Joromiya
51 Nakhu uJehova akutjhoko:
2 Ngizokuthumela abantu eBhabhiloni,
Bona babahlukanise bazolihlukanisa begodu balenze inarha enganalitho;
Bazokuza ngokujamelene nalo mahlangothi woke ngelanga lehlekelele.+
3 Umdumuzi womsubela akangagobi umsubelakhe.
Akungabi nomuntu osikimako ambethe isambatho sakhe sepi.
Ungawazweli amasokanalo.+
Tjhabalalisa loke ibutho lalo.
5 Ngombana u-Israyeli noJuda abakahlukaniswa kuZimabo uJehova wamabutho.+
Kodwana inarhabo* izele ngomlandu emehlweni wocwengileko ka-Israyeli.
6 Baleka eBhabhiloni,
Begodu usindise ukuphila kwakho.+
Ungatjhabalali ngebanga lemitjhaphwalo.
Ngombana sikhathi sakaJehova sokuzibuyiselela.
Ulijezisa ngebanga lezenzo zalo.+
7 IBhabhiloni belisolo liyikapho yegolide ezandleni zakaJehova;
Lenze loke iphasi ladakwa.
8 Msinyana iBhabhiloni liwile begodu litjhabalele.+
Lililele!+
Lifumaneleni ibhalisamu lobuhlungu balo; mhlamunye lingaphola.”
9 Silingile ukulilapha iBhabhiloni kodwana akhenge lilapheke.
Liliseni, nathi silisani sikhambe, omunye nomunye aye enarhenakhe.+
Ngombana isahlulelo salo sifike ezulwini;
Siphezulu njengamafu.+
10 UJehova usilethele ubulungiswa.+
Yizani, siye eZiyoni siyokubika ngemisebenzi kaJehova uZimethu.”+
11 “Lolani imicibitjholo;+ thathani iinhlangu* eziyindulungu.
UJehova uhlangahlanganise imimoya yamakhosi wamaMede,+
Ngombana ufuna ukutjhabalalisa iBhabhiloni.
Ngombana lokhu kuzibuyiselela kwakaJehova, kuzibuyiselela ngebanga lethempeli lakhe.
12 Phakamisani itshwayo+ ngokujamelene namaboda weBhabhiloni.
Qinisani abonogada, bekani abalindi.
Lungiselelani labo abazifihlileko.
Ngombana uJehova uluke amano,
Begodu uzokwenza akuthembisileko ngokujamelene nezakhamuzi zeBhabhiloni.”+
13 “Maye! Mfazi ohlala emanzini amanengi,+
Namagugwakho amanengi,+
Ukuphela kwakho kufikile, ukuphela* kokwenza kwakho inzuzo.+
14 UJehova wamabutho ufunga ngaye ngokwakhe,
‘Ngizolizalisa ngabantu bazokuba banengi njengeententhe ezinengi,
Bazokurhuwelela ngetjhada lokuthumba ngokujamelene nalo.’+
15 Wenze iphasi ngamandlakhe,
Udzimelelise inarha ekhiqizako ngokuhlakanipha kwakhe+
Walula izulu ngokuzwisisa kwakhe.+
16 Nakenza ilizwi lakhe lizwakale,
Amanzi asezulwini ayatjharagana,
Begodu wenza amafu akhuphuke avela emaphethelweni wephasi.
Wenzela izulu umbani,
Begodu ukhupha umoya ngenlulwini zalo.+
17 Boke abantu baziindlhadlha begodu abanalwazi.
Zoke iinsebenzi zesimbi zizokuphathiswa iinhloni ngebanga lesithombe esibaziweko;+
Ngombana iinthombe zazo zesimbi aziphili,
Begodu aziphefumuli.+
18 Zililize,+ umsebenzi ohlekisako.
Ilanga lazo lesahlulelo nalifikako, zizokutjhabalala.
19 Isabelo sakaJakopo asifani nezintwezi,
Ngombana nguye owenza zoke izinto,
Ngitjho nentonga yelifa lakhe.+
Igama lakhe nguJehova wamabutho.”+
20 “Uyinondwami yepi, isikhali sepi,
Ngawe ngizokuphahlaza iintjhaba.
Ngawe ngizokutjhabalalisa imibuso.
21 Ngawe ngizokuphahlaza iinjomani nabakhweli bazo.
Ngawe ngizokuphahlaza ikarana yepi nomkhwelayo.
22 Ngawe ngizokuphahlaza indoda nomfazi.
Ngawe ngizokuphahlaza indoda edala nomsana.
Ngawe ngizokuphahlaza isokana nentombi.
23 Ngawe ngizokuphahlaza umalusi nomhlambakhe.
Ngawe ngizokuphahlaza umlimi neenkunzi zakhe.
