Eksodusi
27 “Kufuze wenze i-aldara ngomuthi womunga,+ kufuze libe makhubhithi* amahlanu ubude begodu libe makhubhithi amahlanu ububanzi. Kufuze lilingane mahlangothi woke, libe makhubhithi amathathu ukuphakama.+ 2 Emakhonenalo womane, kufuze wenze iimpondo,+ iimpondwezo kufuze zibe yingcenye ye-aldara, kufuze unameke i-aldara ngekhopha.+ 3 Kufuze wenze amathungana wokulahlela umlotha, wenze iinrharafu, iinkotlelo, iimforogo nezinto zokuphatha umlilo, zoke izitja zalo uzenze ngekhopha.+ 4 Uzokwenzela i-aldareli isefo ngekhopha begodu esefenapho uzokufaka amasongo amane enziwe ngekhopha emakhoneni amane walo. 5 Isefo leyo uyifake ngaphasi komphetho we-aldara begodu izokunaba ngaphakathi kwe-aldara. 6 Wenze iingodo ze-aldara ngomuthi womunga bewuzinameke ngekhopha. 7 Iingodo kufuze zifakwe emasongweni ukwenzela bona zibe semahlangothini womabili we-aldara lokha nalithwalwako.+ 8 Kufuze wenze i-aldara ngamaplanka libe njengebhoksi elivulekileko. Kufuze ulenze libe ngendlela engikutjengise ngayo entabeni.+
9 “Kufuze wenze isirhodlo+ sethaberinakeli. Ngehlangothini langesewula lesirhodlo, kufuze kube namarharideni enziwe ngelineni elisezingeni eliphezulu, ubude kufuze bube makhubhithi ali-100.+ 10 Uzokwenza iinsika ezima-20 neensekelo zekhopha ezima-20. Amawugu weensika namasongo wazo kufuze abe ngewesiliva. 11 Amarharideni angetlhagwini nawo kufuze abe makhubhithi ali-100 ubude, akhambisane neensika zawo ezima-20 neensekelo zawo zekhopha ezima-20 kuhlanganise namawugu wesiliva namasongo weensika. 12 Amarharideni angehlangothini elingetjingalanga, kufuze abe makhubhithi ama-50 ubude, wenze iinsika ezilitjhumi neensekelo ezilitjhumi. 13 Ububanzi besirhodlo esingepumalanga kufuze bube makhubhithi ama-50. 14 Kuzokuba namarharideni amakhubhithi ali-15 ngehlangothini linye, kube neensika ezintathu neensekelo ezintathu.+ 15 Ngakwelinye ihlangothi, kuzokuba namarharideni amakhubhithi ali-15, iinsika ezintathu neensekelo ezintathu.
16 Ebungenweni besirhodlo kufuze kube nerharideni elimakhubhithi ama-20 ubude elenziwe ngerhara ehlaza komkayi, iwulu esipiridzana, itjhila elibomvu be nelineni elisezingeni eliphezulu,+ kufuze libe neensika ezine neensekelo zakhona ezine.+ 17 Zoke iinsika ezibhode isirhodlo kufuze zibe neenhlanganiso zesiliva namawugu wesiliva kodwana iinsekelo zazo kufuze zibe ngezekhopha.+ 18 Isirhodlo kufuze sibe makhubhithi ali-100 ubude,+ makhubhithi ama-50 ububanzi besibe makhubhithi ama-5 ukuphakama, kufuze senziwe ngelineni elisezingeni eliphezulu, iinsekelo zaso kufuze zibe ngezekhopha. 19 Zoke izitja nezinto ezisetjenziswa ethaberinakeli, kuhlanganise neenkhonkhwani zetende neenkhonkhwani zesirhodlo kufuze zibe ngezekhopha.+
20 Kufuze uyale ama-Israyeli bona akulethele amafutha we-oliva ahlwengileko weembani ukwenzela bona zihlale zikhanya.+ 21 Etendeni lokuhlangana, ngaphandle kwerharideni eliseduze nobuFakazi,+ u-Aroni namadodanakhe bazokuhlela bona iimbani zikhanye kusukela ebusuku bekube sekuseni phambi kwakaJehova.+ Lo mthetho ama-Israyeli azowulandela nozokusebenza kizo zoke iinzukulwana zawo.+