Hezekiyeli

44 Wangibuyisa ngemuva kwesango lendawo ecwengileko eliqale epumalanga+ begodu belivaliwe.+ 2 Ngemva kwalokho, uJehova wathi kimi: “Isangweli kufuze lihlale livaliwe. Kufuze lingavulwa, akunamuntu ozokungena ngalo ngombana uJehova, uZimu ka-Israyeli ungene ngalo,+ nje-ke kufuze lihlale livaliwe. 3 Nanyana kunjalo, ikosana izokuhlala kilo bona idle uburotho phambi kwakaJehova+ ngombana iyikosana. Izokungena ngendlela yethuri lesango bese iphume ngalo.”+

4 Ngemva kwalokho, wangiletha esangweni letlhagwini phambi kwethempeli. Nangiqalako, ngabona iphazimulo kaJehova izele ethempelini lakaJehova.+ Nje-ke ngakhothama ngobuso bami phasi.+ 5 Ngemva kwalokho, uJehova wathi kimi: “Ndodana yomuntu, tjheja, uqale, ulalelisise koke engizokutjela khona ngemiyalo nangemithetho yethempeli lakaJehova. Utjhejisise ubungeno bethempeli nabo boke ubuphumo bendawo ecwengileko.+ 6 Kufuze uthi endlini ehlubukako yakwa-Israyeli, ‘Nakhu iKosi ePhakemeko uJehova ekutjhoko: “Sekwanele ngezenzo zenu ezinyenyisako, maye! Ndlu ka-Israyeli. 7 Naniletha abantu abavela kwezinye iinarha abangakasokwa ehliziyweni nenyameni endawenami ecwengileko, basilaphaza ithempeli lami. Niletha uburotho bami, amafutha neengazi kukulapho isivumelwano sami siphulwa ngebanga lazo zoke izenzo zenu ezinyenyisako. 8 Akhenge nitlhogomele izinto zami ezicwengileko.+ Kunalokho, nabela abanye bona batlhogomele imisebenzi endawenami ecwengileko.”’

9 “‘Nakhu iKosi ePhakemeko uJehova ekutjhoko: “Akunamuntu wakwenye inarha ozokuhlala kwa-Israyeli angakasokwa ehliziyweni nenyameni ozokungena endawenami ecwengileko.”’

10 “‘Kodwana amaLevi aphambukela kude nami+ lokha u-Israyeli nakaphambuka kimi bona alandele iinthombe zawo ezinyenyisako* azokuthwala imiphumela yemitjhaphwawo. 11 Azokuba ziinsebenzi endawenami ecwengileko, atlhogomele amasango wethempeli,+ asebenze ethempelini. Azokuhlahlela iminikelo etjhiswako epheleleko nemihlatjelo evela ebantwini begodu azokujama phambi kwabantu bona abasebenzele. 12 Ngebanga lokuthi abasebenzele phambi kweenthombe zabo ezinyenyisako, aba siqabo esibangela bona indlu yakwa-Israyeli yone,+ kungebangelo ngiphakamise isandla sami ngokujamelene nawo ngesifungo,’ kutjho iKosi ePhakemeko uJehova ‘begodu azokuthwala imiphumela yemitjhaphwabo. 13 Angekhe atjhidele kimi bona angisebenzele njengabaphristi namkha atjhidele kinanyana ngiziphi izinto zami ezicwengileko namkha ezicwengeke khulu begodu azokuthwala ihlazo lawo ngebanga lezinto ezinyenyisako azenzileko. 14 Ngizowenza abatlhogomeli bemisebenzi yethempeli bona atlhogomele imisebenzi yalo nazo zoke izinto okufuze zenziwe kilo.’+

