Hezekiyeli
24 Ilizwi lakaJehova lafika kimi godu ngomnyaka wethoba, ngenyanga yetjhumi, ngelanga letjhumi lenyanga, lithi: 2 “Ndodana yomuntu, tlola phasi ilangeli,* ngelangeli. Ikosi yeBhabhiloni yathoma ukusahlela iJerusalema ngelangeli.+ 3 Yitjho isaga malungana nendlu ehlubukako begodu uthi ngabo:
“‘Nakhu iKosi ePhakemeko uJehova ekutjhoko:
“Beka ipoto yokupheka; uyibeke emlilweni uthele amanzi kiyo.+
4 Faka iintokana zenyama ngaphakathi kwayo,+ zoke iintokana ezihle.
Inyonga nehlombe; uyizalise ngamathambo akhethekileko.
5 Thatha imvu enone ukuzidlula zoke emhlanjini,+ ubaselele ngeenkuni phasi kwepoto.
Udlhabhazise iintoki begodu upheke amathambo phakathi kwayo.”’
6 “Nje-ke nakhu iKosi ePhakemeko uJehova ekutjhoko:
‘Maye! Edorobheni eliphalaza iingazi,+ ipoto yokupheka erusileko, ukurusa kwayo okungakasuswa.
Khupha iintoki kancanikancani;+ ungenzi ifumbe ngazo.
7 Iingazi zalo zikilo;+ zilithululele elitjeni.
Akhenge zilithululele ehlabathini bona ziligubuzese ngethuli.+
8 Bona ilaka lami lokuzibuyiselela livuke,
Ngitjhiye iingazi zalo elitjeni elibenyezelako
Bona lingagubuzeswa.’+
9 “Nje-ke nakhu iKosi ePhakemeko uJehova ekutjhoko:
‘Maye! Edorobheni eliphalaza iingazi.+
Ngizokupakelanisa iinkuni zitjhinge phezulu.
10 Buthelela iinkuni ubase umlilo,
Ubilise inyama ivuthwe, uthulule umhluzayo begodu ulise amathambo atjhe.
11 Beka ipoto enganalitho emalahleni uyitjhisise
Bona ikhopha yakhona itjhise ibe bomvu.
Ukungahlwengeki kwayo kuzokuncibilika kiyo+ nokurusa kwayo kuzokutjha.
12 Kuyasilinga begodu kuyadanisa,
Ngombana ukurusa angekhe kusuke.+
Lilahlele emlilweni nokurusa kwalo!’
13 “‘Ukusilaphala kwakho kubangelwe zizenzo zakho ezihlazisako.+ Ngilingile ukukuhlwengisa kodwana akhenge uhlwengeke ekusilaphaleni kwakho. Angekhe uhlwengeke bekube kulapho ilaka lami ngokujamelene nawe libohla.+ 14 Mina, Jehova ngikhulumile. Kuzokwenzeka. Ngizokwenza nakanjani, angekhe ngikuzwele angekhe ngizisole.+ Bazokwahlulela ngokweendlela zakho nangezenzo zakho,’ kutjho iKosi ePhakemeko uJehova.”
15 Ilizwi lakaJehova lafika kimi godu, lathi: 16 “Ndodana yomuntu, msinyana ngizokuthathela omthandako.+ Kufuze ungalili; ungarhahlawuli namkha wehle iinyembezi. 17 Lilela ngaphakathi, ungalandeli imithetho yokuzilela abafileko.+ Bopha itjhila elithwalwa ehloko,+ umbathe amapatlagwanakho.+ Kufuze ungazivali iindevu,*+ ungabudli uburotho obulethelwe ngabanye.”+
18 Ngakhuluma nabantu ekuseni, umkami wahlongakala entambama. Nje-ke ekuseni ngenza njengombana ngiyaliwe. 19 Abantu bebathi kimi: “Kghani angekhe wasitjela na ukuthi izinto ozenzakwezi zisithinta njani?” 20 Ngabaphendula ngathi: “Ilizwi lakaJehova lifike kimi lathi, 21 ‘Tjela indlu yakwa-Israyeli uthi: “Nakhu iKosi ephakemeko uJehova ekutjhoko, ‘Ngizokusilaphaza indawami ecwengileko,+ umthombo wokuzikhakhazisa kwenu okukhulu, into ethandekako kini nefiswa yihliziywenu. Amadodana namadodakazenu eniwatjhiyileko azokuwa ngesabula.+ 22 Nje-ke kuzokufuze nenze ngendlela engenze ngayo. Kufuze ningavali iindevu zenu, angekhe nibudle uburotho enibulethelwa ngabanye.+ 23 Amatjhilenu athwalwa ehloko azokuba seenhloko zenu amapatlagwanenu azokuba seenyaweni zenu. Angekhe nilile namkha nirhahlawule. Kunalokho, nizokubolela emitjhaphwenenu+ nizokulila komunye nomunye. 24 UHezekiyeli ube litshwayo kini.+ Njengombana enzile nani nizokwenza njalo. Nakwenzekako, kuzokufuze nazi ukuthi, nginguJehova iKosi ePhakemeko.’”’”
25 “Wena ndodana yomuntu, ngelanga engizobathathela ngalo isiphephelo sabo, into yabo ehle ebathabisako, into ethandekako kibo, efiswa ziinhliziyo zabo, kuhlanganise namadodana namadodakazabo,+ 26 Uzokubikelwa ngayo mumuntu ophunyurhileko.+ 27 Ngelangelo uzokuvula umlomakho ukhulume nophunyurhileko, angekhe usathula+ uzokuba litshwayo kibo, kuzokufuze bazi ukuthi nginguJehova.”