Yesibili YeenKronike
12 Msinyana ngemva kokuthi ubukhosi bakaRerhobhowamu bunzinzile+ begodu sekanamandla, wafulathela umThetho kaJehova+ no-Israyeli woke naye wenza njalo. 2 Ngomnyaka wesihlanu weKosi uRerhobhowamu, uTjhitjhakhi+ iKosi yeGibhide wakhuphuka ayokulwa neJerusalema ngombana akhenge bathembeke kuJehova. 3 Bekaneenkarana eziyi-1 200, abakhweli beenjomani abazii-60 000 nebutho elinengi khulu elisuke naye eGibhide, amaLibhiya, amaSuki namaTopiya.+ 4 Wathumba amadorobho wakwaJuda anemithangala, emaswapheleni wafika eJerusalema.
5 UTjhemaya+ umphorofidi weza kuRerhobhowamu namakhosana wakwaJuda ebewahlangene eJerusalema ngebanga lakaTjhitjhakhi, wathi kibo: “UJehova uthi, ‘Ningilahlile, nje-ke nami nginilahlele+ esandleni sakaTjhitjhakhi.’” 6 Yeke amakhosana wakwa-Israyeli nekosi bazithoba+ bese bathi: “UJehova ulungile.” 7 UJehova nakabona ukuthi bazithobile, ilizwi lakaJehova lafika kuTjhemaya, lathi: “Bazithobile. Angekhe ngibatjhabalalise,+ esikhathini esingaphelisi ihliziyo ngizobasindisa. Angekhe ngithululele ilaka lami eJerusalema ngoTjhitjhakhi. 8 Kodwana bazokuba ziinsebenzi zakhe bonyana bazi umehluko wokusebenzela mina nokusebenzela amakhosi wezinye iinarha.”
9 Nje-ke iKosi yeGibhide uTjhitjhakhi yakhuphuka izokulwa neJerusalema. Yathatha amagugu wendlu kaJehova+ namagugu wendlu yekosi.* Yathatha koke neemviko zegolide ezenziwa nguSolomoni.+ 10 Yeke iKosi uRerhobhowamu yenza iimviko zekhopha esikhundleni sazo, yaziphathisa iinkhulu zabonogada, ebebagada ubungeno bendlu yekosi. 11 Qobe ikosi nayiza endlini kaJehova, abonogada bebangena bazithathe, kuthi ngemva kwalokho bazibuyisele ekumbeni yabonogada. 12 Ngebanga lokuthi ikosi yazithoba, ilaka lakaJehova lasuka kiyo+ begodu azange abatjhabalalise ngokupheleleko.+ Ngaphezu kwalokho, kunobuhle obuthileko obafunyanwa kwaJuda.+
13 IKosi uRerhobhowamu yaqinisa isikhundla sayo eJerusalema begodu yaraga nokubusa; uRerhobhowamu bekaneminyaka ema-41 nakaba yikosi, wabusa iminyaka eli-17 eJerusalema, idorobho uJehova alikhetha hlangana nazo zoke iintjhaba zakwa-Israyeli bona libe yindawo azokubeka kiyo igama lakhe. Igama lakanina wekosi bekunguNama wakwa-Amoni.+ 14 Kodwana wenza okumbi ngombana azange azimisele ehliziywenakhe ukufuna uJehova.+
15 Malungana nomlando kaRerhobhowamu, kusukela ekuthomeni bekube sekugcineni, awukatlolwa na hlangana namezwi kaTjhemaya+ umphorofidi no-Ido+ umboni erhelweni lokulandelana kweenzukulwana? Bekuhlala kunezipi phakathi kwakaRerhobhowamu noJerobhowamu.+ 16 Ngemva kwalokho, uRerhobhowamu walaliswa nabokhokho bakhe begodu wabulungwa eDorobheni lakaDavida;+ indodanakhe u-Abhiya+ yaba yikosi esikhundleni sakhe.