Yokuthoma YamaKhosi
21 Ngemva kwalokho, kwaba nesehlakalo esenzekako malungana nesimu yamadiribe kaNabhothi umJizriyela; isimu leyo beyiseJizriyela,+ hlanu kwesigodlo saka-Arhabi ikosi yeSamariya. 2 U-Arhabi wathi kuNabhothi: “Nginikela isimakho yamadiribe ngiyenze isivande sami semirorho ngombana ihlanu kwendlwami. Esikhundleni sayo ngizokunikela isimu yamadiribe engcono. Namkha nawuthandako, ngizokunikela imali efanele izinga layo.” 3 Kodwana uNabhothi wathi ku-Arhabi: “Ngingayenza njani intwembi kangaka phambi kwamehlo kaJehova bona ngikunikele ilifa labokhokho bami.”+ 4 Ngemva kwalokho, u-Arhabi wafika endlinakhe, acobeke amathambo begodu adanile ngendlela uNabhothi umJizriyela amphendule ngayo nakathi: “Angekhe ngikunikele ilifa labokhokho bami.” Nje-ke walala embhedenakhe, ubuso bakhe basolo bufulathele buqale ngebodeni, wabhala nokudla.
5 Kwangena umkakhe uJezebheli,+ wambuza wathi: “Kubayini udanile ungafuni nokudla?” 6 Wamphendula wathi: “Ngombana ngithe kuNabhothi umJizriyela, ‘Ngithengisela isimakho yamadiribe. Namkha nawuthandako, esikhundleni sayo ngizokunikela enye.’ Kodwana wathi, ‘Angekhe ngikunikele isimami yamadiribe.’” 7 Umkakhe uJezebheli wathi kuye: “Kghani awusiyikosi ebusa kwa-Israyeli? Sikima udle okuthileko, ihliziywakho ayithabe. Ngizokunikela isimu yamadiribe kaNabhothi umJizriyela.”+ 8 Nje-ke watlola iincwadi ngegama laka-Arhabi wafaka itshwayo laka-Arhabi kizo,+ wathumela iincwadezo kubadala+ neenkhulwini ezihlala edorobheni lakaNabhothi. 9 Eencwadinezo wathi: “Memezelani isikhathi sokuzila, uNabhothi akahlaliswe phambi kwabo boke abantu. 10 Akuhlaliswe iinratjhana zamadoda ezimbili phambi kwakhe, zifakaze ngokujamelene naye+ zithi, ‘Wena uthuke uZimu nekosi!’+ Ngemva kwalokho, mkhupheleni ngaphandle nimkghadlhe ngamatje afe.”+
11 Nje-ke amadoda wedorobheni lakhe, abadala neenkhulu ezihlala edorobheni lakhe, benza njengombana kutloliwe eencwadini abazithunyelwe nguJezebheli. 12 Bamemezela isikhathi sokuzila begodu bahlalisa uNabhothi phambi kwabo boke abantu. 13 Ngemva kwalokho, kwangena iinratjhana ezimbili zamadoda, zahlala phambi kwakhe, zathoma ukufakaza ngokujamelene noNabhothi phambi kwabo boke abantu, zathi: “UNabhothi uthuke uZimu nekosi!”+ Ngemva kwalokho, bamkhuphela emaphethelweni wedorobho bamkghadlha ngamatje wafa.+ 14 Nje-ke bathumela ilizwi kuJezebheli bathi: “UNabhothi ukghadlhwe ngamatje wafa.”+
15 Msinyana uJezebheli nakezwa bona uNabhothi ukghadlhwe ngamatje wafa, wathi ku-Arhabi: “Sikima uthathe isimu yamadiribe kaNabhothi umJizriyela,+ leya abhale ukukuthengisela yona ngombana uNabhothi akasekho, uhlongakele.” 16 Msinyana u-Arhabi nakezwa bona uNabhothi uhlongakele, u-Arhabi wasikima wehlela esimini yamadiribe kaNabhothi umJizriyela bona ayithathe.
17 Kodwana ilizwi lakaJehova lafika ku-Eliya+ umTitjhibe, lathi: 18 “Sikima, wehlele eSamariya uyokuhlangana no-Arhabi ikosi yakwa-Israyeli.+ Usesimini yamadiribe kaNabhothi, uye lapho bona ayoyithatha. 19 Kufuze uthi kuye, ‘UJehova uthi: “Kghani ubulele+ umuntu bewathatha nepahlakhe?”’+ Ngemva kwalokho, uthi kuye, ‘UJehova uthi: “Endaweni izinja ezikhothe kiyo iingazi zakaNabhothi nezakho iingazi zizokukhothwa zizinja khonapho.”’”+
20 U-Arhabi wathi ku-Eliya: “Ungifumene naba lami!”+ Wamphendula wathi: “Ngikufumene. ‘Ngombana uzimisele* ukwenza okumbi emehlweni kaJehova,+ 21 nje-ke ngikulethela isizi, ngizokuthanyela ngemva kwakho, ngirhayile zoke iinzukulwana zakho eziduna,+ kuhlanganise abangasililitho nababogabogako kwa-Israyeli.+ 22 Ngizokwenza indlwakho ibe njengendlu kaJerobhowamu+ indodana kaNebathi nanjengendlu kaBhatjha+ indodana ka-Arhiya ngombana uvuse ilaka lami, wabangela u-Israyeli bona one.’ 23 Malungana noJezebheli, uJehova uthe: ‘Izinja zizokudla uJezebheli esiqetjhaneni senarha yeJizriyela.+ 24 Nanyana ngubani ongowaka-Arhabi ofela edorobheni uzokudliwa zizinja, kuthi nanyana ngubani ofela esimini uzokudliwa ziinyoni zomkayi.+ 25 Kwamambala, akhenge khekube nomuntu ofana no-Arhabi,+ obekathanda* ukwenza okumbi emehlweni kaJehova, ohlohlozelwa mkakhe uJezebheli.+ 26 Yeke wenza ngendlela enyenyisa khulu ngokulandela iinthombe ezinyenyisako,* njengombana kwenza woke ama-Amori, lawo uJehova awaqotha phambi kwama-Israyeli.’”+
27 Msinyana ngemva kobana u-Arhabi ezwe amezwi la, wadabula izambatho zakhe wambatha umgodla; wazila ukudla, wasolo alele ambethe umgodla begodu akhamba khamba adanile. 28 Nje-ke ilizwi lakaJehova lafika ku-Eliya umTitjhibe lathi: 29 “Uyibonile na indlela u-Arhabi azithobe ngayo phambi kwami?+ Ngebanga lokuthi uzithobile phambi kwami, isizeli angekhe ngililethe phakathi nesikhathi sokuphila kwakhe. Isizeli ngizoliletha phezu kwendlwakhe emihleni yendodanakhe.”+