Hezekiyeli
30 Ilizwi lakaJehova lafika kimi godu, lathi: 2 “Ndodana yomuntu, phorofida uthi, ‘Nakhu iKosi ePhakemeko uJehova ekutjhoko:
“Rhahlawula uthi, ‘Maye! Ilanga liyeza.’
3 Ngombana ilanga litjhidele, iye, ilanga lakaJehova litjhidele.+
Kuzokuba lilanga lamafu,+ isikhathi esibekiweko seentjhaba.+
4 Isabula izokufika ngokujamelene neGibhide, iTopiya izokuthukwa lokha kubulawa abantu eGibhide;
Umnothwayo uthethwe neensekelo zayo zigiriziwe.+
5 ITopiya,+ iPhuthi,+ iLudi nayo yoke imihlobo yabantu,*
IKhubi kuhlanganise namadodana wenarheni yesivumelwano,*
Boke bazokuwa ngesabula.”’
6 Nakhu uJehova akutjhoko:
‘Abasekeli beGibhide nabo bazokuwa,
Namandlabo wokuzikhakhazisa azokuwa,’+
“‘Kusukela eMigidoli+ ukuya eSiyene+ bazokuwa ngesabula enarheni,’ kutjho iKosi ePhakemeko uJehova. 7 ‘Bazokwenziwa iinarha ezinganalitho begodu amadorobhabo azokwenziwa amadorobho atjhatjalaliswe khulu.+ 8 Kuzokufuze bazi ukuthi nginguJehova nangitjhisa iGibhide ngomlilo, boke abasebenzisana nayo bazokuphahlazwa. 9 Ngelangelo ngizokuthumela iinthunywa ngemikhumbi bona ngenze iTopiya ezithembako ihlengezele; bazokuthukwa ngelanga elizokufikela iGibhide ngombana nakanjani lizokufika.’
10 “Nakhu iKosi ePhakemeko uJehova ekutjhoko: ‘Ngizokuqeda isiqubuthu seGibhide ngesandla seKosi yeBhabhiloni uNebukadinetsari.*+ 11 Yena namasotjhakhe, isitjhaba esinelunya khulu,+ sizokulethwa bona sitjhabalalise inarha. Bazokukhupha iinsabula zabo ngokujamelene neGibhide, bazalise nenarha ngokurhayilwa.+ 12 Ngizokwenza imisele yeNayili+ iphenduke ihlabathi eyomileko begodu ngizokuthengisela abantu abakhohlakeleko inarha. Ngizokutjhiya inarha nakho koke okukiyo kunganalitho ngesandla sabantu abavela kwezinye iinarha.+ Mina Jehova ngikhulumile.’
13 “Nakhu iKosi ePhakemeko uJehova ekutjhoko: ‘Ngizokutjhabalalisa neenthombe ezinyenyisako* ngiqede abozimu abangasizi ngalitho beNofi*+ angekhe kusaba nekosana enarheni yeGibhide begodu ngizokubangela ukusaba enarheni yeGibhide.+ 14 Ngizokutjhabalalisa iPatrosi,+ ngitjhise iTsowani, ngikhuphe nesahlulelo eNo.*+ 15 Ngizokuthululela ilaka lami eSini endaweni esiphephelo yeGibhide, ngitjhabalalise abantu beNo. 16 Ngizokutjhisa iGibhide; iSini izokusaba iNo, izokuphulwa ingenelwe neNofi* izokusahlelwa emini baqalile! 17 Amasokana we-Oni* nePhi-Besethi azokubulawa ngesabula begodu amadorobho azokuya ekuthunjweni. 18 ETarhipanirhesi kuzokuba emini mnyama lokha nangiphula iinsimbi zejogi eGibhidapho.+ Amandlayo wokuzikhakhazisa azokuphela,+ amafu azoyigubuzesa, amadorobhayo azokuya ekuthunjweni.+ 19 Ngizokukhupha isahlulelo eGibhide, kuzokufuze bazi ukuthi nginguJehova.’”
20 Ngomnyaka we-11 ngenyanga yokuthoma, ngelanga lekhomba lenyanga, ilizwi lakaJehova lafika kimi, lathi: 21 “Ndodana yomuntu, ngiphule umkhono kaFaro ikosi yeGibhide; angekhe ubotjhwe bona uphole namkha uphuthelwe ngebhanditjhi ukuthi ube namandla ngokwaneleko bona ukwazi ukubamba isabula.”
22 “Nje-ke nakhu iKosi ePhakemeko uJehova ekutjhoko: ‘Qala ngijamelene noFaro ikosi yeGibhide,+ ngizokuphula imikhonwakhe enamandla nephukileko+ ngizokwenza isabula iziwele esandleni sakhe.+ 23 Ngemva kwalokho, ngizokurhatjhela amaGibhide hlangana neentjhaba bese ngiwaphadlhalaje hlangana neenarha.+ 24 Ngizokuqinisa imikhono yekosi yeBhabhiloni,+ ngifake isabulami esandleni sayo,+ ngizokuphula imikhono* kaFaro, uzokuqumela phezulu njengomuntu ofako phambi kwayo.* 25 Ngizokuqinisa imikhono yekosi yeBhabhiloni kodwana imikhono kaFaro izokulembelela; kuzokufuze bazi ukuthi nginguJehova nangibeka isabulami esandleni sekosi yeBhabhiloni begodu iyisebenzise ngokujamelene nenarha yeGibhide.+ 26 Ngizokurhatjhela amaGibhide hlangana neenarha, ngizokurhatjhela amaGibhide hlangana neentjhaba, ngiwaphadlhalajele hlangana neenarha,+ kuzokufuze bazi ukuthi nginguJehova.’”