Eksodusi

22 “Nangabe umuntu weba ikunzi namkha imvu, ayihlabe namkha ayithengise kufuze ahlawule ngeenkunzi ezihlanu ngebanga lekunzi yinye, nezimvu ezine ngebanga lemvu yinye.+

2 (“Nangabe isela+ libanjwa ligcekeza bese liyabetjhwa lihlongakale, akunamuntu ozokuba nomlandu wokuphalaza iingazi zalo. 3 Kodwana nangabe lokho kwenzeka nasele ilanga liphumile, obuleleko uzokuba nomlandu wokuphalaza iingazi zalo.)

“Isela kufuze lihlawule. Nangabe alinalitho kufuze lithengiswe ngebanga lalokho elikwebileko. 4 Nangabe elikwebileko kufunyanwa kusaphila ezintweni zalo, kungaba yikunzi, udumbana namkha imvu kufuze libhadele ngokubuyelelwe kabili.

5 “Nange umuntu akhupha ifuywakhe bona iyokudla emasimini namkha esimini yamadiribe begodu ayivumele bona iyokudla esimini yomunye umuntu kufuze ahlawule ngeenthelo ezikhethekileko zesiminakhe namkha okukhethekileko esiminakhe yamadiribe.

6 “Nange kuqubuka umlilo, utjhise imithi yameva, iinyanda zekoroyi namkha ikoroyi engakavunwa namkha isimu, othome umlilo lo kufuze ahlawuliswe ngebanga lalokho okutjhileko.

7 “Nange umuntu anikela umakhelwanakhe imali namkha ezinye izinto bona ambekele zona kodwana kube nomuntu ozebako emzinakhapho, nange isela lifumaneka kufuze lihlawuliswe ngokubuyelelwe kabili.+ 8 Nangabe isela alikafunyanwa, umnikazi wendlu kufuze alethwe phambi kwakaZimu weqiniso+ bona kuzokubonakala ukuthi akakazebi na izinto zakamakhelwanakhe. 9 Lokha umuntu nakathwesa omunye umlandu wokuba nento ekungasingeyakhe, kungaba yikunzi, udumbana, imvu, isambatho nanyana kungaba yini, bobabili kufuze beze phambi kwakaZimu kuzokuhlolisiswa ukuthi ngeyakabani.+ UZimu uzakutjho ukuthi ngubani onomlandu begodu omlandu loyo kuzokufuze ahlawule ngokubuyelelwe kabili kumakhelwanakhe.+

10 “Nangabe umuntu unikela umakhelwanakhe udumbana namkha ikunzi, imvu nanyana ngisiphi isilwana esifuywako bona amgadele sona, bese siyafa namkha sirholophale namkha silahleke kunganamuntu osibonako, 11 umuntu ogadisiweko kufuze afunge phambi kwakaJehova ukuthi akhenge athathe izinto zakamakhelwanakhe, umakhelwanakhe lo kufuze amukele lokho. Umuntu ogadisiweko angekhe ahlawuliswe.+ 12 Kodwana nangabe isilwana setjiwe sikuye kufuze ahlawule kumnikazaso. 13 Nangabe sidliwe sibandana kufuze alethe iinsalela zaso zibe bufakazi. Akukafuzi ahlawuliswe ngebanga lesilwana esidliwe sibandana.

14 “Nangabe umuntu uboleka isilwana kumakhelwanakhe bese siyarholophala namkha sife singasi kumnikazaso, osibolekileko lo kufuze ahlawule. 15 Nasinomnikazaso, osibolekileko angeze kutlhogeke bona ahlawule. Nangabe besiqatjhiwe imali ekuqatjhwe ngayo izokuba yihlawulo.

16 “Nangabe indoda iyenga intombi engakathenjiswa umtjhado beyilale nayo kufuze ibhadele imali yelobolo bona ibe mkayo.+ 17 Nange uyise wentombi le abhala ukunikela indoda intombi le bona ibe mkayo kufuze ibhadele imali elingana nenani lelobolo.

18 “Ungamvumeli umloyi bona aphile.+

19 “Nanyana ngubani olala nesilwana kufuze abulawe.+

20 “Nanyana ngubani owenzela abanye abozimu imihlatjelo ingasi uJehova kwaphela kufuze atjhatjalaliswe.+

21 “Ungamphathi kumbi umuntu ovela kwenye inarha namkha umgandelele+ ngombana nani nakhe nahlala enarheni ekungasi ngeyenu eGibhide.+

22 “Akunamhlolokazi namkha intandani ekufuze niyitlhagise.+ 23 Nange ningabatlhagisa balilele kimi, kwamambala ngizosizwa isililo sabo,+ 24 ngizokusilingeka, nginibulale ngesabula, abafazi benu babe bahlolokazi nabantwana benu babe ziintandani.

25 “Nangabe uboleka omunye wabantu bami abatlhagako imali, kufuze ungabi njengomatjhonisa emuntwini enihlala naye. Ungambhadelisi namakonyana.+

26 “Nange uthatha isambatho sakamakhelwanakho bona sibe sibambiso semali,+ kufuze usibuyisele kuye kungakatjhingi ilanga. 27 Ngombana ngiso sodwa anaso. Alo uzazembesa ngani nakalalako?+ Nakangililelako ngizomuzwa ngombana nginesirhawu.+

28 “Akukafuzi uthuke uZimu+ namkha ikosana yabantu bakhe.+

29 Ungariyadi ukunikela ngeenthelo zakho, iwayini namafutha.+ Izibulo lamadodanakho kufuze ulinikele mina.+ 30 Nakhu ekufuze ukwenze ngekunzakho nangemvakho:+ Amalanga alikhomba kufuze ibe nonina, kuthi elangeni lobunane uyinikele mina.+

31 “Kufuze nibe babantu abacwengileko kimi,+ akukafuzi nidle inyama yananyana ngisiphi isilwana esidatjulwe sibandana,+ kufuze niyiphosele izinja.