Hezekiyeli
8 Ngomnyaka wesithandathu, ngenyanga yesithandathu, ngelanga lesihlanu lenyanga, bengihlezi endlinami begodu abadala bakwaJuda bebahlezi phambi kwami, isandla seKosi ePhakemeko uJehova sangibamba lapho. 2 Njengombana bengiqalile ngabona okuthileko okufana nomlilo; bekunomlilo ngaphasi kokuthileko okuqaleka njengedini lakhe,+ kusukela edinini ukutjhinga phezulu bekabonakala aphazima, njengokuphazima kwegolide lihlangene nesiliva.+ 3 Nje-ke walulela ebekuqaleka njengesandla wangiguga ngeenhluthu zami begodu ummoya wangithwala hlangana kwephasi nezulu wangisa eJerusalema ngemibono evela kuZimu, esangweni eliphakathi+ eliqale etlhagwini, lapho bekunesithombe esibangela bona uZimu asilingeke.+ 4 Qala! Iphazimulo kaZimu wakwa-Israyeli beyilapho,+ efana naleya engayibona emrhobeni othabaleleko.+
5 Nje-ke wathi kimi: “Ndodana yomuntu, ngibawa uphakamisele amehlwakho nca ngetlhagwini.” Nje-ke ngaphakamisela amehlwami nca ngetlhagwini begodu lapho, esangweni elisetlhagwini ye-aldara, ebungenweni bekunesithombe esenza bona uZimu asilingeke. 6 Wathi kimi: “Ndodana yomuntu, uyazibona na izinto ezithusako nezinyenyisako indlu yakwa-Israyeli ezenzako lapha,+ izinto ezingenza ngibe kude khulu nendawami ecwengileko?+ Kodwana uzokubona izinto ezinyenyisako nezithusa khulu ukudlula lezi.”
7 Wangingenisa ebungenweni besirhodlo begodu nangiqalako ngabona imbobo ebodeni. 8 Bese wathi kimi: “Ndodana yomuntu, ngibawa uthumbuse iboda, nje-ke ngathumbusa iboda begodu ngabona ubungeno. 9 Wathi kimi: “Ngena ubone ukukhohlakala nezinto ezinyenyisako abazenzako lapha.” 10 Nje-ke ngangena ngaqala, ngabona yoke imihlobo yeenthombe yezinto ezirhurhubako neembandana ezisilapheleko+ nazo zoke iinthombe ezinyenyisako* endlini yakwa-Israyeli;+ bezigobhodlhwe ebodeni kiyo yoke indawo. 11 Abadala abama-70 bendlu yakwa-Israyeli bebajame phambi kwazo noJazaniya indodana kaTjhafani+ bekajame nabo. Ngamunye wabo bekaphethe isitja sokutjhisela ipepho esandleni sakhe begodu intuthu yepepho enuka kamnandi beyikhuphuka.+ 12 Wathi kimi: “Ndodana yomuntu, uyakubona na okwenziwa badala bendlu yakwa-Israyeli ebumnyameni, ngamunye wabo eenkumbeni ezingaphakathi lapho iinthombe zakhe zibekwe khona? Ngombana bathi, ‘uJehova akasiboni. UJehova utjhiye inarha le.’”+
13 Waragela phambili wathi kimi: “Uzokubona izinto ezinyenyisako nezithusa khulu ukudlula lezi abazenzako.” 14 Nje-ke wangiletha ebungenweni besango letlhagwini lendlu kaJehova begodu lapho ngabona abafazi bahlezi balilela uTamuzi.
15 Waragela phambili nokuthi kimi: “Maye! Ndodana yomuntu, uyakubona lokhu? Uzokubona izinto ezinyenyisako nezithusako ukudlula lezi.”+ 16 Nje-ke wangingenisa esirhodlweni esiphakathi sendlu kaJehova.+ Ebungenweni bethempeli lakaJehova hlangana nethuri ne-aldara, bekumadoda angaba ma-25 afulathele ithempeli lakaJehova begodu ubuso bawo bebuqale epumalanga; bebakhothamele ilanga epumalanga.+
17 Wathi kimi: “Ndodana yomuntu, uyakubona lokhu? Kghani yinto encani bona indlu yakwaJuda yenze izintwezi ezinyenyisako, bona izalise inarha ngenturhu+ begodu iragele phambili nokungizwisa ubuhlungu? Itjhovela ipande* epumulwenami. 18 Ngizokusilingeka. Amehlwami angekhe abazwele ubuhlungu; namkha ngibarhawukele.+ Ngitjho nanyana bangalilela phezulu eendlebeni zami angekhe ngibezwe.”+