Joromiya

36 Nje-ke ngomnyaka wesine kaJehoyakhimu+ indodana kaJosiya, ikosi yakwaJuda, ilizweli lafika kuJoromiya livela kuJehova lithi: 2 “Thatha umsongo utlole kiwo woke amezwi engiwakhulume kuwe ngokujamelene no-Israyeli, uJuda+ nazo zoke iintjhaba,+ kusukela elangeni lokuthoma engakhuluma nawe ngalo emalangeni kaJosiya bekube kunamhlanjesi.+ 3 Mhlamunye indlu yakwaJuda nayizwa ngayo yoke ihlekelele engihlele ukuyilethela yona, izokutjhuguluka eendleleni zayo ezikhohlakeleko, bona ngiyilibalele umtjhaphwayo nesono sayo.”+

4 UJoromiya wabiza uBharuki+ indodana kaNeriya, wamtjela woke amezwi uJehova awakhulume kuye, uBharuki wawatlola emsongweni.+ 5 Nje-ke uJoromiya wayala uBharuki wathi: “Ngivalelekile begodu angikghoni ukungena ngendlini kaJehova. 6 Yeke wena kufuze ungene begodu ufundele phezulu amezwi kaJehova engikutjele wona asemtlolweni owutlolileko. Uzowafundela abantu endlini kaJehova ngelanga lokuzila; uzowafundela abantu bakwaJuda abeza bavela emadorobhenabo. 7 Mhlamunye isibawo sabo somusa sizokufika kuJehova baphenduke, omunye nomunye wabo abuye eendleleni zakhe ezikhohlakeleko, ngombana ilaka elikhulu nokusilingeka kwakaJehova kubikezelwe ngokujamelene nabantwaba.”

8 Nje-ke uBharuki indodana kaNeriya wenza koke uJoromiya umphorofidi amyale ngakho; wawafundela phezulu amezwi kaJehova asemsongweni* endlini kaJehova.+

9 Nje-ke ngomnyaka wesihlanu kaJehoyakhimu+ indodana kaJosiya, ikosi yakwaJuda, ngenyanga yethoba, boke abantu beJerusalema nabo boke abantu abeza eJerusalema bavela emadorobheni wakwaJuda, bamemezela ukuzila phambi kwakaJehova.+ 10 Ngemva kwalokho uBharuki wafundela phezulu amezwi kaJoromiya asemsongweni* endlini kaJehova ekumbeni* kaGemariya+ indodana kaTjhafani+ umkopululi, esirhodlweni esiphezulu, ebungenweni besango elitjha lendlu kaJehova,+ alalelwe ngibo boke abantu.

11 UMikaya indodana kaGemariya indodana kaTjhafani nakezwa woke amezwi kaJehova asemsongweni,* 12 wehlela endlini yekosi, elawini lakanobhala. Woke amakhosana ebekahlezi lapho: Bekungu-Elitjhama+ unobhala, uDelaya indodana kaTjhemaya, u-Elinathani+ indodana ka-Akibori,+ uGemariya indodana kaTjhafani, uTsedekhiya indodana kaRhananiya nawo woke amanye amakhosana. 13 UMikaya wabatjela woke amezwi awezwa lokha uBharuki nakafunda umsongo* alalelwe babantu.

14 Ngemva kwalokho woke amakhosana athumela uJehudi indodana kaNetaniya indodana kaTjhelemiya indodana kaKutjhi kuBharuki, athi: “Yewize begodu uze nomsongo owufunde lokha nawulalelwe babantu.” UBharuki indodana kaNeriya waya kiwo aphethe umsongo ngesandla. 15 Athi kuye: “Sibawa uhlale phasi, usifundele wona phezulu.” Nje-ke uBharuki wabafundela wona.

