Nje-ke loyo ebekakhuluma nami bekaphethe umhlanga wegolide njengesilinganiso bona alinganise idorobho namasangwalo neboda lalo.+ 16 Idorobho belisikwere, ubude balo bebulingana nobubanzi balo. Walinganisa idorobho ngomhlanga laba mastadiyu azii-12 000;* ubude, ububanzi nokuphakama kwalo bekulingana. 17 Walinganisa neboda lawo, laba makhubhithi ali-144* ngokwesilinganiso somuntu, ngesikhathi esifanako isilinganiso sengilozi. 18 Ibodelo belenziwe ngejasiperi,+ idorobho beliyigolide ecwengileko njengerhalasi elikhanyako. 19 Iinsekelo zeboda ledorobho bezihlotjiswe ngayo yoke imihlobo yamatje aligugu: isisekelo sokuthoma besiyijasiperi, sesibili siyisafire, sesithathu siyikhalkedoni, sesine siyi-emeraldi, 20 sesihlanu siyisaridoniksi, sesithandathu siyisaridiyu, sekhomba siyikhrisolithe, sobunane siyibherili, sethoba siyithophazi, setjhumi siyikhrisoprasi, setjhumi nanye siyihiyasinti, setjhumi nambili siyi-amethisi. 21 Godu amasango ali-12 bewamaparele; isango ngalinye belenziwe ngeparele linye. Indlela ekulu yedorobho beyiligolide elicwengileko, njengerhalasi elikhanyelako.
22 Akhenge ngibone ithempeli kilo ngombana uJehova* uZimu uMninimandla Woke+ ulithempeli lalo neMvana ingilo. 23 Idorobheli alitlhogi ilanga namkha inyezi bona ilikhanyisele ngombana iphazimulo kaZimu iyalikhanyisela,+ neMvana isibani salo.+ 24 Iintjhaba zizokukhamba ngokukhanya kwalo+ namakhosi wephasi azokuletha iphazimulo yawo kilo. 25 Amasangwalo angekhe avalwe emini ngombana ubusuku angeze bube khona.+ 26 Bazokuletha iphazimulo nedumo leentjhaba kilo.+ 27 Kodwana nanyana yini esilapheleko nananyana ngubani owenza okunyenyisako nokukhohlisako angekhe angene kilo;+ kuzokungena kwaphela labo abatlolwe emsongweni wokuphila weMvana.+