Isaya
21 Isimemezelo ngokujamelene nommango welwandle:*+
Ihlekelele iza njengesiwuruwuru esivela esewula,
Evela emmangweni enarheni ethusako.+
2 Ngitjelwe umbono osabekako:
Okhohlisako uyakhohlisa,
Nomtjhabalalisi uyatjhabalalisa.
Khuphuka Elamu! Vimbezela Mediya!+
Ngizokuqeda koke ukunghonghoyila akubangeleko.+
3 Kungebangelo ngisebuhlungwini obukhulu.+
Ngibanjwe buhlungu,
Obunjengobomfazi obelethako.
Ngigandeleleke khulu bona ngizwe;
Ngithikamezeke khulu bona ngibone.
4 Ihliziywami itshwenyekile; ngiyahlengezela ngebanga lokusaba.
Amarhwaqela ebengiwakhanukela angenza ngihlengezele.
5 Lungiselelani itafula begodu hlelani iinhlalo!
Yidlani bese nisele!+
Sikimani nina makhosana, nizese isiviko!
6 Ngombana ngilokhu uJehova akutjho kimi:
“Khamba, ubeke umlindi begodu abike koke akubonako.”
7 Wabona ikarana yepi idoswa ziinjomani ezipanelweko,
Ikarana yepi idoswa bodumbana,
Ikarana yepi idoswa makamela.
Waqalisisa, ngokutjhejisisa okukhulu.
8 Nje-ke wathoma ukurhuwelela njengokubhodla kwebhubezi wathi:
“Maye! Jehova, ngijama esithaleni qobe langa,
Begodu ngijama endawenami yokugada ubusuku obunye nobunye.+
9 Qalani okuzako:
Amadoda akhwele ikarana yepi edoswa ziinjomani ezipanelweko!”+
Nje-ke wakhuluma wathi:
Liwile! Liwile iBhabhiloni!+
Zoke iinthombe ezibaziweko zabozimu balo ziphahlaziwe!”+
10 Maye! bantu bami abagadangwe njengeenthoro,
Umkhiqizo wangeselelweni sami,+
Nginibikele lokho engikuzwileko kuJehova wamabutho, uZimu ka-Israyeli.
11 Isimemezelo ngokujamelene neDuma:*
Kunothileko ongirhuwelela aseSeyiri+ uthi:
“Mlindi, sekusele isikhathi esingangani bona kuse?
Mlindi, sekusele isikhathi esingangani bona kuse?”
12 Umlindi wathi:
“Ukusa kuyeza, nobusuku buyeza.
Nanifuna ukubuza, buzani.
Buyani godu!”
13 Isimemezelo ngokujamelene nommango othabaleleko:
14 Yizani namanzi bona niyokuhlangabeza owomileko,
Nina zakhamuzi zenarha yeTema,+
Begodu lethelani loyo obalekako uburotho.
15 Ngombana babaleke iinsabula, iinsabula ezibukhali,
Babaleke umsubela olungele ukudumuza nepi enelunya.
16 Ngombana nakhu uJehova akutjho kimi: Ngaphambi kobana kuphele umnyaka, njengeminyaka yesisebenzi esiqatjhiweko, yoke iphazimulo yeKedari+ izokuphela. 17 Abadumuzi bemisubela abaseleko beengorho zeKedari bazokuba yimbijana ngombana uJehova uZimu ka-Israyeli ukhulumile.