Yesibili YeenKronike
1 USolomoni indodana kaDavida waraga ngokuba namandla ebukhosini bakhe, uJehova uZimakhe bekanaye begodu wamenza waba mkhulu ngokurarako.+
2 USolomoni wabiza u-Israyeli woke, iinduna zeenkulungwana nezamakhulu, abahluleli nawo woke amakhosana wakwa-Israyeli neenhloko zeenkoro zaboyise. 3 Yeke uSolomoni nalo loke ibandla batjhinga endaweni ephakemeko eGibiyoni+ ngombana itende lokuhlangana lakaZimu weqiniso belilapho, okulitende elenziwa nguMosi inceku kaJehova emmangweni. 4 Kodwana uDavida wakhuphula umFaji kaZimu weqiniso usuka eKhiriyathi-Jeyarimu+ wawuletha endaweni uDavida ebekayilungisele wona; bekawuhlomele itende eJerusalema.+ 5 I-aldara lekhopha+ elenziwa nguBhetsaleli+ indodana ka-Uri indodana kaRhuri belibekwe phambi kwethaberinakeli lakaJehova; uSolomoni nebandla bebathandaza phambi kwalo.* 6 Nje-ke uSolomoni wanikela lapho phambi kwakaJehova, wanikela iminikelo etjhiswako eyi-1 000 e-aldareni lekhopha+ letende lokuhlangana.
7 Ngobusukobo uZimu wabonakala kuSolomoni wathi kuye: “Bawa nanyana yini ofuna ngikuphe yona.”+ 8 USolomoni waphendula uZimu wathi: “Umthande khulu* ubaba uDavida+ begodu ungenze ikosi esikhundleni sakhe.+ 9 Yeke Jehova Zimu, asiphetheke isithembiso owasenza kubaba uDavida+ ngombana ungenze ikosi phezu kwabantu abanengi njengehlabathi yephasi.+ 10 Nje-ke ngipha ukuhlakanipha nelwazi+ lokurhola isitjhabesi ngombana ngubani ongahlulela isitjhaba sakho esikhulwesi?”+
11 Yeke uZimu wathi kuSolomoni: “Ngebanga lokuthi lesi sifiso esivela ehliziywenakho nokuthi akhenge ubawe umnotho, ubunjinga nedumo namkha ukufa kwalabo abakuhloyako begodu akhenge ubawe ukuphila isikhathi eside kodwana ubawe ukuhlakanipha nelwazi lokwahlulela abantu bami engikubeke bona ube yikosabo,+ 12 uzokunikelwa ukuhlakanipha nelwazi kodwana ngizokunikela nomnotho nobunjinga nedumo okungekho amakhosi akhe aba nakho ngaphambi kwakho begodu nazokulandela ngemva kwakho angekhe abe nakho.”+
13 Yeke uSolomoni wasuka endaweni ephakemeko eseGibiyoni,+ phambi kwetende lokuhlangana, watjhinga eJerusalema; wabusa kwa-Israyeli. 14 USolomoni wasolo abuthelela iinkarana neenjomani; bekaneenkarana eziyi-1 400 neenjomani ezizii-12 000,+ wazibeka emadorobheni weenkarana+ eduze nekosi eJerusalema.+ 15 Ikosi yenza isiliva negolide eJerusalema laba linengi njengamatje,+ yenza iingodo zomsedari zaba zinengi njengemithi yamafeyi wommango* eTjhefela.+ 16 Iinjomani zakaSolomoni bezithengwa eGibhide,+ isihlopha sabathengisi bekosi besithenga imihlambi yeenjomani* ngentengo engatjhugulukiko.+ 17 Ikarana ngayinye ethengwe eGibhide beyibiza iimpaparwana zesiliva ezima-600 bese injomani ibize iimpaparwana ezili-150 kuthi isihlopha sabathengisi sizithengisele woke amakhosi wamaRhiti neweSiriya.