Yokuthoma YamaKhosi
13 Kwafika eBhetheli umuntu kaZimu+ avela kwaJuda, weza ngelizwi lakaJehova ngesikhathi uJerobhowamu ajame e-aldareni+ bona athunyise intuthu yomhlatjelo. 2 Warhuwelela ngelizwi elivela kuJehova ngokujamelene ne-aldara, wathi: “Maye! Aldara, maye! Aldara. Nakhu uJehova akutjhoko: ‘Qala! Kuzokubelethwa indodana emzini kaDavida igama layo nguJosiya!+ Uzokwenza umhlatjelo ngabaphristi beendawo eziphakemeko phezu kwakho, labo abathunyisa intuthu yomhlatjelo kuwe begodu uzokutjhisa amathambo wabantu kuwe.’”+ 3 Khona mhlokho wenza itshwayo, wathi: “Leli litshwayo uJehova alimemezeleko: Qala! I-aldara lizokuhlukana phakathi begodu umlotha* okilo uzokukghuthuka.”
4 Kuthe ikosi nayizwa amezwi akhulunywe mumuntu kaZimu weqiniso ngokujamelene ne-aldara eliseBhetheli, uJerobhowamu wathabulula isandla sakhe ase-aldareni, wathi: “Mbambeni!”+ Khonokho, isandla akhombe ngaso umuntu kaZimu somelela,* akhenge akghone ukusibuyisela emva.+ 5 Ngemva kwalokho, i-aldara lahlukana phakathi, umlotha egade use-aldareni wakghuthuka njengokwetshwayo elenziwe mumuntu kaZimu weqiniso ngelizwi lakaJehova.
6 Yeke ikosi yathi emuntwini kaZimu weqiniso: “Ngibawa ungincengele kuJehova uZimakho, ungithandazele bona isandla sami sibuyele esigeni.”+ Khonokho umuntu kaZimu weqiniso wancenga uJehova, isandla sekosi sabuyela esigeni. 7 Ikosi yathi emuntwini kaZimu weqiniso: “Khamba nami siye ekhaya, uzokufumana ukudla bese ngikuphe isipho.” 8 Kodwana umuntu kaZimu weqiniso wathi ekosini: “Ngitjho nanyana ungangipha isiquntu sezinto zakho, angeze ngakhamba nawe ngiyokudla uburotho namkha ngisele amanzi endaweni le. 9 Ngombana ilizwi lakaJehova lingiyale lathi: ‘Ungadli uburotho namkha usele amanzi begodu ungabuyeli emva ngendlela oze ngayo.’” 10 Nje-ke wakhamba ngenye indlela, akhenge abuyele emva ngendlela eze ngayo eBhetheli.
11 Bekunomphorofidi othileko osele aluphele ohlala eBhetheli, amadodanakhe afika ekhaya, amhlathululela koke okwenziwe mumuntu kaZimu weqiniso ngelangelo eBhetheli namezwi awakhulume ekosini. Ngemva kobana abikele uyise ngalokhu, 12 uyise wawabuza wathi: “Ukhambe ngayiphi indlela?” Amadodanakhe amtjengisa indlela umuntu kaZimu weqiniso ovela kwaJuda akhambe ngayo. 13 Nje-ke wathi emadodanenakhe: “Ngilungiselelani udumbana.” Bamlungiselela yena begodu wakhwela kuye.
14 Walandela umuntu kaZimu weqiniso, wamfumana ahlezi ngaphasi komuthi omkhulu. Wathi kuye: “Umumuntu kaZimu weqiniso ovela kwaJuda na?”+ Waphendula wathi: “Iye nginguye.” 15 Wathi kuye: “Asikhambe siye ekhaya uyokudla uburotho.” 16 Kodwana wathi kuye: “Angekhe ngikhambe nawe namkha ngamukele isimemo sakho namkha ngidle uburotho namkha ngisele nawe amanzi endaweni le. 17 Ngombana ilizwi lakaJehova lithe kimi, ‘Ungadli uburotho namkha usele amanzi lapho. Ungabuyeli emva ngendlela oze ngayo.’” 18 Umphorofidi nakezwa lokho wathi kuye: “Nami ngimphorofidi njengawe, ingilozi ingitjele ngelizwi lakaJehova yathi, ‘Mtjele abuyele nawe emzinakho bona ayokudla uburotho asele namanzi.’” (Wamkhohlisa.) 19 Nje-ke wabuyela naye emva bona ayokudla uburotho asele namanzi emzinakhe.
