Hezekiyeli
43 Ngemva kwalokho, yangisa esangweni eliqale epumalanga.+ 2 Lapho ngabona iphazimulo kaZimu ka-Israyeli ivela epumalanga,+ iphimbo lakhe belinjengetjhada lamanzi agijimako+ begodu iphasi belikhanyiswe ngephazimulwakhe.+ 3 Engakubonako bekunjengombono engawubona lokha nangitjhabalalisa idorobho, engakubonako bekungasuthi ngilokho engakubona emlanjeni iKebari;+ ngawa ngakhothamisela ubuso phasi.
4 Nje-ke, iphazimulo kaJehova yangena ethempelini ngesango eliqale epumalanga.+ 5 Ummoya wangiphakamisa, wangiletha ngaphakathi kwesirhodlo esingaphakathi begodu ngabona ukuthi ithempeli lizaliswe ngephazimulo kaJehova.+ 6 Ngemva kwalokho, ngezwa umuntu akhuluma nami asethempelini begodu indoda leyo yeza yajama hlanu kwami.+ 7 Yathi kimi:
“Ndodana yomuntu, le yindawo yesihlalo sami sobukhosi+ nendawo engibeka kiyo iinyawo zami,+ lapho ngizokuhlala hlangana nabantu bakwa-Israyeli ngokungapheliko.+ Indlu ka-Israyeli angekhe isasilaphaza igama lami elicwengileko,+ yona namakhosanayo, ngokungwadla nabanye abozimu,* ngeendumbu zamakhosanayo afileko.* 8 Ngokubeka ubungeno babo hlanu kobungeno bami namagosenabo hlanu kwamagosenami, kuhlukaniswe ngeboda nje kwaphela phakathi kwami nabo,+ basilaphaze igama lami elicwengileko ngokwenza izinto ezinyenyisako, nje-ke ngabarhayila ngelaka lami.+ 9 Nje-ke abalahlele kude ubungwadla babo nabanye abozimu neendumbu zamakhosanabo, ngizokuhlala hlangana nabo ngokungapheliko.+
10 “Nakunguwe, ndodana yomuntu, hlathulula ithempeli endlini ka-Israyeli+ bona baphathwe ziinhloni ngebanga lemitjhaphwabo+ begodu kufuze bafunde ukwakheka kwalo.* 11 Nangabe baphathwa ziinhloni ngakho koke abakwenzileko, kufuze ubazise ngokwakheka kwethempeli, ukuhleleka kwalo, ubuphumo balo nobungeno balo.+ Batjengise koke ukwakheka kwalo, imiyalwalo, ukwakheka kwalo nemithethwalo, uyitlole phasi phambi kwamehlwabo bona babone koke ukwakheka kwalo, balandele imiyalwalo.+ 12 Lo, mthetho wethempeli. Yoke indawo ebhode phezu kwentaba yindawo ecwengeke khulu.+ Qala! Lo, mthetho wethempeli.
13 “Lezi ziinlinganiso ze-aldara ngamakhubhithi+ (ekhubhithini ngalinye kwangezelelwa ubudege besandla).* Isisekelo salo besilikhubhithi nekhubhithi linye ububanzi. Belinomphetho koke, ongaba masentimitha ama-22* ububanzi. Lesi sisekelo se-aldara. 14 Ukusukela esisekelweni esiphasi ukufikela emiphethweni ebhode phasi, makhubhithi amabili, ububanzi baso likhubhithi linye. Ukusukela emzombelezweni womphetho omncani ukufikela emzombelezweni omkhulu womphetho, makhubhithi amane begodu ububanzi baso likhubhithi. 15 Iziko le-aldara makhubhithi amane ukuphakama, kuneempondo ezine+ eziphuma eziko le-aldara eziqale phezulu. 16 Iziko le-aldara belisikwere, makhubhithi ali-12 ubude namakhubhithi ali-12 ububanzi.+ 17 Amahlangothi amane abhode umphetho makhubhithi ali-14 ubude namakhubhithi ali-14 ububanzi; umkhawulo owabhodileko bewusiquntu sekhubhithi begodu isisekelo salo bekulikhubhithi linye emahlangothini woke.
“Begodu iintepisi zalo ziqale epumalanga.”
18 Nje-ke wathi kimi, “Ndodana yomuntu, nakhu iKosi ePhakemeko uJehova ekutjhoko: ‘Lezi ziinqophiso ekufuze zilandelwe nakwenziwa i-aldara bona iminikelo etjhiswako epheleleko inganikelwa neengazi zingafafazwa kilo.’+
19 “‘Kufuze unikele ngekunzana yomhlambi njengomnikelo wesono+ kubaphristi abamaLevi besizukulwana sakaTsadokhi,+ abatjhidela kimi bona bangisebenzele,’ kutjho iKosi ePhakemeko uJehova. 20 ‘Kufuze uthathe ezinye zeengazi zayo uzitjhatjhe eempondweni ezine ze-aldara, emakhoneni amane abhode umphetho nemikhawulweni yoke eyibhodileko bona iyihlanze esonweni begodu kwenziwe imihlatjelo yokulitjalelwa ngayo.+ 21 Ngemva kwalokho, thatha ikunzana, umnikelo wesono bona uwutjhise endaweni ebekiweko ethempelini, ngaphandle kwendawo ecwengileko.+ 22 Ngelanga lesibili uzokunikela ngepongo ephile kuhle bona ibe mnikelo wesono; bazokuhlanza i-aldara esonweni njengombana balihlanzile esonweni ngekunzana.’
23 “‘Nawuqeda ukulihlanza esonweni, uzokunikela ngekunzana ephile kuhle yomhlambi neramu eliphile kuhle elivela emhlambini wezimvu. 24 Kufuze uzinikele kuJehova, abaphristi kufuze bathele itswayi kizo,+ bazinikele njengomnikelo wokutjhiswa opheleleko kuJehova. 25 Amalanga alikhomba uzokunikela ngepongo njengomnikelo wesono waqobe langa+ kuhlanganise nekunzana yomhlambi neramu lomhlambi wezimvu; uzokunikela ngeenlwana eziphile kuhle. 26 Amalanga alikhomba kufuze benze umnikelo wokulitjalelwa kwezono we-aldara, kufuze balihlanze ngemva kwalokho bangalisebenzisa. 27 Amalanga lawo nasele aphelile, ngelanga lobunane+ nangemva kwalokho, abaphristi bazokunikela ngeminikelwenu* epheleleko etjhiswako nangemihlatjelo yetjhebiswano e-aldareni begodu ngizokuthaba ngani,’+ kutjho iKosi ePhakemeko uJehova.”