Yesibili YamaKhosi
20 Emihleni leyo uHezekiya wagulela ukufa.+ Umphorofidi u-Isaya indodana ka-Amotsi weza kuye wathi, “UJehova uthi: ‘Nikela umndenakho iinqophiso ngombana uzokufa; angekhe uphole.’”+ 2 Khonokho uHezekiya waqalisa ubuso bakhe ebodeni, wathoma ukuthandaza kuJehova wathi: 3 “Ngiyakubawa Jehova, ngibawa ukhumbule indlela engakhamba ngayo ngokuthembeka phambi kwakho ngehliziyo epheleleko, ngenze okuhle emehlwenakho.”+ UHezekiya wathoma ukulila kabuhlungu.
4 U-Isaya bekangakafiki esirhodlweni sesigodlo esiphakathi lokha ilizwi lakaJehova nalifika kuye lithi:+ 5 “Buyela kuHezekiya umdosiphambili wabantu bami, uthi, ‘Nakhu okutjhiwo nguJehova uZimu kaDavida ukhokhwakho uthi: “Ngiwuzwile umthandazwakho. Ngizibonile iinyembezi zakho.+ Nje-ke ngiyakulapha.+ Ngelanga lesithathu, uzokukhuphukela endlini kaJehova.+ 6 Ngizokungezelela iminyaka eli-15 ekuphileni kwakho, ngizokusindisa wena nedorobheli esandleni sekosi ye-Asiriya,+ ngizokuvikela idorobheli ngebanga legama lami nangebanga lakaDavida incekwami.”’”+
7 Nje-ke u-Isaya wathi: “Lethani ikuke lamafeyi omisiweko.” Yeke baliletha balibeka phezu kwethumba lakaHezekiya, ngemva kwalokho waphola kancanikancani.+
8 UHezekiya bekabuze u-Isaya ukuthi: “Ngiliphi itshwayo+ engizokubona ngalo ukuthi uJehova uzongilapha nokuthi ngelanga lesithathu ngizokukhuphukela endlini kaJehova?” 9 U-Isaya wamphendula wathi: “Nanti itshwayo elivela kuJehova elitjengisa bona uJehova uzokwenza akukhulumileko: Ufuna isithunzi esiseentepisini* siluleke siye phambili ngeentepisi ezilitjhumi namkha siye emva ngeentepisi ezilitjhumi?”+ 10 UHezekiya wathi: “Kulula ngesithunzi bona sizilulele phambili ngeentepisi ezilitjhumi kodwana ingasi bona sibuyele emva ngeentepisi ezilitjhumi.” 11 Nje-ke u-Isaya umphorofidi wabiza uJehova, yena-ke wenza isithunzi esiseentepisini zaka-Arhazi bona sibuyele emva ngeentepisi ezilitjhumi esehle kizo.+
12 Ngesikhatheso ikosi yeBhabhiloni, uBherodaki-Bhaladani indodana kaBhaladani, yathumela iincwadi nesipho kuHezekiya ngombana beyizwile bona uHezekiya bekagula.+ 13 UHezekiya wazamukela iinthunywezo wazitjengisa indlwakhe yoke yamagugu, isiliva, igolide, amafutha webhalisamu namafutha aligugu nendawo abeka kiyo iinkhali nakho koke ebekufunyanwa emabulungelwenakhe wamagugu. Akunanto uHezekiya angakhenge ayitjengise zona endlinakhe neembuswenakhe woke.
14 Ngemva kwalokho umphorofidi u-Isaya weza eKosini uHezekiya wambuza wathi: “Amadoda la atheni begodu avelaphi?” UHezekiya wathi: “Avela enarheni ekude, eBhabhiloni.”+ 15 Ngemva kwalokho, wabuza wathi: “Aboneni ngendlinakho?”* UHezekiya waphendula wathi: “Abone koke okungendlinami.* Akunanto engingakawatjengisi yona emabulungelwenami wamagugu.”
16 Nje-ke u-Isaya wathi kuHezekiya: “Lalela ilizwi lakaJehova,+ 17 ‘Qala! Kuza amalanga lapho koke okusendlinakho nakho koke abokhokho bakho abakubekileko bekube kunamhlanjesi kuzokuthathwa kusiwe eBhabhiloni.+ Akunalitho elizokusala,’ kutjho uJehova. 18 ‘Amanye amadodana ozokubelethelwa wona azokuthathwa+ ayokuba ziinkhulu zesigodlo sekosi yeBhabhiloni.’”+
19 Khonokho uHezekiya wathi ku-Isaya: “Lizwakala kuhle ilizwi elikhulunywe nguJehova.”+ Ngemva kwalokho, wangezelela wathi: “Kuhle nakuzokuba nokuthula neqiniso emihleni yokuphila kwami.”+
20 Malungana nawo woke omunye umlando kaHezekiya, woke amandlakhe nendlela enza ngayo isiziba+ nomsele begodu waletha amanzi ngedorobheni,+ akukatlolwa na encwadini yomlando weenkhathi zamakhosi wakwaJuda? 21 Ngemva kwalokho, uHezekiya walaliswa nabokhokho bakhe;+ indodanakhe uManase+ yaba yikosi esikhundleni sakhe.+