Joromiya
2 Ilizwi lakaJehova lafika kimi lathi: 2 “Khamba uyokumemezela eendlebeni zeJerusalema, ‘Ngilokhu uJehova akutjhoko:
“Ngikukhumbula kuhle ukuzinikela kwakho usesemutjha,+
Ithando ebewunalo lokha nawuthenjiswe umtjhado,+
Indlela owangilandela ngayo emmangweni,
Enarheni engakatjalwa imbewu.+
3 U-Israyeli bekacwengekile kuJehova,+ iinthelo zokuthoma zesivuno sakhe.’”
‘Nanyana ngubani omrhiribidelako bekazokuba mlandu.
Bebazokwehlelwa yihlekelele,’ kutjho uJehova.”+
4 Lalela ilizwi lakaJehova, wena ndlu kaJakopo,
Nani noke mindeni yendlu ka-Israyeli.
5 Nakhu uJehova akutjhoko:
“Ngimuphi umtjhapho abokhokho bakho abawufumana kimi,+
Owabenza baphambukela kude nami,
Balotjha iinthombe ezingasizi ngalitho+ begodu bona ngokwabo akhenge basize ngalitho?+
6 Akhenge babuze bathi, ‘Uphi uJehova,
Owasikhupha enarheni yeGibhide,+
Owasinqophisa bona siphume emmangweni,
Enarheni yamarhalawumba+ namapetsi,
Enarheni yesomiso+ neyesithunzi esimnyama,
Enarheni lapho abantu bangakhambi khona
Lapho kungahlali khona abantu?’
7 Yeke nganisa enarheni yamasimu weenthelo,
Bona nidle iinthelo zayo nezinto zayo ezimnandi.+
Kodwana nafika kiyo nasilaphaza inarhami;
Nenza ilifa lami into enyenyisako.+
8 Abaphristi akhenge babuze ukuthi, ‘Uphi uJehova?’+
Labo abaphatha umthetho akhenge bangazi,
Abelusi bahlubuka kimi,+
Abaphorofidi baphorofida ngegama lakaBhali,+
Begodu balandela labo abangabazuzisi ngalitho.
9 ‘Yeke ngizokuragela phambili ngilwa nani,’+ kutjho uJehova,
‘Ngizokulwa namadodana wamadodanenu.’
10 ‘Kodwana yamelani eenarheni ezimagega nelwandle zeKithi,+ nibone.
Iye, thumelani isithunywa eKedari+ begodu nitjheje;
Nibone ukuthi into enje ikhe yenzeka na.
11 Inga-kghani isitjhaba khesatjhugulula abozimu baso ngebanga lalabo ebangasibozimu?
Kodwana abantu bami balahle iphazimulwami ngebanga lento engasizi ngalitho.+
12 Rareka wena zulu;
Hlengezela ngebanga lokusaba,’ kutjho uJehova,
13 ‘Ngombana abantu bami benze izinto ezimbi ezimbili:
Bangilahlile mina mthombo wamanzi aphilako,+
Bazembela amapetsi,
Amapetsi aphukileko angakghoni ukumumatha amanzi.’
14 U-Israyeli sisebenzi namkha ubelethelwe ebugqilini?
Yeke kubayini anikelwe bona adlelezelwe?
15 Amabhubezi amancani ayambhodlela;+
Aphakamisa ilizwi lawo.
Enze inarhakhe into ethusako.
Amadorobhakhe atjhiswe
ngomlilo, bona kungabi nesakhamuzi.
16 Abantu beNofi*+ nebeTarhipanirhesi+ badla isihlohlo esisehlokwakho.
17 Kghani anikaziletheli lokhu nina ngokwenu
Ngokulahla uJehova uZimenu+
Kukulapho aninqophisa endleleni?
18 Nje-ke kubayini nifisa indlela eya eGibhide+
Bona niyokusela amanzi weTjhirhori?*
19 Ukukhohlakala kwakho kufuze kukulungise,
Nokungathembeki kwakho kufuze kukukhalime.
Kufuze wazi bewubone ukuthi kumbi begodu kubuhlungu kangangani+
Ukutjhiya uJehova uZimakho;
Akhenge ungisabe,’+ kutjho iKosi ePhakemeko uJehova wamabutho.
