Eksodusi
7 UJehova wathi kuMosi: “Ngikwenze wafana noZimu kuFaro begodu u-Aroni umfowenu uzokuba mphorofidakho.+ 2 Uzokutjela u-Aroni koke engikutjele khona, yena uzokutjela uFaro, ngemva kwalokho uFaro uzokukhambisa ama-Israyeli enarhenakhe. 3 Ngizokuvumela uFaro bona abe nekani+ begodu ngizokwenza iimangaliso ezinengi eGibhide.+ 4 Kodwana uFaro angeze akulalele, ngizokusebenzisa amandlami eGibhide, ngikhuphe amabuthwami, abantu bami, ama-Israyeli enarheni yeGibhide ngezahlulelo ezikulu.+ 5 Nangilula isandla sami ngimadlhe iGibhide bengikhuphe ama-Israyeli hlangana nawo, amaGibhide azokwazi ukuthi nginguJehova.”+ 6 UMosi no-Aroni benza lokho uJehova abayale bona bakwenze, benza njalo. 7 UMosi bekaneminyaka ema-80, u-Aroni aneminyaka ema-83 nabayokukhuluma noFaro.+
8 UJehova wathi kuMosi no-Aroni: 9 “UFaro nakathi kuwe, ‘Yenza isimangaliso,’ wena ithi ku-Aroni, ‘Thatha intongakho uyiphose phasi phambi kwakaFaro.’ Izokuphenduka inyoka ekulu.”+ 10 Nje-ke uMosi no-Aroni batjhinga kuFaro benza njengombana uJehova abayalile. U-Aroni waphosela intongakhe phasi phambi kwakaFaro neensebenzi zakhe, yaphenduka inyoka ekulu. 11 UFaro watjela amadoda ahlakaniphileko, abaloyi nabaphristi abenza imilingo beGibhide+ ukuthi benze okufanako ngemilingwabo.+ 12 Omunye nomunye wabo waphosela intongakhe phasi zaphenduka iinyoka ezikulu kodwana inyoka* ka-Aroni yaginya iinyoka zabo. 13 Nanyana kunjalo uFaro waba nekani+ begodu akhenge abalalele, njengombana uJehova atjhwile.
14 UJehova wathi kuMosi: “UFaro unekani,+ walile ukukhambisa abantu. 15 Kusasa ekuseni khamba utjhinge kuFaro, uzokuphuma aye emanzini. Nje-ke wena kufuze ujame magega noMlambo iNayili uyokuhlangana naye lapho, ukhambe nentonga leya eyaphenduka inyoka.+ 16 Kufuze uthi kuye, ‘UJehova uZimu wamaHebheru ungithume kuwe,+ uthi: “Khambisa abantu bami ukwenzela bona bayongilotjha emmangweni,” kodwana awukalaleli bekube nje. 17 UJehova uthi: “Ngalokhu uzokwazi ukuthi nginguJehova.+ Ngizokubetha amanzi weMlanjeni iNayili ngentonga esesandleni sami begodu azokuphenduka iingazi. 18 Iinhlambi eziseNayili zizokufa begodu iNayili izokunuka, amaGibhide angeze asakghona ukusela amanzayo.”’”
19 Nje-ke uJehova wathi kuMosi: “Tjela u-Aroni uthi kuye, ‘Thatha intongakho welulele isandla sakho phezu kwamanzi weGibhide,+ phezu kwemilambo yakhona, imilanjana* nemidzwela+ nazo zoke iindawo lapho babulungela khona amanzi ukwenzela bona aphenduke iingazi.’ Kuzokuzala iingazi kiyo yoke inarha yeGibhide ngitjho nangezitjeni ezenziwe ngesigodo nezenziwe ngamatje.” 20 Msinyana uMosi no-Aroni benza njengombana uJehova abayalile. Waphakamisa intonga wabetha amanzi weMlanjeni iNayili phambi kwakaFaro neensebenzi zakhe, woke amanzi aphenduka iingazi.+ 21 Iinhlambi ebezingemlanjeni zafa,+ umlambo wathoma ukunuka begodu amaGibhide besele angasakghoni ukusela amanzi weNayili,+ kuzele iingazi kiyo yoke inarha yeGibhide.
22 Nanyana kunjalo, abaphristi beGibhide abenza imilingo benza okufanako ngemilingwabo efihlakeleko,+ benza uFaro waba nekani khulu begodu akhenge abalalele njengombana uJehova atjhwile.+ 23 Nje-ke uFaro wabuyela endlinakhe begodu izinto azibonileko akhenge zimkghwathe. 24 Woke amaGibhide bewemba amanzi magega neNayili ngombana bewangakghoni ukusela amanzi weNayili. 25 UJehova wenza amanzi weNayili aba ziingazi amalanga alikhomba.