16 Msinyana ngemva kokuthi bezwe woke amezwi la, baqalana bathukiwe, bathi kuBharuki: “Nakanjani kufuze sitjele ikosi woke amezwi la.” 17 Babuza uBharuki bathi: “Sibawa usitjele ukuthi uwatlole njani woke amezwi la. Bekakubizela wona na?” 18 UBharuki wabaphendula wathi: “Ungibizele woke amezwi la, mina ngawatlola nge-enke emsongweni lo.”* 19 Amakhosana athi kuBharuki: “Khamba uyozifihla wena noJoromiya begodu ningavumeli muntu azi ukuthi nikuphi.”+

20 Nje-ke bangena ngekosini esirhodlweni, begodu babeka umsongo ngelawini laka-Elitjhama unobhala, batjela ikosi ngakho koke abakuzwileko.

21 Nje-ke ikosi yathumela uJehudi+ bona ayokuthatha umsongo, weza nawo uvela elawini laka-Elitjhama unobhala. UJehudi wathoma ukuwufundela ikosi nawo woke amakhosana ajame hlanu kwekosi. 22 Ikosi beyihlezi endlini yebusika, ngenyanga yethoba,* kuvutha umlilo eziko phambi kwayo. 23 Ngemva kokuthi uJehudi afunde iingcenye ezintathu namkha ezine, ikosi beyisika iingcenyezo ngomukhwa kanobhala, izifake emlilweni ebewuvutha phambi kwayo, bekwaba kulapho woke umsongo ufakwe ngemlilweni obewuseziko. 24 Akhenge bathukwe; ikosi nazo zoke iinsebenzi zayo ezizwe amezwi la akhenge barathule izambatho zabo. 25 Ngitjho nanyana u-Elinathani,+ uDelaya+ noGemariya+ bancenga ikosi bona ingatjhisi umsongo lo, akhenge ibalalele. 26 Ngaphezu kwalokho ikosi yayala uJerarhimiyeli indodana yekosi, uSeraya indodana ka-Azriyeli noTjhelemiya indodana ka-Abidiyeli bona babambe uBharuki unobhala noJoromiya umphorofidi, kodwana uJehova bekasolo abafihlile.+

27 Ilizwi lakaJehova lafika godu kuJoromiya ngemva kokuthi ikosi itjhise umsongo ebewunamezwi uBharuki awatlola nakabizelwa nguJoromiya,+ athi: 28 “Thatha omunye umsongo utlole woke amezwi afana nalawa ebewasemsongweni wokuthoma, lowo iKosi uJehoyakhimu yakwaJuda ewutjhisileko.+ 29 Kufuze uthi ngokujamelene neKosi yakwaJuda uJehoyakhimu, ‘Nakhu uJehova akutjhoko: “Utjhise umsongo lo begodu wathi, ‘Kubayini utlole kiwo ukuthi: “Ikosi yeBhabhiloni nakanjani izokuza, itjhabalalise inarha le begodu iyitjhiye inganamuntu nesibandana”?’+ 30 Nje-ke nakhu uJehova akutjhoko ngokujamelene neKosi yakwaJuda uJehoyakhimu, ‘Angekhe kube nesizukulwana sayo esizokuhlala esihlalweni sobukhosi sakaDavida+ begodu isidumbu sayo sizokutjhiywa bona sitjhiswe lilanga emini, ebusuku sibetjhwe makhaza.+ 31 Ngizoyibiza yona neenzukulwana zayo neensebenzi zayo bona baphendule ngebanga lomtjhaphwabo begodu ngizokuletha kibo nezakhamuzini zeJerusalema nebantwini bakwaJuda yoke ihlekelele engikhulume ngayo ngokujamelene nabo,+ kodwana akhenge balalele.’”’”+

32 Ngemva kwalokho uJoromiya wathatha omunye umsongo, wawunikela uBharuki indodana kaNeriya unobhala,+ abizelwa nguJoromiya watlola kiwo woke amezwi womsongo lowo iKosi uJehoyakhimu yakwaJuda eyawutjhisa emlilweni.+ Wangezelela namanye amezwi anjengalawo.