Hezekiyeli
32 Ngomnyaka we-12, ngenyanga ye-12, ngelanga lokuthoma lenyanga, ilizwi lakaJehova lafika kimi godu, lathi: 2 “Ndodana yomuntu, vuma ingoma yesililo emalungana noFaro, ikosi yeGibhide, uthi kuye,
‘Bewunjengebhubezi elincani elinamandla eentjhabeni,
Kodwana sewuvalwe umlomo.
Bewunjengesilwana esikhulu esisabekako selwandle,+ ukhambakhamba emilanjenakho,
Ngeenyawo zakho, bewudunga amanzi ngedaka begodu usilaphaza imilambo.’*
3 Nakhu iKosi ePhakemeko uJehova ekutjhoko:
‘Ngehlangano yeentjhaba ezinengi, ngizokuphosela inedami phezu kwakho,
Izokudosa ngesirhurhulanede sami.
4 Ngizokutjhiya enarheni;
Ngizokuphosela etatawini elivulekileko.
Ngizokubangela zoke iinyoni zomkayi bona zihlale phezu kwakho,
Nganelise iimbandana zephasi loke ngawe.+
5 Ngizokuphosela inyamakho eentabeni
Ngizalise imirhoba ngeensalela zakho.+
6 Ngizokuthambisa inarha ngeengazi zakho eziphalaka beziyokufika eentabeni,
zizokuzalisa imilanjana.’
7 ‘Lokha nawucinyiweko, ngizokugubuzesa izulu neenkwekwezi zalo zizokuba mnyama.
Ngizokusitha ilanga ngamafu,
Nenyanga angekhe ikhanyise.+
8 Ngizokwenza koke okukhanyako ezulwini kube mnyama ngebanga lakho,
Begodu ngizokugubuzesa inarhakho ngobumnyama,’ kutjho iKosi ePhakemeko uJehova.
9 ‘Ngizokugandelela iinhliziyo zabanengi nangikusa ekuthunjweni kwezinye iintjhaba,
Eenarheni ongazaziko.+
10 Ngizokubangela abantu abanengi barareke,
Amakhosabo azokuhlengezela ngebanga lokukusaba malungana nawe nangikhupha isabulami phambi kwabo
Bazokusolo bahlengezela, ngamunye asabele ipilwakhe,
Ngelanga lokuwa kwakho.’
11 Ngombana nakhu iKosi ePhakemeko uJehova ekutjhoko:
‘Isabula yekosi yeBhabhiloni izokuza phezu kwakho.+
12 Ngizokubangela iinqubuthu zakho bona ziwe ngesabula yeengorho ezinamandla,
Ezinelunya khulu ukuzidlula zoke eentjhabeni.+
Zizokwehlisa koke ukuzikhakhazisa kweGibhide, nazo zoke iinqubuthu zayo zizokurhayilwa.+
13 Ngizokutjhabalalisa yoke ifuywayo hlanu kwamanzayo amanengi,+
Akunanyawo lomuntu namkha lefuyo elizowasilaphaza ngedaka godu.’+
14 ‘Ngesikhatheso ngizokuhlwengisa amanzabo,
Ngizokwenza imilambabo igeleze njengamafutha,’ kutjho iKosi ePhakemeko uJehova.
15 ‘Lokha nangitjhabalalisa iGibhide ibe yinarha enganalitho, inarha ethathelwe koke ebeyinakho,+
Lokha nangitjhabalalisa zoke izakhamuzi zayo,
Kuzokufuze bazi ukuthi nginguJehova.+
16 Le yingoma yesililo, abantu abazoyibhina nakanjani;
Amadodakazi weentjhaba azoyibhina.
Azoyibhinela iGibhide nazo zoke iinqubuthu zayo,’ kutjho iKosi ePhakemeko uJehova.”
