Isaya
39 Ngesikhatheso ikosi yeBhabhiloni, uMerodaki-Bhaladani indodana kaBhaladani, yathumela iincwadi nesipho kuHezekiya+ ngombana beyizwile bona bekagula begodu sekapholile.+ 2 UHezekiya wazamukela iinthunywezo, wazitjengisa indlwakhe yoke yamagugu,+ isiliva, igolide, amafutha webhalisamu namafutha aligugu nendawo abeka kiyo iinkhali nakho koke ebekufunyanwa emabulungelwenakhe wamagugu. Akunanto uHezekiya angakhenge ayitjengise zona endlinakhe* nembuswenakhe woke.
3 Ngemva kwalokho, umphorofidi u-Isaya weza eKosini uHezekiya, wambuza wathi: “Amadoda la atheni begodu avelaphi?” UHezekiya wathi: “Avela enarheni ekude, eBhabhiloni.”+ 4 Ngemva kwalokho, wabuza wathi: “Aboneni ngendlinakho?”* UHezekiya waphendula wathi: “Abone koke okungendlinami.* Akunanto engingakawatjengisi yona emabulungelwenami wamagugu.”
5 Nje-ke u-Isaya wathi kuHezekiya: “Lalela ilizwi lakaJehova wamabutho, 6 ‘Qala! Kuza amalanga lapho koke okusendlinakho nakho koke abokhokho bakho abakubekileko bekube kunamhlanjesi kuzokuthathwa kusiwe eBhabhiloni. Akunalitho elizokusala,’+ kutjho uJehova.+ 7 ‘Amanye amadodana ozokubelethelwa wona azokuthathwa ayokuba ziinkhulu zesigodlo sekosi yeBhabhiloni.’”+
8 Khonokho uHezekiya wathi ku-Isaya: “Lizwakala kuhle ilizwi elikhulunywe nguJehova.” Ngemva kwalokho, wangezelela wathi: “Ngombana kuzokuba nokuthula neqiniso emihleni yokuphila kwami.”+