Yokuthoma YamaKhosi
14 Ngesikhatheso u-Abhiya indodana kaJerobhowamu wagula. 2 Ngalokho uJerobhowamu wathi kumkakhe: “Ngibawa uye eTjhilo kodwana uzenze ngasuthi ungomunye umuntu ukuze abantu bangaboni ukuthi umkaJerobhowamu. U-Arhiya umphorofidi ulapho. Nguye owakhuluma ngokuba kwami yikosi ebantwinaba.+ 3 Thatha uburotho obulitjhumi, amakuke nomjeka weliju utjhinge kuye. Yena-ke uzokutjela ukuthi kuzokwenzakalani ngomsanyanethu lo.”
4 UmkaJerobhowamu wenza lokho uJerobhowamu akutjhoko. Watjhinga eTjhilo+ bewafika endlini ka-Arhiya. Amehlo ka-Arhiya bewaqale poro phambili kodwana bekangaboni ngebanga lokuluphala.
5 Kodwana uJehova bekatjele u-Arhiya ukuthi: “UmkaJerobhowamu uyeza uzokubuza ngendodanakhe ngombana iyagula. Ngizokutjela ukuthi kufuze uthini kuye. Nakafikako uzozenza ngasuthi ungomunye umuntu.”
6 Kwathi u-Arhiya nakezwa itjhada leenyawo zomkaJerobhowamu njengombana atjhidela emnyango, wathi: “Ngena mkaJerobhowamu. Kubayini uzenza ngasuthi ungomunye umuntu? Ngithunywe bona ngikunikele umlayezo obuhlungu. 7 Khamba uyokutjela uJerobhowamu ukuthi, ‘UJehova uZimu ka-Israyeli uthi: “Ngakukhuphula phakathi kwabantu bekhenu ngakwenza umrholi wabantu bami u-Israyeli.+ 8 Ngahluthula umbuso endlini kaDavida ngawunikela wena.+ Kodwana azange ube njengencekwami uDavida, owalalela imiyalwami bese wangilandela ngayo yoke ihliziywakhe, enza okulungileko kwaphela emehlwenami.+ 9 Kodwana uthuwelele ukudlula boke abangaphambi kwakho, wazenzela uzimu neenthombe zesimbi bona unginyenyise+ begodu ungifulathele.+ 10 Ngebanga lalokho, ngiletha amatlhuwo endlini kaJerobhowamu, ngizokurhayila koke okuduna kuJerobhowamu kuhlanganise abangasililitho nababogabogako kwa-Israyeli, ngizoyithanyela nya indlu kaJerobhowamu,+ njengalapho umuntu asusa ubulongwe kungasali litho! 11 Nanyana ngubani ongowakaJerobhowamu ofela edorobheni, uzokudliwa zizinja nanyana ngubani ofela emmangweni, uzokudliwa ziinyoni zomkayi ngombana uJehova ukhulumile.”’
12 “Nje-ke sikima uye endlinakho. Kuzakuthi nawungena ngedorobheni, umntwana ahlongakale. 13 Woke u-Israyeli uzomlilela, ambulunge ngombana nguye yedwa womndeni kaJerobhowamu ozokulaliswa ethuneni ngombana nguye yedwa wendlu kaJerobhowamu uJehova uZimu ka-Israyeli afumene okuthileko okuhle kuye. 14 UJehova uzozivusela ikosi kwa-Israyeli ezokurhayila indlu kaJerobhowamu+ kusukela mhlokho kuye phambili, iye, ngitjho nanje. 15 UJehova uzomdula phasi u-Israyeli njengomhlanga odengezela emanzini, uzokusiphula u-Israyeli enarheni ehle le ayinikela abokhokho bakhe+ bese uzobaphadlhalaja ngaphetjheya koMlambo,*+ ngombana benze iingodo ezicwengileko*+ zabo, basilinga uJehova. 16 Uzomlahla u-Israyeli ngebanga lezono uJerobhowamu azenzileko begodu wabangela u-Israyeli ukuthi azenze.”+
17 Yeke umkaJerobhowamu wasikima wakhamba bewayokufika eTiritsa. Kuthe nakafika ebungenweni bendlu, umsana wahlongakala. 18 Yeke bambulunga begodu u-Israyeli woke wamlilela ngokuvumelana nelizwi lakaJehova alikhuluma ngencekwakhe u-Arhiya umphorofidi.
19 Woke omunye umlando kaJerobhowamu, indlela ebekalwa ngayo izipi+ nendlela abusa ngayo, utloliwe encwadini yomlando weenkhathi zamakhosi wakwa-Israyeli. 20 UJerobhowamu wabusa iminyaka ema-22, ngemva kwalokho walaliswa nabokhokho bakhe;+ indodanakhe uNadabi yaba yikosi esikhundleni sakhe.+
21 Kusesenjalo, uRerhobhowamu indodana kaSolomoni waba yikosi kwaJuda. URerhobhowamu bekaneminyaka ema-41 nakaba yikosi begodu wabusa iminyaka eli-17 eJerusalema, idorobho uJehova alikhetha+ hlangana nazo zoke iintjhaba zakwa-Israyeli bona libe yindawo azokubeka kiyo igama lakhe.+ Igama lakanina kaRerhobhowamu bekunguNama umAmonikazi.+ 22 UJuda bekenza okumbi emehlweni kaJehova+ begodu bamsilinga ukudlula abokhokho babo ngezono abazenza.+ 23 Nabo basolo bazakhela iindawo eziphakemeko, iinsika ezicwengileko neengodo ezicwengileko*+ phezu kwayo yoke imibundu ephakemeko+ nangaphasi kwayo yoke imithi ehlaza.+ 24 Godu enarheni bekuneengwadla zamadoda zethempelini.+ Benza ngokwazo zoke izinto ezinyenyisako zeentjhaba uJehova aziqotha phambi kwama-Israyeli.
25 Ngomnyaka wesihlanu weKosi uRerhobhowamu, ikosi yeGibhide uTjhitjhakhi,+ yakhuphuka izokulwa neJerusalema.+ 26 Yathatha amagugu wendlu kaJehova namagugu wendlu yekosi.*+ Yathatha koke kuhlanganise nazo zoke iimviko zegolide ezenziwa nguSolomoni.+ 27 Yeke iKosi uRerhobhowamu yenza iimviko zekhopha esikhundleni sazo, yaziphathisa iinkhulu zabonogada, ebebagada ubungeno bendlu yekosi. 28 Qobe ikosi nayiza endlini kaJehova, abonogada bebazithatha, kuthi ngemva kwalokho bazibuyisele ekumbeni yabonogada.
29 Woke omunye umlando kaRerhobhowamu, koke akwenzileko, akukatlolwa na encwadini yomlando weenkhathi zamakhosi wakwaJuda?+ 30 Bekuhlala kunepi phakathi kwakaRerhobhowamu noJerobhowamu.+ 31 Ngemva kwalokho, uRerhobhowamu walaliswa nabokhokho bakhe bewabulungwa nabokhokho bakhe eDorobheni lakaDavida.+ Igama lakanina bekunguNama umAmonikazi.+ Indodanakhe u-Abiyamu*+ yaba yikosi esikhundleni sakhe.