20 Kuthe basahlezi etafuleni, ilizwi lakaJehova lafika kumphorofidi omjikisileko, 21 warhuwelela umuntu kaZimu weqiniso ovela kwaJuda, wathi, “UJehova uthi: ‘Ngombana akhenge ulalele isinqophiso sakaJehova begodu akhenge uphethe umyalo uJehova uZimakho akunikele wona, 22 kodwana ubuyele emva wayokudla uburotho bewasela amanzi endaweni otjelwe ngayo ukuthi, “Ungadli uburotho namkha usele amanzi,” yeke isidumbu sakho angekhe sibulungwe emathuneni wabokhokho+ bakho.’”
23 Ngemva kokobana umuntu kaZimu weqiniso adle uburotho begodu asele amanzi, umphorofidi osele aluphele walungiselela umphorofidi amjikisileko udumbana. 24 Wakhamba kodwana kuthe asendleleni kwavela ibhubezi lambulala.+ Isidumbu sakhe sawela endleleni, udumbana wajama eqadi kwaso; ibhubezi nalo belijame eqadi kwesidumbu. 25 Bekunamadoda adlulako abona isidumbu siwele endleleni begodu eqadi kwaso kujame ibhubezi. Akhamba ayokubika edorobheni lalapha kuhlala khona umphorofidi osele aluphele.
26 Umphorofidi omjikisileko nakezwa ngalokhu, khonokho wathi: “Mumuntu kaZimu weqiniso ongakhenge alalele isinqophiso sakaJehova;+ nje-ke uJehova umnikele ebhubezini bona limrathule belimbulale, ngokuvumelana namezwi uJehova awakhulume kuye.”+ 27 Wathi emadodanenakhe: “Ngilungiselelani udumbana.” Yeke bamlungiselela. 28 Wakhamba wafumana isidumbu sakhe siphoseke endleleni, udumbana nebhubezi bajame eqadi kwaso. Ibhubezi akhenge lisidle isidumbu namkha lirathule udumbana. 29 Umphorofidi wathwala isidumbu somuntu kaZimu weqiniso, wasibeka phezu kwakadumbana, wamletha edorobheni lekhabo bona azomlilela bekambulunge. 30 Walalisa isidumbu ethuneni lakhe begodu basolo bamlilela, bathi: “Maye, mfowethu!” 31 Ngemva kokumbulunga wathi emadodanenakhe: “Nangihlongakalako, ningibulunge lapha kubulungwe khona umuntu kaZimu weqiniso. Nibeke amathambami eduze namathambakhe.+ 32 Ilizwi alikhulume ngelizwi lakaJehova ngokujamelene ne-aldara eliseBhetheli, nangokujamelene nazo zoke izindlu zokulotjha eziseendaweni eziphakemeko+ emadorobheni weSamariya lizokwenzeka nakanjani.”+
33 Ngitjho nangemva kobana kwenzeke koke lokhu, uJerobhowamu akhenge atjhuguluke endlelenakhe embi kodwana waragela phambili abeka abaphristi eendaweni eziphakemeko abakhetha ebantwini abajayelekileko.+ Bekabeka nanyana ngubani ofisa ukuba mphristi bona abe mphristi, athi: “Akabe ngomunye wabaphristi beendawo eziphakemeko.”+ 34 Malungana nendlu kaJerobhowamu,+ isonwesi sadosela ekutjhatjalalisweni kwayo nekurhayilweni kwayo ebusweni bephasi.+