Hezekiyeli

33 Ilizwi lakaJehova lafika kimi, lathi: 2 “Ndodana yomuntu, khuluma namadodana wabantu bakho,+ uthi kiwo,

“‘Akhe sithi ngiletha isabula enarheni+ begodu boke abantu benarha leyo bathathe umuntu bamenze umlindi, 3 abone isabula iza enarheni abethe iphondo bese ayelelise abantu.+ 4 Nangabe othileko uzwa itjhada lephondo kodwana angasilaleli isiyeleliso+ nesabula imfikele imbulale,* iingazi zakhe zizokuba phezu kwehlokwakhe.+ 5 Ulizwile itjhada lephondo kodwana akhenge alalele isiyeleliso. Iingazi zakhe zizokuba phezu kwakhe. Nangabe usilalelile isiyeleliso, ukuphila kwakhe bekuzokusindiswa.

6 “‘Kodwana nangabe umlindi ubona isabula iza begodu angabethi iphondo,+ abantu bangafumani isiyeleliso, isabula ifike ibulale ukuphila komunye wabo, umuntu loyo uzokufela umtjhaphwakhe kodwana iingazi zakhe ngizozifuna kumlindi.’+

7 “Nakunguwe, ndodana yomuntu, ngikubeke bona ube mlindi endlini yakwa-Israyeli; nawuzwa ilizwi eliphuma emlonyenami, kufuze ungiyelelisele bona.+ 8 Lokha nangithi emuntwini okhohlakeleko, ‘Wena okhohlakeleko, uzokufa nakanjani!+ kodwana ungakhulumi naye bona umyelelise okhohlakeleko bona atjhugulule indlelakhe, uzokufa njengomuntu okhohlakeleko ngebanga lemitjhaphwakhe+ kodwana iingazi zakhe ngizozibuza kuwe. 9 Kodwana nawumyelelisako okhohlakeleko bona atjhuguluke endlelenakhe bese angafuni ukutjhugulula indlelakhe, uzokufa ngebanga lomtjhaphwakhe+ kodwana wena ngokuqinisekileko uzokusindisa ukuphila kwakho.+

10 “Wena ndodana yomuntu, ithi endlini yakwa-Israyeli, ‘Nina nithe: “Ukuvukela kwethu nezono zethu kuyasidisibeza kubangela bona sitjhabalale;+ nje-ke sizokuragela phambili njani siphila?”’+ 11 “Nangisaphilako,” kutjho iKosi ePhakemeko uJehova, “Akungithabisi ukufa komuntu okhohlakeleko+ kodwana ngifisa ngasuthi okhohlakeleko angatjhuguluka endlelenakhe+ bese aragele phambili aphila.+ Phendukani, phendukani eendleleni zenu ezimbi+ ngombana kubayini kufuze nife nina ndlu ka-Israyeli?”’+

12 “Wena ndodana yomuntu, tjela amadodana wabantu bekhenu, ‘Ukulunga komuntu olungileko angekhe kumsindise lokha nakavukelako;+ namkha ukukhohlakala komuntu okhohlakeleko kumenze awe ngelanga aphenduka ngalo ekukhohlakaleni kwakhe;+ namkha olungileko aragele phambili aphila ngebanga lokulunga kwakhe ngelanga ona ngalo.+ 13 Lokha nangithi kolungileko; “Nakanjani uzokuragela phambili uphila” bese athembele ekulungeni kwakhe enze okungakalungi,+ izenzo zokulunga kwakhe angeze zikhunjulwe kodwana uzokufa ngebanga lokungalungi akwenzileko.+

14 “‘Nangithi kokhohlakeleko: “Nakanjani uzokufa,” aphenduke esonweni sakhe bese enze okuhle nokulungileko,+ 15 okhohlakeleko abuyisele akuthetheko ebekusibambiso,+ abhadele akudlelezeleko+ begodu akhambe ngendlela yokuphila, ngokuthi angenzi okungakalungi, nakanjani uzokuragela phambili aphila.+ Angekhe afe. 16 Zoke izono azenzileko angekhe zikhunjulwe+ ngebanga lokwenza okuhle nokulungileko, nakanjani uzokuragela phambili aphila.’+

17 “Kodwana abantu bekhenu bathe, ‘Indlela kaJehova ayikalungi,’ kanti yindlelabo engakalungi.