Ngawe ngizokuphahlaza ababusi namasekela wababusi.
24 Ngizozibuyiselela eBhabhiloni nakizo zoke izakhamuzi zamaKhaledi*
Ngabo boke ubumbi ababenze eZiyoni phambi kwamehlwami,”+ kutjho uJehova.
25 “Nje-ke ngijamelene nawe,+ Wena ntaba etjhabalalisako,” kutjho uJehova,
“Wena otjhabalalisa iphasi loke.+
Ngizokulula isandla sami ngokujamelene nawe ngikugedekisele phasi usuka edwaleni
Ngikwenze intaba etjhisiweko.”
26 “Abantu angekhe bakuthathela ilitje eliqakatheke khulu namkha ilitje elisisekelo,
Ngombana uzokuba lirubhi ngokungapheliko,”+ kutjho uJehova.
27 “Phakamisa itshwayo enarheni.+
Vuthela iphondo hlangana neentjhaba.
Beka* iintjhaba ngokujamelene nalo.
Biza imibuso ye-Ararathi,+ yeMini neye-Atjhikenazi+ ngokujamelene nalo.
Thumela ngokujamelene neenkhulu zalo.
Yenza iinjomani zize njengewoma leentethe.
28 Beka* iintjhaba ngokujamelene nalo,
Amakhosi wakwaMediya,+ ababusi nawo woke amasekela wababusi
Nazo zoke iinarha ababusa phezu kwazo.
29 Iphasi lizokuhlengezela belisikinyeke,
Ngombana imicabango kaJehova ngokujamelene neBhabhiloni izokwenzeka
Yokwenza inarha yeBhabhiloni into esatjwako enganazakhamuzi.+
30 Iingorho zeBhabhiloni zilisile ukulwa.
Zihlezi eendaweni ezivikelekileko.
Ziphelelwa mamandla.+
Zinjengomfazi.+
Izindlu zakhe zithungelwe ngomlilo.
Iinsimbi zakhe ziphuliwe.+
31 Isithunywa sigijimela ukuyokuhlangana nesinye isithunywa,
Begodu umbiki uyokuhlangana nomunye umbiki,
Idorobho layo lithunjwe kiwo woke amahlangothi,+
32 Bona amazibuko avinjezelwe,+
Bona iinkepe ezenziwe ngomhlanga zitjhiswe ngomlilo,
Begodu amasotja athukiwe.”
33 Ngilokhu uJehova wamabutho, uZimu ka-Israyeli akutjhoko:
“Indodakazi yeBhabhiloni injengeselelo.
Sikhathi sokuyigandelela phasi.
Msinyana isikhathi sokuthi livune sizokufika.”
Ingibeke phasi njengomjeka onganalitho.
Ingiginye njengenyoka ekulu;+
Izalise amathumbayo ngezinto zami ezihle.
Ingilahlile.
35 ‘Kwanga inturhu eyenziwe kimi ingenziwa neBhabhiloni!’ Kutjho izakhamuzi zeZiyoni.+
‘Begodu iingazi zami zibe phezu kwezakhamuzi zamaKhaledi!’* Kutjho iJerusalema.”
36 Yeke ngilokhu uJehova akutjhoko:
Ngizokomisa ilwandle ngomise nemithombwayo.+
37 IBhabhiloni lizokuba liqubi lamatje,+
Indawo yokulala yeempungutjha,+
Into esatjwako ebetjhelwa umlozi,
Enganazakhamuzi.+
38 Boke bazokubhodla njengamabhubezi amancani.
Bazokwenza itjhada njengabantwana bamabhubezi.”
39 “Nabezwa ubuhlungu, ngizobenzela umnyanya ngibenze badakwe,
Bona bathabe;+
Nje-ke bazokulala ubuthongo obungapheliko,
Engekhe bavuke kibo,”+ kutjho uJehova.
40 “Ngizobaletha njengemvana eyokuhlatjwa,
Njengamaramu neembuzi.”
41 “Maye! ITjhetjhaki* ithunjiwe,+
Qala indlela idorobho ebelidunyiswa ngibo boke abantu elithethwe ngayo!+
Indlela iBhabhiloni elibe ngayo yinto yokusatjwa hlangana neentjhaba!
42 Ilwandle lize phezu kweBhabhiloni.
Ligubuzeswe magagasi.
43 Amadorobhalo abe yinto yokusatjwa, inarha enganamanzi nerhalawumba.
Inarha okunganamuntu ozokuhlala kiyo begodu ekunganamuntu ozokudlula kiyo.+
Iintjhaba angeze zisaya kuye,
Begodu iboda leBhabhiloni lizokuwa.+
45 Phumani kilo, bantu bami!+
Sindisani ukuphila kwenu+ elakeni lakaJehova elivuthako!+
46 Ningapheli amandla namkha nithuswe mibiko enizoyizwa enarheni.
Ngomnyaka munye kuzokufika umbiko,
Begodu ngomnyaka olandelako kuzokufika omunye umbiko,
Omalungana nenturhu enarheni nomalungana nombusi ngokujamelene nomunye umbusi.