15 “‘Nakubaphristi abamaLevi, amadodana kaTsadokhi+ ebebatlhogomela imisebenzi yendawami ecwengileko lokha ama-Israyeli nakaphambukako kimi,+ bazokutjhidela kimi bona bangisebenzele, bazokujama phambi kwami bona banikele kimi amafutha+ neengazi,’+ kutjho iKosi ePhakemeko uJehova. 16 ‘Ngibo abazokungena endawenami ecwengileko, bazokutjhidela etafulenami bona bangisebenzele,+ bazokutlhogomela imisebenzabo kimi.+

17 “‘Nabeza emasangweni wesirhodlo esingaphakathi, kufuze bambathe izambatho zelineni.+ Kufuze bangambathi nanyana yini eyenziwe ngewulu nabangisebenzelako emasangweni wesirhodlo esingaphakathi namkha ngaphakathi kwaso. 18 Kufuze bambathe amatjhila welineni athwalwa ehloko, namabhrugu amafitjhani welineni bona bavale iinyonga zabo.+ Kufuze bangambathi nanyana yini ebenza bajuluke. 19 Ngaphambi kokuthi baphumele esirhodlweni esingaphandle, isirhodlo esingaphandle lapho kunabantu khona, kufuze bahlubule izambatho ebebasebenza ngazo,+ bazibeke eenkumbeni zokudlela ezicwengileko.+ Ngemva kwalokho, bazokumbatha ezinye izambatho bona bangadluliseli ukucwengeka ebantwini ngezambatho zabo. 20 Kufuze bangagudi iinhloko zabo+ namkha balise iinhluthu zeenhloko zabo zikhule zibe zide. Kufuze baziphungule iinhluthu zeenhloko zabo. 21 Abaphristi kufuze bangaseli iwayini nabangena esirhodlweni esingaphakathi.+ 22 Kufuze bangathathi umhlolokazi namkha umma otlhaliweko bona abe mfazi+ kodwana bangatjhada intombi esizukulwana sakwa-Israyeli namkha umhlolokazi womphristi.’+

23 “‘Kufuze bafundise abantu bami umahluko phakathi kokucwengileko nokungakacwengeki begodu kufuze babafundise ngomahluko hlangana nokungakacwengeki nokucwengileko.+ 24 Kufuze basebenze njengabahluleli emlandwini ongokomthetho,+ kufuze bahlulele ngokuvumelana neenqunto zami ezingokomthetho.+ Kufuze baphethe imithethwami nemiyalwami malungana nayo yoke iminyanya+ begodu bacwengise amasabathami. 25 Kufuze bangatjhideli kinanyana ngimuphi umuntu ofileko, nakungasinjalo bazokuba ngabangakahlwengeki. Nanyana kunjalo, bangazisilaphaza lokha nakuhlongakele ubaba, umma, indodana, indodakazi, umfowabo namkha udadwabo ongakatjhadi.+ 26 Ngemva kokuhlanjululwa komphristi, kufuze bambalele amalanga alikhomba. 27 Ngelanga angena ngalo endaweni ecwengileko, esirhodlweni esingaphakathi bona asebenze endaweni ecwengileko, kufuze alethe umnikelwakhe wesono,’+ kutjho iKosi ePhakemeko uJehova.

28 “‘Lokho kuzokuba lilifa labo: Ngililifa labo.+ Kufuze ungabanikeli nanyana ngisiphi isabelo kwa-Israyeli ngombana mina ngisisabelo sabo. 29 Ngibo abazokudla umnikelo weenthoro,+ umnikelo wesono nomnikelo womlandu+ nayo yoke into enikelwe kwa-Israyeli izokuba ngeyabo.+ 30 Iinthelo zoke zekhethelo zokuthoma ezivuthiweko nayo yoke imihlobo yeminikelo izokuba ngeyabaphristi.+ Kufuze ninikele ngeflowuru evela esivunweni senu sokuthoma kumphristi.+ Lokhu kuzokubangela bona isibusiso sihlale emindeninenu.+ 31 Abaphristi kufuze bangadli nanyana ngiyiphi inyoni namkha isilwana esifumaneke sifile namkha sirathulwe saba ziintokana.’+