18 “Lokha umuntu olungileko nakatjhiya okulungileko bese enze okumbi, kufuze akufele lokho.+ 19 Nange umuntu okhohlakeleko alisa ukukhohlakala kwakhe bese enze okuhle nokulungileko, uzokuragela phambili aphila ngokwenza njalo.+

20 “Kodwana nina nithe, ‘Indlela kaJehova ayikalungi.’+ Ngizokwahlulela ngamunye wenu ngokweendlela zakhe, maye! Ndlu ka-Israyeli.”

21 Ekupheleni komnyaka we-12, ngenyanga yetjhumi, ngelanga lesihlanu lenyanga lokudingiswa kwethu, umuntu ophunyurhe eJerusalema wafika kimi+ wathi: “Idorobho litjhatjalalisiwe!”+

22 Ngobusuku bangaphambi kokuthi kufike umuntu ophunyurhileko, isandla sakaJehova safika kimi, wavula umlomami ngaphambi kokuthi umuntu loyo afike ekuseni. Nje-ke umlomami wavuleka begodu bengingasese simumu.+

23 Nje-ke ilizwi lakaJehova lafika kimi, lathi: 24 “Ndodana yomuntu, izakhamuzi zamarubhi la+ zithi malungana nenarha yakwa-Israyeli, ‘U-Abrahama bekayedwa nanyana kunjalo wathatha inarha.+ Kodwana thina sibanengi; ngokuqinisekileko inarha inikelwe thina bona ibe lilifa.’

25 “Nje-ke ithi kibo, ‘Nakhu iKosi ePhakemeko uJehova ekutjhoko: “Nidla ukudla okuneengazi,+ nithembela eenthombeni zenu ezinyenyisako* begodu niragela phambili niphalaza iingazi.+ Nje-ke kubayini kufuze nifumane inarha? 26 Nithembele esabulenenu,+ nenza izenzo ezinyenyisako, ngamunye wenu usilaphaze umfazi kamakhelwanakhe.+ Nje-ke kubayini kufuze nifumane inarha?”’+

27 “Nakhu ekufuze ukutjho kibo, ‘Nakhu iKosi ePhakemeko uJehova ekutjhoko: “Nangisaphilako, labo abahlala emarubhini bazokufa ngesabula; labo abasematatawini avulekileko bazokuba kukudla kweembandana; labo abahlala eendaweni ezisiphephelo nemarholweni bazokufa ngokugula.+ 28 Ngizokwenza inarha ibe marubhi,+ ukuzikhakhazisa kwayo kuzokuphela, iintaba zakwa-Israyeli zizokutjhatjalaliswa+ kungabi nomuntu odlulako. 29 Kuzokufuze bazi ukuthi nginguJehova nangenza inarha ibe marubhi,+ ngiyitjhiye inganalitho ngebanga lazo zoke izinto ezinyenyisako abazenzileko.”’+

30 “Nakunguwe ndodana yomuntu, abantu bekhenu bakhuluma komunye nomunye ngawe hlanu kwamaboda, eminyango yezindlu.+ Omunye atjele omunye, omunye atjele umfowabo athi, ‘Izani, asizweni ilizwi elivela kuJehova.’ 31 Nje-ke bazokubuthelelana bahlale phambi kwakho njengabantu bami; bazowezwa amezwakho kodwana angekhe bawenze.+ Ngombana ngemilomabo bayakutshima kodwana iinhliziyo zabo zimarhamaru ngebanga lenzuzo engakathembeki. 32 Qala! Unjengengoma yethando kibo, evunywa ngephimbo elimnandi, edlalwa ngekghono ngeenliliso zesinara. Bazowezwa amezwakho kodwana akekho ozowenza. 33 Nakaba liqiniso, azokuba liqiniso, kuzokufuze bazi ukuthi umphorofidi bekaphakathi kwabo.”+