Yesibili YamaKhosi
14 Ngomnyaka wesibili wokubusa kwakaJowatjhi+ indodana kaJehowarhazi ikosi yakwa-Israyeli, u-Amaziya indodana kaJowatjhi iKosi yakwaJuda waba yikosi. 2 Bekaneminyaka ema-25 nakaba yikosi begodu wabusa iminyaka ema-29 eJerusalema. Igama lakanina bekunguJehowadini weJerusalema.+ 3 Waraga nokwenza okuhle emehlweni kaJehova kodwana ingasi njengokhokhwakhe uDavida.+ Wenza koke njengombana kwenza uyise uJowatjhi.+ 4 Kodwana iindawo eziphakemeko akhenge zisuswe,+ abantu bebasenza imihlatjelo begodu bathunyisa intuthu yomhlatjelo eendaweni eziphakemeko.+ 5 Msinyana ngemva kobana umbuswakhe sewunzinzile, wabulala iinsebenzi zakhe ezabulala uyise ikosi.+ 6 Kodwana akhenge abulale amadodana wababulalaba, ngokuvumelana nomyalo kaJehova otlolwe encwadini yomThetho kaMosi othi: “Abobaba akukafuzi babulawe ngebanga lamadodanabo, namadodana akukafuzi abulawe ngebanga laboyise; kodwana ngamunye kufuze abulawe ngebanga lesono sakhe.”+ 7 Wabulala ama-Edomu+ emRhobeni weTswayi,+ amadoda azii-10 000 begodu wathumba iSela epini,+ labizwa ngokuthi yiJokithiyeli bekube kunamhlanjesi.
8 U-Amaziya wathumela iinthunywa ekosini yakwa-Israyeli uJowatjhi indodana kaJehowarhazi indodana kaJehu wathi: “Yewize sizokulwa epini.”+ 9 UJowatjhi iKosi yakwa-Israyeli wathumela umlayezo ku-Amaziya iKosi yakwaJuda wathi: “Ikhula elinameva eliseLibhanoni lathumela umlayezo emthini womsedari oseLibhanoni lathi, ‘Vumela indodanami bona ithathe indodakazakho ibe mkayo.’ Kodwana isibandana seLibhanoni sadlula lapho sagadanga ikhula elinameva. 10 Kwamambala umhlulile u-Edomu,+ ngikho sewuzikhakhazisa kangaka. Thabela iphazimulwakho kodwana uhlale emzinakho.* Kubayini ufuna ukuzibangela ihlekelele begodu utjhabalale nabantu bakwaJuda?” 11 Kodwana u-Amaziya akhenge alalele.+
Nje-ke uJowatjhi iKosi yakwa-Israyeli wakhuphuka begodu yena no-Amaziya iKosi yakwaJuda bayokuzwana amandla epini eBhethe-Tjhemetjhi+ yakwaJuda.+ 12 AmaJuda ahlulwa ma-Israyeli begodu omunye nomunye wabalekela emzinakhe.* 13 UJowatjhi iKosi yakwa-Israyeli wathumba iKosi yakwaJuda u-Amaziya indodana kaJowatjhi indodana ka-Arhaziya, eBhethe-Tjhemetjhi. Ngemva kwalokho, baya eJerusalema, wafika lapho wagiriza umthangala weJerusalema ukusukela eSangweni lakwa-Efrayimu+ ukuya eSangweni eliseKhoneni,+ okulibanga elimakhubhithi* ama-400. 14 Wathatha loke igolide nesiliva nazo zoke izinto ezafunyanwa ngendlini kaJehova nangemabulungelweni wamagugu wendlu yekosi, wathatha neenthunjwa. Ngemva kwalokho, wabuyela eSamariya.
15 Malungana nawo woke omunye umlando kaJowatjhi, akwenzileko, amandlakhe nendlela alwa ngayo no-Amaziya iKosi yakwaJuda, akukatlolwa na encwadini yomlando weenkhathi zamakhosi wakwa-Israyeli? 16 Nje-ke uJowatjhi walaliswa nabokhokho bakhe, wabulungwa eSamariya+ namakhosi wakwa-Israyeli; uJerobhowamu*+ indodanakhe waba yikosi esikhundleni sakhe.
17 Ikosi yakwaJuda u-Amaziya,+ indodana kaJowatjhi,+ yaphila iminyaka eli-15 ngemva kokuhlongakala kwekosi yakwa-Israyeli uJowatjhi indodana kaJehowarhazi.+ 18 Woke omunye umlando ka-Amaziya, awukatlolwa na encwadini yomlando weenkhathi zamakhosi wakwaJuda? 19 Ngokukhamba kwesikhathi, bamlukela amano+ wokumsahlela eJerusalema, yeke wabalekela eLakitjhi kodwana bathumela amadoda bona amlandele eLakitjhi begodu ambulalela khona. 20 Abuya naye amthwele ngeenjomani, wabulungwa eJerusalema nabokhokho bakhe eDorobheni lakaDavida.+ 21 Ngemva kwalokho, boke abantu bakwaJuda babeka u-Azariya,*+ obekaneminyaka eli-16+ ubudala bona abe yikosi esikhundleni sakayise u-Amaziya.+ 22 Ngemva kobana ikosi* ilaliswe nabokhokho bayo wakha kabutjha i-Elathi+ bese wayibuyisela kuJuda.+
23 Ngomnyaka we-15 wokubusa kwaka-Amaziya indodana kaJowatjhi ikosi yakwaJuda, uJerobhowamu+ indodana kaJowatjhi iKosi yakwa-Israyeli waba yikosi eSamariya, wabusa iminyaka ema-41. 24 Waraga nokwenza okumbi emehlweni kaJehova. Akhenge azitjhiye izono uJerobhowamu indodana kaNebathi abangela u-Israyeli bona azenze.+ 25 Wabuyisela umkhawulo wakwa-Israyeli ukusuka eLebo-Rhamathi*+ ukuyokufika eLwandle le-Araba*+ ngokuvumelana nelizwi uJehova uZimu ka-Israyeli alikhuluma ngencekwakhe uJona+ indodana ka-Amitayi, umphorofidi ovela eGathi-Rheferi.+ 26 Ngombana uJehova bekakubonile ukugandelelwa kabuhlungu kwama-Israyeli.+ Akakho owasalako bona asize ama-Israyeli, ngitjho nabangasililitho namkha ababogabogako. 27 Kodwana uJehova bekathembise ukungalisuli igama laka-Israyeli ngaphasi kwezulu.+ Yeke wabasindisa ngesandla sakaJerobhowamu indodana kaJowatjhi.+
28 Malungana nawo woke omunye umlando kaJerobhowamu, koke akwenzileko, amandlakhe, indlela alwa ngayo nendlela abuyisela ngayo iDamaseku+ neRhamathi+ kuJuda kwa-Israyeli, akukatlolwa na encwadini yomlando weenkhathi zamakhosi wakwa-Israyeli? 29 Ngemva kwalokho, uJerobhowamu walaliswa nabokhokho bakhe, namakhosi wakwa-Israyeli; indodanakhe uZakariya+ yaba yikosi esikhundleni sakhe.