Joromiya
13 Ngilokhu uJehova akutjho kimi: “Khamba uyokuthenga ibhande lelineni, ulibophe edinini kodwana ungalifaki emanzini.” 2 Yeke ngathenga ibhade njengombana kutjho uJehova, ngalibopha edinini. 3 Ilizwi lakaJehova lafika kimi ihlandla lesibili lathi: 4 “Thatha ibhande olithengileko nolimbetheko, uye eYufrathe, ulifihle erharheni ledwala.” 5 Yeke ngakhamba ngalifihla eYufrathe njengombana uJehova angiyalile.
6 Ngemva kobana kudlule amalanga amanengi uJehova wathi kimi: “Sikima, uye eYufrathe uyokuthatha ibhande engithe ulifihle lapho.” 7 Yeke ngaya eYufrathe ngemba ibhande, ngalikhupha endaweni ebengilifihle kiyo ngabona ukuthi ibhande belimotjhekile; belingasanamsebenzi.
8 Yeke ilizwi lakaJehova leza kimi lathi: 9 “Ngilokhu uJehova akutjhoko, ‘Ngendlela efanako ngizokutjhabalalisa ukuzikhakhazisa kwakaJuda nokuzikhakhazisa okukhulu kweJerusalema.+ 10 Abantu abambaba abala ukulalela amezwami,+ abalandela iinhliziyo zabo ngekani,+ abalandela abanye abozimu, babalotjhe begodu babakhothamele, bazokuba njengebhandeli elingasanamsebenzi.’ 11 ‘Njengombana ibhande linamathela edinini lomuntu, yeke ngenze yoke indlu ka-Israyeli nayo yoke indlu kaJuda yanamathela kimi,’ kutjho uJehova, ‘bona babe sitjhaba,+ ligama,+ lidumo nento ehle. Kodwana akhenge balalele.’+
12 “Kufuze ubatjele umlayezo lo uthi, ‘Ngilokhu uJehova uZimu ka-Israyeli akutjhoko: “Yoke imijeka emikhulu kufuze izaliswe ngewayini.”’ Bazokuphendula bathi, ‘Kghani asazi na bona yoke imijeka emikhulu kufuze izaliswe ngewayini?’ 13 Nje-ke uthi kibo, ‘Ngilokhu uJehova akutjhoko: “Ngizalisa zoke izakhamuzi zenarha+ ngobudakwa, amakhosi ahlezi esihlalweni sobukhosi sakaDavida, abaphristi nabaphorofidi nazo zoke izakhamuzi zeJerusalema. 14 Ngizokuphahlazela omunye phezu komunye, abobaba ngendlela efanako namadodana,” kutjho uJehova.+ “Angekhe ngibarhawukele namkha ngibazwele ubuhlungu namkha ngibe nomusa kibo; akunalitho elizongivimba bona ngibatjhabalalise.”’+
15 Yizwani nilalelisise.
Ningazikhakhazisi ngombana uJehova ukhulumile.
16 Phazimulisani uJehova uZimenu
Ngaphambi kobana alethe ubumnyama
Ngaphambi kobana iinyawo zenu zikhutjwe eentabeni ntambama.
17 Nanibhala ukulalela,
Ngizokulilela emsitheleni ngebanga lokukhakhazisa kwenu.
Ngizokulila khulu begodu amehlwami azokugeleza iinyembezi,+
Ngebanga lokuthi umhlambi kaJehova+ uthunjiwe.
18 Tjelani ikosi nonina wekosi,+ nithi, ‘Hlalani endaweni ephasi,
Ngombana isihlohlo senu esihle sizokuwa eenhloko zenu.’
19 Amadorobho wesewula avaliwe, akekho ongawavula.
Woke uJuda udingisiwe, udingiswe ngokupheleleko.+
20 Phakamisa amehlwakho ubone abavela ngetlhagwini.+
Uphi umhlambi onikelwe wona, izimvu zakho ezihle?+
21 Uzokuthini nawujeziswa
Ngilabo ebewufuna ukuba bangani babo kusukela ekuthomeni?+
Angekhe ubanjwe buhlungu bokubeletha na, obunjengobuhlungu obubamba umfazi obelethako?+
22 Nawuthi ehliziywenakho, ‘Kubayini izintwezi zehlele mina?’+
Kungebanga lomtjhaphwakho omkhulu uhlutjuliswe izambatho zakho+
Neenthende zakho zizwe ubuhlungu obukhulu.
23 UmKutjhe* angasitjhugulula na isikhumba sakhe namkha ingwe amabalayo?+
Nakunjalo, ungenza okuhle,
Wena obandulwe bona wenze okumbi.
24 Ngizobahlakaza njengomhlanga ophetjhulwa mumoya werhalawumbeni.+
25 Lesi sisabelo sakho, ingcenyakho engikwabele yona.” kutjho uJehova,
26 Yeke ngizokuphakamisela isambatho sakho ebusweni bakho,
Nehlazo lakho lizokuba tjhatjhalazi,+
27 Izenzo zakho zokufeba+ nokurhuwelela njengenjomani etjhiswa yikanuko,
Nobungwadla bakho obuphathisa iinhloni.
Emibundwini nemasimini,
Ngibone ukuziphatha kwakho okunyenyisako.+
Maye! Jerusalema,
Kuzabe kube kunini ungakahlwengeki?+