20 ‘Ngombana kusukela kade ngaphahlaza ijogi lakho+
Ngaquntula iinketani zakho.
Kodwana wathi: “Angekhe ngilotjhe,”
Ngombana phezu kwayo yoke imibundu ephakemeko nangaphasi kwayo yoke imithi ehlaza+
Bewulele ngomhlana njengengwadla.+
21 Ngatjala amadiribe abomvu akhethekileko,+ woke wembewu ephuma phambili;
Kuze njani bona utjhuguluke ube yihlumela elingatjho litho, isimu yamadiribe engaziwako phambi kwami?’+
22 Ngitjho nanyana ungahlamba ngesoda* usebenzise isibha esinengi,
Umlandwakho usazokuba njengekolo phambi kwami,’+ kutjho iKosi ePhakemeko uJehova.
23 Ungatjho njani ukuthi, ‘Akhenge ngizisilaphaze.
Akhenge ngilandele aboBhali’?
Qala indlelakho emrhobeni.
Qala bona wenzeni.
Unjengekamela elincani elisikazi elinebelo,
Elehla lenyuka lingazi bona liyaphi,
24 Udumbana wommango ojayele ukuya emmangweni,
Onukelela umoya ngebanga lekanuko.
Ngubani ongamvimba nakatjhiswa yikanuko?
Akakho kilabo abamfunako okutlhogeka bona aziqede amandla.
Bazomfumana ngesikhathi sakhe.
25 Lisa ukugijima nakungasinjalo iinyawo zakho zizokugcina zingakafaki litho
Nomphimbwakho uzokoma.
Kodwana uthe, ‘Akunathemba!+
26 Njengeenhloni zesela nalibanjiweko,
Indlu ka-Israyeli iphathiswe iinhloni,
Yona, amakhosayo namakhosanayo,
Abaphristi bayo nabaphorofidi bayo.+
27 Bathi emthini, ‘Ungubabethu,’+
Bathi elitjeni, ‘Usibelethile.’
Kodwana mina bayangifulathela, abangiqali.+
Nabehlelwa yihlekelele bazokuthi,
‘Yewize uzosisindisa!’+
28 Nje-ke baphi abozimu benu enizenzele bona?+
Abeze nange banganisindisa nanehlelwa yihlekelele,
Ngombana abozimu benu babe banengi njengamadorobhenu, wena Juda.+
29 ‘Kubayini nisolo nilwa nami?
Kubayini noke ningihlubukile?’+ kutjho uJehova.
30 Ngibethe amadodanakho ngaphandle kwesizathu.+
Akhenge afune ukwamukela isiyalo;+
Isabulakho ngiyo ebulele abaphorofidi bakho,+
Njengebhubezi elikhambakhamba lifuna ukurhiribidela.
31 Maye! Sizukulwana, zifuneleni ngokwenu ilizwi lakaJehova.
Kghani ngibe njengommango ku-Israyeli
Namkha njengenarha yobumnyama obugandelelako?
Kubayini abantu bami bathi, ‘Sizikhambela ngokutjhaphulukileko.
Angekhe siseza kuwe’?+
32 Intombi ingalibala imikghabiswayo,
Namkha umakoti alibale amabhandakhe wokuzikghabisa?
Kodwana abantu bami bangilibale amalanga amanengi.+
33 Maye! Mfazi, qala bona uyilungise kuhle kangangani indlelakho yokufuna ithando.
Uzibandulele iindlela zokukhohlakala.+
34 Ngitjho nezambatho zakho zinamakolo weengazi zabantu abanganamlandu, abatlhagako,+
Ngitjho nanyana ngingakabafumani bagqekeza;
Zikizo zoke izambatho zakho.+
35 Kodwana uthi, ‘Anginamlandu.
Nakanjani ungikwatele.’
Nje-ke ngiletha isahlulelo malungana nawe
Ngombana uthi, ‘Angikoni.’
36 Kubayini ukuthathela phasi ukungathembeki kwakho?
37 Ngebanga lalokhu, uzokukhamba uthwele izandla ehloko,+
Ngombana uJehova ubalile labo othembele kibo;
Angekhe bakuphumelelise.”