Joromiya
20 UPhatjhirhuri indodana ka-Imeri umphristi, obekamdosiphambili endlini kaJehova, bekalalele lokha uJoromiya nakaphorofida ngezintwezi. 2 Nje-ke uPhatjhirhuri wabetha uJoromiya umphorofidi wamfaka ngesitokisini+ ebesiseSangweni eliPhezulu lakwaBhenjamini, ebelisendlini kaJehova. 3 Ngelanga elilandelako uPhatjhirhuri watjhaphulula uJoromiya esitokisini, uJoromiya wathi kuye:
“UJehova uthi igama lakho awusese nguPhatjhirhuri, kodwana uzokubizwa ngokuthi unguKwesaba okusiZombileko.+ 4 Ngombana ngilokhu uJehova akutjhoko, ‘Uzokuba yinto ethusako kuwe nakibo boke abangani bakho begodu bazokubulawa yisabula yamanababo amehlwakho aqalile;+ begodu ngizokunikela woke uJuda esandleni sekosi yeBhabhiloni, izobasa ekudingisweni eBhabhiloni ibabulale ngesabula.+ 5 Ngizokunikela woke umnotho wedorobheli, zoke izinto ezikhethekileko nawo woke amagugu wamakhosi wakwaJuda ezandleni zamanabawo.+ Koke lokho bazakuphanga, bakuse eBhabhiloni.+ 6 Nakunguwe Phatjhirhuri, nabo boke abahlala endlinakho, nizokuya ekudingisweni. Nizokuya eBhabhiloni nifele lapho begodu uzokubulungelwa lapho, wena nabo boke abangani bakho, ngombana uphorofide amala kibo.’”+
7 Ungirarile Jehova, nami ngarareka.
Usebenzise amandlakho ngokujamelene nami, waphumelela.+
Ngibe yihlekisa ngebanga lakho;
Woke umuntu uhlekisa ngami.+
8 Ngombana nanyana kunini nangikhulumako, kufuze ngirhuwelele begodu ngimemezele, ngithi,
“Inturhu nokutjhatjalaliswa!”
Ngombana ilizwi lakaJehova libangele bona ngidelelwe begodu ngihlanjalazwe ilanga loke.+
9 Nje-ke ngathi: “Angekhe ngisakhuluma ngaye,
Begodu angekhe ngisakhuluma ngegama lakhe.”+
Kodwana ehliziywenami kwaba njengomlilo ovuthako ovalelwe emathanjenami,
Bengidiniwe kuzibamba;
Bengingasakghoni ukukghodlhelela.+
10 Ngombana ngizwe izinto ezinengi ezimbi ngawe;
Ngibhodwe kusaba.+
Bathi: “Asimemezeleni ngaye; Asimemezeleni ngaye!”
Woke umuntu ongifisela ukuthula bekaqale ukuwa kwami:+
“Mhlamunye uzakwenza umtjhapho obudlhadlha,
Begodu sizokuhlula, sizibuyiselele kuye.”
11 Kodwana uJehova bekanami njengengorho esabekako.+
Kungebangelo abangihlunguphazako bazokuwa begodu bangekhe bahlule.+
Bazokuhlaziseka ngombana angekhe baphumelele.
Ihlazo labo angekhe liphele begodu angekhe lilitjalwe.+
12 Kodwana wena Jehova wamabutho, uhlolisisa olungileko;
Ubona imicabango edephileko nehliziyo.+
Ngivumela ngibone ipindiselwakho kibo.+
Ngombana ngilethe umlandwami ongokomthetho kuwe.+
13 Bhinelani uJehova! Dumisani uJehova!
Ngombana usindise otlhagako esandleni sabenzi bokumbi.
14 Aliqalekiswe ilanga engabelethwa ngalo!
Alingabusiswa ilanga umma angibeletha ngalo!+
15 Akaqalekiswe umuntu owaletha iindaba ezimnandi kubaba, wathi:
“Ubelethelwe indodana, umsanyana!”
Okwamenza wathaba khulu.
16 Kwanga indoda leyo ingafana namadorobho uJehova awatjhabalalisileko ngaphandle kokuzisola.
Kwanga ingezwa isililo ekuseni netjhada lepi emini.
17 Kubayini angakangibulali ngisese sesibelethweni,
Bona isibeletho sakamma sibe njengendawo engibulungelwa kiyo
Begodu isibeletho sakhe sihlale sizithwele?+
18 Kubayini ngaphuma esibelethweni
Ngibone umraro nesizi,
Bona amalangami aphele ngendlela ephathisa iinhloni?+