Joromiya
52 UTsedekhiya+ bekaneminyaka ema-21 nakaba yikosi begodu wabusa iminyaka eli-11 eJerusalema. Igama lakanina bekunguRhamuthali+ indodakazi kaJoromiya weLibhina. 2 Waragela phambili nokwenza okumbi phambi kwakaJehova, ngokuvumelana nakho koke okwenziwa nguJehoyakhimu.+ 3 Izintwezi zenzeka eJerusalema nakwaJuda ngombana uJehova bekasilingekile bekwaba kulapho abaqotha phambi kwakhe.+ UTsedekhiya wahlubuka ekosini yeBhabhiloni.+ 4 Ngomnyaka wethoba wokubusa kwakaTsedekhiya, ngenyanga yetjhumi, ngelanga letjhumi lenyanga, uNebukadinetsari* ikosi yeBhabhiloni weza nalo loke ibutho lakhe azokusahlela iJerusalema. Bahloma ikampabo bona balwe nayo begodu bakha iboda lokulivimbezela mahlangothi woke.+ 5 Idorobho lavinjezelwa bekwaba mnyaka we-11 wokubusa kweKosi uTsedekhiya.
6 Ngenyanga yesine, ngelanga lethoba,+ indlala yarhagala edorobheni, bekunganakudla enarheni bona abantu badle.+ 7 Emaswapheleni, iboda ledorobho lagirizwa, woke amasotja abaleka ebusuku ngesango phakathi kwamaboda amabili aseduze nesimu yekosi, kukulapho amaKhaledi* abhode idorobho; baraga ngendlela ye-Araba.+ 8 Kodwana ibutho lamaKhaledi* layigijimisa ikosi, lafumana uTsedekhiya+ emmangweni othabaleleko weJerikho, woke amabuthwayo bewaphadlhalele. 9 Nje-ke bayibamba ikosi, bakhuphukela nayo ekosini yeBhabhiloni eRibhila enarheni yeRhamathi begodu bayigweba. 10 Babulala amadodana kaTsedekhiya phambi kwakhe aqalile; begodu babulala woke amakhosana wakwaJuda eRibhila. 11 Ngemva kwalokho ikosi yeBhabhiloni yaphophaza amehlo kaTsedekhiya,+ yambopha ngamakhamandela wekhopha eenyaweni, yeza naye eBhabhiloni, yasolo imvalele bewahlongakala.
12 Ngenyanga yesihlanu, ngelanga letjhumi, okutjho ukuthi ngomnyaka we-19 weKosi uNebukadinetsari* ikosi yeBhabhiloni, uNebuzaradani induna yabonogada, obekamsizi wekosi yeBhabhiloni wafika eJerusalema.+ 13 Watjhisa indlu kaJehova,+ indlu yekosi nazo zoke izindlu zeJerusalema; godu watjhisa zoke izindlu ezikulu. 14 Amaboda abhode iJerusalema agirizwa ngilo loke ibutho lamaKhaledi* ebelinenduna yabonogada.+
15 UNebuzaradani induna yabonogada wathatha abantu abatlhagako nabo boke abantu ebebasele edorobheni wabasa ekudingisweni. Wathatha nababaleki ebebazinikele ekosini yeBhabhiloni nazo zoke iinsebenzi zobukghwari.+ 16 Kodwana uNebuzaradani induna yabonogada watjhiya abanye babantu abatlhage khulu enarheni bona batlhogomele amasimu wamadiribe begodu bakatelelwa bona basebenze budisi.+
17 AmaKhaledi* aphula iinsika zekhopha+ zendlu kaJehova, iinkarana+ neLwandle lekhopha+ ebelisendlini kaJehova kwaba ziinquqwana, athatha yoke ikhopha atjhinga nayo eBhabhiloni.+ 18 Godu athatha izinto zokuphatha umlotha, amarharafu, iincimamlilo, iinkotlelo,+ iinkapho+ nazo zoke iinsetjenziswa zekhopha ebezisetjenziswa emsebenzini wethempeli. 19 Induna yabonogada yathatha izitja,+ izinto zokuphatha umlilo, iinkotlelo, izinto zokuphatha umlotha, ilithi lesibani,+ iinkapho nezitja ebekungezegolide lamambala nesiliva lamambala.+ 20 Ngokuphathelene neensika ezimbili, iLwandle iinkunzi zekhopha ezili-12+ ngaphasi kweLwandle neenkarana iKosi uSolomoni azenzela indlu kaJehova, ikhopha yazo zoke izintwezi beyingalinganiseki.
21 Malungana neensika, isika ngayinye bekumakhubhithi* ali-18 ukuphakama, intambo yokulinganisa imakhubhithi ali-12 ukuyizombeleza;+ ubudege bayo bekumimino* emine ehlanganisiweko begodu beyinomgodi. 22 Ipundu engaphezu kwayo bekungeyekhopha; ukuphakama kwepundu bekumakhubhithi amahlanu;+ umkghabiso wenede namarharinada azombeleze ipundu bewenziwe ngekhopha. Isika yesibili beyifana neyokuthoma namarharinada bewafana nayo. 23 Bekumarharinada ama-96 ngemaqadi, nakuphelele koke bekumarharinada ali-100 azombeleze inede.+
24 Induna yabonogada yathatha noSeraya+ umphristi omkhulu, uZefaniya+ umphristi wesibili nabalindisango abathathu.+ 25 Yathatha edorobheni isikhulu sesigodlo sinye ebesimlawuli wamasotja, abeluleki bekosi abalikhomba abatjhidelene khulu nekosi abafumaneka edorobheni, kuhlanganise nonobhala wenduna yebutho, loyo obekabuthelela abantu benarha, wathatha namadoda ama-60 ababantu nje enarheni ebebasafumaneka edorobheni. 26 UNebuzaradani induna yabonogada wabathatha wabasa ekosini yeBhabhiloni eRibhila. 27 Ikosi yeBhabhiloni yabasahlela yababulala eRibhila+ enarheni yeRhamathi. Ngokunjalo-ke uJuda wasuka enarhenakhe waya ekudingisweni.+
28 Laba babantu uNebukadinetsari* abasa ekudingisweni: amaJuda azii-3 023 ngomnyaka wekhomba.+
29 Ngomnyaka we-18 kaNebukadinetsari,*+ abantu abama-832 bathathwa eJerusalema.
30 Ngomnyaka wama-23 kaNebukadinetsari,* uNebuzaradani isikhulu sakanogada sathatha amaJuda sawasa ekudingisweni, bekubabantu abama-745.+
Nabaphelele boke bebazii-4 600 abasiwa ekudingisweni.
31 Ngomnyaka wama-37 wokudingiswa kwekosi yakwaJuda uJehoyakini,+ ngenyanga ye-12, ngelanga lama-25 lenyanga, u-Evili-Merodaki ikosi yeBhabhiloni, ngomnyaka aba ngawo yikosi, watjhaphulula uJehoyakini ikosi yakwaJuda wayikhupha ejele.+ 32 Wakhuluma naye ngomusa begodu wabeka isihlalo sakhe sobukhosi saba ngaphezu kweenhlalo zobukhosi zamanye amakhosi ebewanaye eBhabhiloni. 33 Nje-ke uJehoyakini wahlubula izambatho zakhe zejele begodu bekadla phambi kwakhe yoke imihla yokuphila kwakhe. 34 Qobe langa bekanikelwa isibonelelo sokudla esivela ekosini yeBhabhiloni, yoke imihla yokuphila kwakhe bekwaba kulapho ahlongakala khona.