17 Nje-ke ngomnyaka we-12, ngelanga le-15 lenyanga, ilizwi lakaJehova lafika kimi, lathi: 18 “Ndodana yomuntu, rhahlawula eenqubuthweni zeGibhide begodu uyehlisele enarheni ephasi, yona namadodakazi weentjhaba ezinamandla, nalabo abatjhinga emgodini.*
19 “‘Ngubani omdlulako ngobuhle? Tjhinga ethuneni, uyokulaliswa nabangakasokwa!’
20 “‘Bazokubulawa nalabo ababulewe ngesabula.+ Uzokunikelwa esabuleni; mdoseni neenqubuthu zakhe zoke.
21 “‘Kusukela ekuzikeni kweThuna,* iingorho ezinamandla zizokukhuluma naye nabasizi bakhe. Nakanjani zizokukhamba begodu zizokulaliswa njengabangakasokwa, ababulewe ngesabula. 22 I-Asiriya ilapho nehlanganwayo yoke. Amathunayo ambhodile, boke babulewe ngesabula.+ 23 Amathunakhe asekuzikeni emgodini begodu ihlanganwakhe ibhode ithuna lakhe, boke babulewe ngesabula ngombana babangele ukusaba enarheni yabaphilako.
24 “‘I-Elamu+ ilapho naso soke isiqubuthu sayo sibhode ithuna layo, boke babulewe ngesabula. Behlele phasi nabangakasokwa enarheni ephasi, labo ababangela ukusaba enarheni yabaphilako. Nje, bazokuba neenhloni nalabo abatjhinga emgodini.* 25 Bayenzele umbhede hlangana nababuleweko nazo zoke iinqubuthu zayo magega namathunayo. Boke abakasokwa, babulewe ngesabula ngombana babangele ukusaba enarheni yabaphilako; bazokuthwala ihlazo labo nalabo abatjhinga emgodini.* Ngombana ikosi nayo ibekwe hlangana nabafileko.
26 “‘Kulapho uMetjheki noTubali+ nazo zoke iinqubuthu zakhe zikhona. Amathunabo woke ambhodile. Boke abakasokwa, bahlatjwe ngesabula ngombana babangele ukusaba enarheni yabaphilako. 27 Kghani angekhe na balaliswe emathuneni neengorho ezinamandla ezingakasokwa eziwileko, eziye phasi eThuneni* neenkhali zazo zepi? Zizokubeka iinsabula zazo ngaphasi kweenhloko* zazo nezono zazo emathanjenazo, ngebanga lokuthi iingorhwezi zibangele ivalo enarheni yabaphilako. 28 Kodwana wena uzokuphahlazwa hlangana nabangakasokwa begodu uzokulaliswa nalabo abarhayilwe ngesabula.
29 U-Edomu+ ulapho, amakhosakhe nawo woke amakhosanakhe, naphezu kwamandlabo, balaliswa hlangana nalabo abarhayilwe ngesabula; nabo bazokulaliswa nabangakasokwa+ nalabo abaya phasi ethuneni.
30 “‘Lapho kunawo woke amakhosana wetlhagwini nawo woke weTsidoni,+ abehlele phasi ngehlazo ngokurhayilwa naphezu kwevalo elibangelwe babantu babo abanamandla. Bazokulaliswa nalabo abarhayilwe ngesabula begodu bazokuthwala ihlazo labo nalabo abehlela phasi nabo ethuneni.
31 “‘UFaro uzokubona koke lokhu begodu uzokududuzeka ngakho koke okwenzakalele isiqubuthu sakhe;+ uFaro nalo loke ibutho lakhe bazokurhayilwa ngesabula,’ kutjho iKosi ePhakemeko uJehova.
32 “‘Ngombana ubangele ukusaba enarheni yabaphilako, uFaro naso soke isiqubuthu sakhe bazokulaliswa nabangakasokwa, nalabo abarhayilwe ngesabula,’ kutjho iKosi ePhakemeko uJehova.”