Joromiya
3 Abantu babuza: “Nangabe indoda iqotha umkayo begodu umkayo ayitjhiye abe ngowenye indoda, kufuze indoda le ibuyele kuye na?”
Inarha le ayikasilaphazwa ngokupheleleko na?+
“Ungwadle nabantu abanengi,+
Nje sekufuze ubuyele kimi?” kutjho uJehova.
2 “Phakamisela amehlwakho emibundwini enganalitho begodu ubone.
Kukuphi lapho ungakakatwa khona?
Bewubalinda eqadi kwendlela,
Njengomuntu ozulazula* emmangweni.
Usolo usilaphaza inarha
Ngobungwadla bakho nokukhohlakala kwakho.+
3 Izulu akhenge lisana,+
Begodu akunazulu etwasahlobo.
Awunanhloni uziphatha njengomfazi oyingwadla;
Awufuni ukuba neenhloni.+
4 Kodwana nje uyangirhuwelela uthi,
‘Baba, ungumngani webutjheni bami!+
5 Kghani umuntu kufuze ahlale asilingekile,
Namkha ahlale abambe amavunda?’
Utjho njalo,
Kodwana usolo wenza boke ubumbi onekghono lokubenza.”+
6 Emihleni yeKosi uJosiya,+ uJehova wathi kimi: “‘Ukubonile na okwenziwe ngu-Israyeli ongakathembeki? Ukhuphukele kizo zoke iintaba eziphakemeko, waya ngaphasi kwayo yoke imithi ehlaza bona ayokungwadla.+ 7 Ngitjho nangemva kokwenza zoke izintwezi, bengisolo ngimtjela bona abuyele kimi+ kodwana akhenge abuye; begodu uJuda bekasolo aqala udadwabo okhohlisako.+ 8 Nangibona lokho, ngaqotha u-Israyeli ongakathembeki ngamnikela incwadi yesihlukaniso+ ngebanga lobufebe* bakhe.+ Kodwana udadwabo okhohlisako uJuda akhenge asabe; naye wakhamba, wangwadla.+ 9 Ubungwadla bakhe, wabuthatha njengento engatjho litho, bekasolo asilaphaza inarha begodu afeba namatje nemithi.+ 10 Ngaphezu kwakho koke lokhu, udadwabo okhohlisako uJuda akhenge abuyele kimi ngehliziywakhe yoke, kodwana bekazenzisa,’ kutjho uJehova.”
11 UJehova uthe kimi: “U-Israyeli ongakathembeki uzibonakalise alunge ukudlula uJuda okhohlisako.+ 12 Khamba, umemezele amezwi la etlhagwini:+
“‘“Maye! Israyeli olahle ukukholwa. Buya,” kutjho uJehova.’+ ‘“Angekhe ngisilingeke ngawe+ ngombana ngithembekile,” kutjho uJehova.’ ‘“Angekhe ngikukwatele unomphela. 13 Vuma umlandwakho kwaphela, ngombana uhlubuke kuJehova uZimakho. Bewusolo uya emabhayini nabantu abangaziwako* ngaphasi kwayo yoke imithi ehlaza kodwana bewungalaleli ilizwi lami,” kutjho uJehova.’”
14 “Nina madodana alahle ukukholwa, buyani,” kutjho uJehova. “Ngombana ngibe yikosenu yeqiniso; begodu ngizonithatha, ngizokuthatha munye edorobheni, ngithathe ababili emndenini nginilethe eZiyoni.+ 15 Ngizoninikela abelusi abavumelana nentandwami*+ begodu bazonondla ngelwazi nelemuko. 16 Emihleni leyo nizokuba banengi, niveze iinthelo enarheni,” kutjho uJehova.+ “Angekhe basathi, ‘Umfaji wesivumelwano kaJehova!’ Angekhe usafika eenhliziyweni, angekhe bawukhumbule namkha bawuhlulukele begodu angekhe usenziwa godu. 17 Ngesikhatheso bazokubiza iJerusalema ngesihlalo sobukhosi sakaJehova;+ zoke iintjhaba zizokuhlanganiswa ndawonye egameni lakaJehova eJerusalema+ begodu angekhe zisaba nekani zilandele iinhliziyo zazo ezikhohlakeleko.”
18 “Emihleni leyo zizokukhamba ndawonye, indlu kaJuda nendlu ka-Israyeli,+ zizokuvela enarheni yetlhagwini ndawonye, ziye enarheni engayinikela abakhokho bakho njengelifa.+ 19 Ngacabanga ngathi, ‘Qala indlela engakubeka ngayo hlangana namadodana begodu ngakunikela inarha efiselekako, ilifa elihle khulu hlangana neentjhaba!’+ Ngacabanga nokuthi uzongibiza ngokuthi, ‘Baba!’ begodu angekhe uphambuke ekungilandeleni. 20 Ngokuqinisekileko njengombana umfazi atjhiya indodakhe ngokukhohlisa, nawe ndlu ka-Israyeli, ungikhohlisile,’+ kutjho uJehova.”
21 Kuzwakala itjhada emibundwini enganalitho,
Ukulila nesibawo sabantu bakwa-Israyeli,
Ngombana balahle indlelabo;
Balibele uJehova uZimabo.+
22 “Buyani nina madodana alahle ukukholwa.
Ngizokulapha ihliziywenu engakholwakho.”+
Ngokuqinisekileko sizokuthi: “Nakhu silapha, size kuwe,
Ngombana wena Jehova unguZimethu.+
23 Ngokuqinisekileko imibundu netjhada elikhulu eentabeni yinto engekho.+
Ngokuqinisekileko isindiso ka-Israyeli ikuJehova uZimethu.+
24 Into ehlazisako irhiribidele umsebenzi wabokhokho bethu kusukela ebutjheni bethu,+
Imihlambabo yezimvu nemihlambabo yeenkomo,
Amadodanabo namadodakazabo.