Joromiya
19 Nakhu uJehova akutjhoko: “Khamba uyokuthenga umjeka owenziwe ngebumba kumbumbi.+ Thatha abanye abadala hlangana nabantu nabanye abadala hlangana nabaphristi, 2 utjhinge emRhobeni wendodana kaHinomu,+ ebungenweni beSango leDengela. Nawufika lapho umemezele amezwi engikutjela wona. 3 Uzokuthi, ‘Yizwani ilizwi lakaJehova nina makhosi wakwaJuda nani zakhamuzi zeJerusalema. Ngilokhu uJehova wamabutho, uZimu ka-Israyeli akutjhoko:
“‘“Ngizokuletha ihlekelele endaweni le, nanyana ngubani ozwa ngayo uzokuthukwa.* 4 Kungebanga lokuthi bangilahlile+ begodu benze indawo le yangabonakali.+ Benzela abozimu abangabaziko imihlatjelo endaweni le, bona nabokhokho babo, namakhosi wakwaJuda. Bazalise indawo le ngeengazi zabantu abanganamlandu.+ 5 Bakhele uBhali iindawo eziphakemeko bona batjhise amadodanabo abe mnikelo otjhiswako opheleleko kaBhali,+ into engingakhenge ngibayale bona bayenze namkha ngikhulume ngayo, engakhenge nakancani ifike ehliziywenami.”’+
6 “‘“Yeke qala! Isikhathi siyeza,” kutjho uJehova, “lapho indawo le ingekhe isabizwa ngokuthi yiTofethi namkha mRhoba wendodana kaHinomu kodwana izokubizwa ngokuthi mRhoba wokuRhayilwa.+ 7 Ngizokukhandela amaqhinga kaJuda neJerusalema endaweni le, ngizobenza babulawe ngesabula phambi kwamanababo nangesandla salabo abafuna ukubabulala. Begodu iindumbu zabo zizokuba kukudla kweenyoni zezulu nekweembandana zephasi.+ 8 Ngizokwenza idorobheli libe yinto esatjwako nento yokubethelwa umlozi. Woke umuntu odlula ngakiyo uzoyirarekela athukiwe begodu abethe umlozi phezu kwazo zoke iimbetho zalo.+ 9 Ngizobenza badle inyama yamadodanabo neyamadodakazabo, begodu omunye nomunye uzokudla inyama yomuntu akunye naye, ngebanga lokuvinjezelwa nokuphelelwa lithemba lokha nababhodwe manababo nalabo abafuna ukubabulala.”’+
10 “Nje-ke phula umjeka phambi kwamehlo wabantu okhamba nabo, 11 uthi kibo, ‘Ngilokhu uJehova wamabutho akutjhoko: “Ngizobaphula njalo abantwaba nedorobheli, njengomuntu ophula isitja sombumbi bona singasalungiseki; begodu bazokubulunga iindumbu eTofethi bekube kulapho kungasanandawo yokubulunga.”’+
12 “‘Ngilokhu engizokwenza endaweni le,’ kutjho uJehova, ‘nezakhamuzini zalo, bona ngenze idorobheli libe njengeTofethi. 13 Izindlu zeJerusalema nezindlu zamakhosi wakwaJuda zizokusilaphala njengendawo le, iTofethi,+ zoke izindlu ebebenza kizo imihlatjelo phezu kwamaphahla benzela loke ibutho lezulwini+ begodu bathululela abanye abozimu umnikelo wesiselo.’”+
14 Lokha uJoromiya nakabuya eTofethi lapho uJehova ebekamthumele khona bona ayokuphorofida, wajama esirhodlweni sendlu kaJehova wathi kibo boke abantu: 15 “Nakhu uJehova wamabutho uZimu ka-Israyeli akutjhoko, ‘Ngiletha ihlekelele engikhulume ngayo ngokujamelene nedorobheli nawo woke amadorobhalo, ngombana babhale ukulalela amezwami ngekani.’”+