Hezekiyeli

39 “Nakunguwe ndodana yomuntu, phorofida ngokujamelene noGogi+ bese uthi kuye, ‘Nakhu iKosi ePhakemeko uJehova ekutjhoko: “Ngijamelene nawe Gogi, kosana eyihloko yeMetjheki neTubali.+ 2 Ngizokuphendula, ngikunqophise, ngikwenze uvele eengcenyeni ezikude zetlhagwini,+ ngikulethe eentabeni zakwa-Israyeli. 3 Ngizokubetha umsubelakho osesandleni sakho sesincele begodu ngenze imicibitjholwakho iwe esandleni sakho sokudla. 4 Uzokuwela eentabeni zakwa-Israyeli,+ wena nawo woke amasotjakho nesitjhaba esizabe sinawe. Ngizokunikela bona ube kukudla kiyo yoke imihlobo yeenyoni zamadlanga neembandaneni.”’+

5 “‘Uzokuwela esimini evulekileko+ ngombana mina ngikhulumile,’ kutjho iKosi ePhakemeko uJehova.

6 “‘Ngizokuthumela umlilo ngokujamelene noMagogi nangokujamelene nalabo abahlala ngokuvikeleka eenhlengeleni,+ kuzokufuze bazi ukuthi nginguJehova. 7 Ngizokwenza igama lami elicwengileko laziwe hlangana nabantu bami u-Israyeli, angekhe ngisavumela bona igama lami elicwengileko lisilaphazwe godu; iintjhaba kuzokufuze zazi ukuthi nginguJehova,+ oCwengileko ka-Israyeli.’+

8 “‘Iye, lokhu kuyeza, kuzokwenzeka,’ kutjho iKosi ePhakemeko uJehova. ‘Leli lilanga engikhulume ngalo. 9 Izakhamuzi zemadorobheni wakwa-Israyeli zizokuphuma zenze umlilo ngeenkhali, ngeemviko ezincani* neenhlangu, ngemisubela nemicibitjholo, iinondo* zepi nemikhonto. Zizozisebenzisa bona zenze umlilo+ iminyaka elikhomba. 10 Angekhe kutlhogeke ukuthi zithathe iingodo esimini namkha zibuthelele iingodo zomlilo emahlathini ngombana zizokusebenzisa iinkhali bona zivuthise umlilo.’

“‘Zizokuthatha izinto zalabo ababathathela izinto begodu zizokudlelezela labo ebebabadlelezela,’ kutjho iKosi ePhakemeko uJehova.

11 “‘Ngelangelo ngizokwenzela uGogi+ indawo yokubulungela kwa-Israyeli, emrhobeni walabo abakhamba epumalanga yelwandle, indlela yalabo abadlulako izokuvalwa. Kulapho abazokubulungela khona uGogi naso soke isiqubuthu sakhe begodu bazoyibiza ngokuthi mRhoba weHamoni-Gogi.*+ 12 Indlu ka-Israyeli izokuthatha iinyanga ezilikhomba ibabulunga bona kuhlwengiswe inarha.+ 13 Boke abantu benarha bazokusebenza bona bababulunge, lokho kuzobalethela idumo ngelanga engiziphazimulisa ngalo,’+ kutjho iKosi ePhakemeko uJehova.

14 “‘Kuzokwabelwa ukuthi kuhlale kudlula amadoda enarheni abulunge iindumbu eziseleko ephasini bona lihlwengiswe. Azokuragela phambili azifuna iinyanga ezilikhomba. 15 Labo abadlula enarheni nababona ithambo lomuntu, bazokubeka itshwayo hlanu kwalo. Ngemva kwalokho, labo ababelwe bona babulunge bazolibulungela emRhobeni weHamoni-Gogi.+ 16 Kuzokuba nedorobho elizokubizwa ngokuthi yiHamona.* Bazokuhlwengisa inarha.’+

17 “Nakunguwe ndodana yomuntu, nakhu iKosi ePhakemeko uJehova ekutjhoko: ‘Ithi kiyo yoke imihlobo yeenyoni nakizo zoke iimbandana, “Hlanganani ndawonye bese nize. Buthelelani yoke imihlatjelwami enginilungiselele yona, umhlatjelo omkhulu eentabeni zakwa-Israyeli.+ Nizokudla inyama benisele neengazi.+ 18 Nizokudla inyama yabanamandla, nisele iingazi zamakhosana wephasi, zamaramu, zeemvana, zeembuzi, zeenkunzi nazo zoke iinlwana ezinonileko* zeBhatjhani. 19 Nizozanelisa ngamafutha, nisele iingazi benidakwe mhlatjelo enginilungiselela wona.”’

20 “‘Etafuleni lami nizokunoniswa ziinjomani nabatjhayeli beenkarana, abantu abanamandla nayo yoke imihlobo yeengorho,’+ kutjho iKosi ePhakemeko uJehova.

21 “‘Ngizokutjengisa amandlami hlangana neentjhaba, zoke iintjhaba zizokubona isahlulelo engisikhuphileko namandla* engiwatjengise hlangana nazo.+ 22 Kusukela ngelangelo indlu ka-Israyeli izokwazi ukuthi nginguJehova uZimabo. 23 Iintjhaba kuzokufuze zazi ukuthi indlu yakwa-Israyeli yaya ekudingisweni ngebanga lemitjhaphwayo, ngombana beyingakathembeki kimi.+ Nje-ke ngayifihlela ubuso bami+ ngayinikela emanabenayo+ begodu yoke yawa ngesabula. 24 Ngayiphatha ngokuvumelana nokungahlanzeki kwayo nemitjhaphwayo begodu ngayifihlela ubuso bami.’

25 “Nje-ke nakhu iKosi ePhakemeko uJehova ekutjhoko: ‘Ngizokubuyisela abathunjiweko bakaJakopo+ bengibe nomusa kiyo yoke indlu yakwa-Israyeli;+ ngetjiseko ngizokulwela igama lami elicwengileko.+ 26 Ngemva kokuthi bahlazisekile ngebanga lakho koke ukungathembeki kwabo kimi,+ bazokuhlala ngokuvikeleka enarhenabo, kungabi nomuntu obathusako.+ 27 Lokha nangibabuyisako eentjhabeni begodu ngibabuthelele ndawonye bavela eenarheni zamanababo,+ ngizozicwengisa hlangana nabo phambi kwamehlo weentjhaba ezinengi.’+

28 “‘Kuzokufuze bazi ukuthi nginguJehova uZimabo lokha nangibathumela ekudingisweni hlangana neentjhaba, ngemva kwalokho ngibabuthelele ngibabuyisele enarhenabo, ngingatjhiyi namunye emva.+ 29 Angekhe ngisabafihlela ubuso bami,+ ngombana ngizokuthululela ummoyami endlini yakwa-Israyeli,’+ kutjho iKosi ePhakemeko uJehova.”