Hezekiyeli

36 “Nakunguwe, ndodana yomuntu, phorofida malungana neentaba zakwa-Israyeli uthi, ‘Maye! Ntaba yakwa-Israyeli lalela ilizwi lakaJehova. 2 Nakhu iKosi ePhakemeko uJehova ekutjhoko: “Inaba lithe ngokujamelene nawe, ‘Arha! Ngitjho neendawo eziphakemeko zekadeni zibe lilifa lethu!’”’+

3 Nje-ke phorofida uthi, ‘Nakhu iKosi ePhakemeko uJehova ekutjhoko: “Ngombana bakutjhabalalisile begodu bakusahlela mahlangothi woke, nje-ke bazokuba lilifa labasindileko hlangana neentjhaba nabantu abasolo bakhuluma ngawe begodu bakuhleba,+ 4 nje-ke, maye! Ntaba zakwa-Israyeli, lalelani ilizwi leKosi ePhakemeko uJehova. Nakhu iKosi ePhakemeko uJehova ekutjhoko eentabeni nemibundwini, emilanjaneni nemirhobeni, emarubhini atjhatjalalisiweko+ nemadorobheni atjhiyiweko, adlelezelweko begodu ahlekwa babantu abasindileko beentjhaba ezibabhodileko;+ 5 kizo iKosi ePhakemeko uJehova ithi: ‘Ngobukhali bami+ ngizokukhuluma nabasindileko beentjhaba nangokujamelene nayo yoke i-Edomu, labo ngokuthaba okukhulu nangokuhleka+ bathe inarhami ililifa labo, bazokuthatha amadlelwayo bese bayidlelezele.’”’+

6 Nje-ke phorofida malungana nenarha yakwa-Israyeli, uthi eentabeni nemibundwini, emilanjaneni nemirhobeni, ‘Nakhu iKosi ePhakemeko uJehova ekutjhoko: ‘Qalani! Ngizokukhuluma ngetjisekwami nangelaka lami ngombana nithwele ihlazo leentjhaba.”’+

7 Nje-ke nakhu iKosi ePhakemeko uJehova ekutjhoko: ‘Mina ngokwami ngizokuphakamisa isandla sami ngifunge ngeentjhaba ezinibhodileko, ukuthi zona ngokwazo zizokuthwala ihlazo lazo.+ 8 Kodwana nina, maye! Ntaba zakwa-Israyeli, nizokukhiqiza iimpande, nithwale neenthelo zenu, nithwalele abantu bami u-Israyeli,+ ngombana kungasikade bazokubuya. 9 Ngombana nginani, ngizokuqala kini begodu nizokuhlakulwa, nitjalwe ngembewu. 10 Ngizokwandisa abantu benu, yoke indlu yakwa-Israyeli, iye yoke begodu amadorobho azokuhlalwa+ namarubhi azokwakhiwa kabutjha.+ 11 Ngizokwandisa abantu benu nefuywenu;+ bazokwanda babe banengi. Ngizonenza nihlalwe njengaphambilini+ begodu nizokuphumelela ukudlula ngaphambilini,+ kuzokufuze nazi ukuthi nginguJehova.+ 12 Ngizokwenza abantu, iye abantu bami u-Israyeli bona bakhambe phezu kwenu, bazonithatha.+ Nizokuba lilifa labo, angekhe nisabenza bangasaba nabantwana.’”+

13 Nakhu iKosi ePhakemeko uJehova ekutjhoko: ‘Ngombana bathi kini, “Niyinarha erhiribidela abantu nethathela iintjhaba zenu abantwana,”’ 14 ‘nje-ke angekhe usarhiribidela abantu namkha ubenze isitjhaba esinganabantwana,’ kutjho iKosi ePhakemeko uJehova. 15 ‘Angekhe ngisakwenza ube yinto yokuthukwa ziintjhaba namkha ngikwenze uthwale ukudelelwa babantu,+ angekhe usabangela iintjhaba zakho ukuthi ziwe,’ kutjho iKosi ePhakemeko uJehova.”