47 Nje-ke qala! Amalanga ayeza
Lapho ngizokujezisa iinthombe zeBhabhiloni ezibaziweko.
Yoke inarhalo izokuhlaziswa,
Begodu boke abarhayiliweko balo bazokuwa lapho.+
48 Izulu nephasi nakho koke okukilo
Kuzokurhuwelela ngethabo ngeBhabhiloni,+
Ngombana abatjhabalalisi bazokuza kilo bavela ngetlhagwini,”+ kutjho uJehova.
49 “IBhabhiloni alikabulali u-Israyeli kwaphela+
Kodwana libulele nabo boke abantu abavela ephasini loke.
50 Nina eniphunyurhe isabula, ragelani phambili ningajami!+
Khumbulani uJehova nikude,
Begodu kwanga ningakhumbula iJerusalema eenhliziyweni zenu.”+
51 “Sihlazisiwe ngombana sikuzwile ukunyefulwa.
Ihlazo livale ubuso bethu,
Ngombana abantu abavela kwezinye iinarha beze ngokujamelene neendawo ezicwengileko zendlu kaJehova.”+
52 “Nje-ke qala! amalanga ayeza,” kutjho uJehova,
“Lapho ngizokujezisa iinthombe zeBhabhiloni ezibaziweko,
Begodu kiyo yoke inarhakhe abalinyaziweko bazokukghonghoyila.”+
53 “Ngitjho nanyana iBhabhiloni lingakhuphukela ezulwini,+
Ngitjho nanyana lingaqinisa imibhotjhongwalo evikelekileko,
Abatjhabalalisi balo bazokuvela kimi,”+ kutjho uJehova.
54 “Lalelani! Kunesililo esivela eBhabhiloni,+
Kunetjhada lehlekelele ekulu elivela enarheni yamaKhaledi,*+
55 Ngombana uJehova uzokutjhabalalisa iBhabhiloni,
Uzokuthulisa iphimbo layo elikhulu,
Begodu amagagasabo azokubhodla njengamanzi amanengi.
Itjhada lamaphimbwabo lizokuzwakala.
56 Ngombana umtjhabalalisi uzokuza eBhabhiloni;+
Iingorho zalo zizokuthunjwa,+
Imisubelayo izokuphahlazwa,
Ngombana uJehova unguZimu ojezisako.+
Nakanjani uzozibuyiselela.+
57 Ngizokwenza amakhosana nabantu balo abahlakaniphileko bona badakwe,+
Ababusi balo namasekela wababusi balo neengorho zalo,
Begodu bazokulala ubuthongo obungapheliko,
Engekhe bavuke kibo,”+ kutjho iKosi igama layo nguJehova wamabutho.
58 Ngilokhu uJehova wamabutho akutjhoko:
“Iboda leBhabhiloni nanyana lilikhulu lizokutjhatjalaliswa ngokupheleleko,+
Namasangwalo ngitjho nanyana aphakeme azokutjhiswa ngomlilo.
Isitjhaba angekhe sisebenzele ilize;
Iintjhaba zizokusebenza budisi begodu ezikusebenzelako kuzokuphelela emlilweni.”+
59 Leli lilizwi uJoromiya umphorofidi alinikela bona libe myalo kuSeraya indodana kaNeriya+ indodana kaMarhaseya lokha nakaya eBhabhiloni nekosi uTsedekhiya yakwaJuda emnyakeni wesine wokubusa kwayo; uSeraya bekatlhogomela izinto zekosi. 60 UJoromiya watlola yoke ihlekelele ezokufikela iBhabhiloni encwadini yinye, woke amezwi la atlolwa ngokujamelene neBhabhiloni. 61 Ngaphezu kwalokho, uJoromiya wathi kuSeraya: “Nawuya eBhabhiloni begodu ulibona, kufuze uwafundele phezulu woke amezwi la. 62 Nje-ke ithi, ‘Maye! Jehova, ukhulume ngokujamelene nendawo le bona izokutjhatjalaliswa itjhiywe inganazakhamuzi, umuntu namkha isibandana, nokuthi izokuba marubhi ngokungapheliko.’+ 63 Nawuqeda ukufunda incwadi le, ibophele elitjeni bese uyiphosela phakathi kweYufrathe. 64 Ngemva kwalokho uthi, ‘IBhabhiloni lizokutjhingela phasi+ lingasaba khona ngebanga lehlekelele engikulethela yona; izakhamuzi zalo zizokudinwa.’”+
Bekube nje la mamezwi kaJoromiya.