Isaya
58 Rhuwelela ngephimbo lakho loke; ungazivimbi!
Phakamisa ilizwi lakho njengephondo.
Memezela ebantwini bami ukuvukela kwabo,+
Nendlini kaJakopo izono zabo.
2 Bangifuna ilanga nelanga,
Bathatjiswa kukwazi iindlela zami,
Ngasuthi bebasitjhaba esenza okulungileko
Esingakhenge silahle ubulungiswa bakaZimaso.+
Bangibawa izahlulelo ezilungileko,
Bathatjiswa kutjhidela kuZimu:+
3 ‘Kubayini ungaboni nasizila ukudla?+
Kubayini ungatjheji nasizizwisa ubuhlungu?’+
Kungebanga lokuthi ngelanga enizila ngalo ukudla nizifunela iinzuzo zenu,
Begodu nigandelela iinsebenzi zenu.+
4 Ukuzila kwenu ukudla kuphetha ngokuphikisana nokulwa,
Begodu nibethana ngamaguduva wokukhohlakala.
Anikwazi ukuzila ukudla ngalendlela namhlanjesi begodu ilizwi lenu lizwakale ezulwini.
5 Kghani ukuzila ukudla engikukhethako kufuze kube nje,
Njengelanga umuntu azizwisa ngalo ubuhlungu,
Bona agobise ihlokwakhe njengotjani obude,
Enze umbhedakhe ngomgodla nangomlotha?
Kghani ngikho lokhu enikubiza ngokuthi kuzila ukudla nelanga elithabisa uJehova?
6 Awa, ngilokhu ukuzila ukudla engikukhethako:
Ukususa amakhamandela wokukhohlakala,
Ukutjhaphulula amabhande wejogi,+
Ukutjhaphulula ogandelelweko,+
Nokuphula woke amajogi;
7 Kukwabela olambileko uburotho bakho,+
Ukuletha otlhagako nonganakhaya ngendlinakho,
Ukumbathisa umuntu ohlubule nawumbonako,+
Nokuthi ungajikeli isihlobo sakho.
8 Nje-ke ukukhanya kwakho kuzokuphazimula njengokusa,+
Begodu uzokuphola msinyana.
Ukulunga kwakho kuzokukhamba phambi kwakho,
Nephazimulo kaJehova izokuvikela ngemuva.+
9 Yeke uzokubiza begodu uJehova uzokuphendula;
Uzokulilela isizo begodu uzokuthi, ‘Ngila!’
Nange ususa ijogi hlangana nawe
Begodu ulisa ukukhomba ngomuno nokukhuluma ikulumo elimazako,+
10 Nange upha olambileko lokho okukhanukwa nguwe+
Wanelisa nalabo abaseenhlungwini,
Ukukhanya kwakho kuzokuphazima ngitjho nebumnyameni,
Nobumnyama bakho buzokuba njengemini ekulu.+
11 UJehova uzokunqophisa qobe
Begodu uzokwanelisa ngitjho nenarheni eyomileko;+
Uzokuvuselela amathambakho,
Begodu uzokuba njengesimu ethelelelwe kuhle,+
Njengomthombo onamanzi angapheliko.
12 Bazokwakha kabutjha amarubhi wekadeni ngebanga lakho,+
Begodu bazokuvuselela iinsekelo zeenzukulwana ezidlulileko.+
Uzokubizwa ngokuthi ungumlungisi wamaboda aphukileko,+
Nomvuseleli weendlela ozokuhlala kizo.
13 Nange kungebanga leSabatha ulisile ukufuna izinto ozithandako ngelanga lami elicwengileko+
Begodu ubiza iSabatha ngethabo elikhulu, ilanga lakaJehova elicwengileko, ilanga ekufuze liphazinyuliswe,+
Begodu uyaliphazimulisa kunokobana uzifunele izinto ezithandwa nguwe, ukhulume amezwi angatjho litho,
14 Nje-ke uzokufumana ithabo elikhulu kuJehova,
Begodu ngizokwenza ukhambe eendaweni eziphakemeko zephasi.+
Ngizokubangela bona udle elifeni lakaJakopo ukhokhwakho,+
Ngombana umlomo kaJehova ukhulumile.”