16 Ilizwi lakaJehova lafika kimi godu, lathi: 17 “Ndodana yomuntu, lokha abantu bendlu ka-Israyeli nabahlala enarhenabo, bazisilaphaza ngeendlela zabo nangokuziphatha kwabo.+ Iindlela zabo bezinjengokusilaphala kokuya esikhathini kimi.+ 18 Nje-ke ngathululela ilaka lami kibo ngebanga leengazi abaziphalaze enarheni+ begodu ngombana benze inarha yasilaphala ngeenthombe zabo ezinyenyisako.*+ 19 Nje-ke ngabarhatjhela hlangana neentjhaba, ngabaphadlhalaja hlangana neenarha.+ Ngabahlulela ngendlelabo nangokuziphatha kwabo. 20 Kodwana nabafika eentjhabenezo, abantu basilaphaza igama lami elicwengileko+ ngokuthi ngabo, ‘Laba babantu bakaJehova kodwana kwafuze batjhiye inarhakhe.’ 21 Nje-ke ngizokutjengisa ukutshwenyeka ngegama lami elicwengileko indlu ka-Israyeli elisilaphazileko hlangana neentjhaba eye kizo.”+

22 “Nje-ke ithi endlini yakwa-Israyeli. ‘Nakhu iKosi ePhakemeko uJehova ekutjhoko: “Akusingebanga lenu ngenza lokhu, maye! Ndlu ka-Israyeli kodwana kungebanga legama lami elicwengileko, enilisilaphazileko hlangana neentjhaba eniye kizo.”’+ 23 ‘Nakanjani ngizokucwengisa igama lami elikhulu,+ elasilaphazwa hlangana neentjhaba, enilisilaphaze hlangana nazo; iintjhaba kuzokufuze zazi ukuthi nginguJehova,’+ kutjho iKosi ePhakemeko uJehova, ‘Nangizicwengisako phakathi kwenu phambi kwamehlwabo. 24 Ngizonithatha eentjhabeni nginibuthelele, nginibuyise kizo zoke iinarha benginibuyise enarhenenu.+ 25 Ngizonifafaza ngamanzi ahlwengileko begodu nizokuhlwengeka;+ ngizonihlanza kikho koke ukusilaphala kwenu+ nakizo zoke iinthombe zenu ezinyenyisako.+ 26 Ngizokunikela ihliziyo etja,+ ngifake ummoya omutjha phakathi kwakho.+ Ngizokususa ihliziyo yelitje+ emzimbenakho ngikunikele ihliziyo yenyama.* 27 Ngizokufaka ummoyami phakathi kwenu, ngizonibangela bona nikhambe ngeenqophiso zami,+ nizokwenza beniphethe iinqunto zami zokwahlulela. 28 Ngemva kwalokho, nizokuhlala enarheni engayinikela abokhokho benu, nizokuba babantu bami, ngizokuba nguZimenu.’+

29 “‘Ngizonisindisa kikho koke ukusilaphala kwenu, ngenze ikoroyi ibe yinengi begodu angekhe ngilethe indlala kini.+ 30 Ngizokwenza isithelo somuthi nomkhiqizo wesimu kube kunengi bona ungasatlhagiswa lihlazo lendlala hlangana neentjhaba.+ 31 Ngemva kwalokho, uzokukhumbula iindlela zakho ezikhohlakeleko nezenzo zakho ebezingakalungi, uzozinyenya ngebanga lomlandwakho nangezenzo zakho ezinyenyisako.+ 32 Kodwana yazini lokhu: Angenzi lokhu ngebanga lenu,’+ kutjho iKosi ePhakemeko uJehova. ‘Kunalokho, yibani neenhloni nizizwe nihlazisekile ngebanga leendlela zenu, maye! Ndlu ka-Israyeli.’

33 “Nakhu iKosi ePhakemeko uJehova ekutjhoko: ‘Ngelangelo ngizonihlanza kiwo woke umlandwenu, ngizokubangela amadorobho abe nezakhamuzi+ namarubhi akhiwe kabutjha.+ 34 Inarha etjhatjalalisiweko, eyatjhiywa imarubhi bona woke umuntu odlulako ayibone, izokuhlakulwa. 35 Nabantu bazokuthi: “Inarha etjhatjalalisiweko seyifana nesimu ye-Edeni,+ namadorobho ebekamarubhi, atjhatjalaliswa, agirizwa sewavikelekile anezakhamuzi.”+ 36 Iintjhaba eziseleko ezinibhodileko kuzokufuze zazi ukuthi mina, Jehova, ngakhe ebekugiriziwe, ngitjale ebekungasekho. Mina Jehova ngikhulumile begodu ngikwenzile.’+

37 “Nakhu iKosi ePhakemeko uJehova ekutjhoko: ‘Ngizokuvumela indlu yakwa-Israyeli ingibawe bona ngandise abantu babo njengomhlambi. 38 Njengomhlambi wabacwengileko, njengomhlambi weJerusalema* hlangana nomnyanyayo,+ amadorobho ebewamarubhi azokugcwala umhlambi wabantu+ begodu kuzokufuze bazi ukuthi nginguJehova.’”