Rhabakhukhu
2 Ngizokujama endawenami yokugada,+
Begodu ngizokujama ebodeni lokuvikela.
Ngizokulinda ngibone ukuthi uZimu uzokuthini ngami
Nokuthi ngizokuphendula ngithini nangikhalinywako.
2 UJehova wangiphendula wathi:
“Tlola phasi izinto ozibone embonweni begodu uzitlole ngokubonakalako ematjeni,+
Bona ofundako azifunde lula.+
3 Ngombana umbono uzokuzaliseka ngesikhathi esibekiweko,
Isikhathi sizokufika msinyana, angekhe sibe mamala.
Nanyana ungabonakala ngasuthi uyariyada, hlala uwulindele!+
Ngombana uzokuzaliseka.
Angekhe uriyade!
4 Qala umuntu ozikhakhazisako;
Akakalungi.
Kodwana olungileko uzokuphila ngokuthembeka kwakhe.+
5 Kwamambala iwayini liyakhohlisa,
Kungebangelo umuntu ozikhukhumezako angekhe aphumelele.
Isifiso sakhe sikhulu njengeThuna;*
Unjengokufa begodu angekhe aneliseke.
Uzibuthelelela zoke iintjhaba
Begodu ubuthelela boke abantu kuye.+
6 Abantwaba angeze bahlekise ngaye na basebenzise izaga, itshimo neenrarejo?+
Bazokuthi:
Maye! Kiloyo obuthelela izinto ezingasingezakhe
Ongezelela isikolodo sakhe
Uzokwenza bekube nini lokho?
7 Kghani abantu obakolodako angekhe bavumbuka kungakalindeleki?
Bazokuvuka bakusikinye kabuhlungu,
Begodu bazokuthathela koke onakho.+
8 Ngebanga lokuthi udlelezele iintjhaba ezinengi,
Zoke iintjhaba zizokudlelezela,+
Ngombana uphalaze iingazi zabantu
Begodu waba nenturhu enarheni,
Emadorobheni nakilabo abahlala kiwo.+
9 Maye! Kiloyo ofumanela indlwakhe inzuzo engakafaneli,
Bona abeke isidleke sakhe phezulu,
Bona abalekele ihlekelele!
10 Uwuhlazisile umuzakho.
Ngokutjhabalalisa iintjhaba ezinengi, uzibangele isono.+
11 Ilitje lizokulila lisebodeni,
Begodu isigodo sizokuphendula sisephahleni.
12 Maye! Kiloyo owakha idorobho ngokuphalaza iingazi,
Nolakha ngokungalungi!
13 Inga-kghani akuveli kuJehova wamabutho na ukuthi abantu bazokusebenza budisi begodu abakusebenzeleko kuphelele emlilweni,
Nokuthi iintjhaba zizokusebenzela ilize?+
14 Ngombana iphasi lizokuzala ilwazi lephazimulo kaJehova
Njengamanzi agubuzesa ilwandle.+
15 Maye! Kiloyo onikela abangani bakhe isiselo,
Asihlanganise nelaka nokusilingeka, bona badakwe,
Ukuthi abone ubuhlubule babo!
16 Uzokusutha ihlazo kunephazimulo.
Nawe sela uveze ukuthi awukasoki.*
UJehova uzokwenza bona usele ekaphweni esesandleni sakhe sangesidleni,+
Begodu ihlazo lizokugubuzesa iphazimulwakho;
17 Ngombana inturhu eyenzeke eLibhanoni izokwenzeka nakuwe,
Ukutjhabalalisa okuthuse iimbandana kuzokufikela nawe,
Ngebanga lokuphalaza kwakho iingazi
Nenturhu oyenze enarheni,
Emadorobheni nakilabo abahlala kiwo.+
18 Sisiza ngani isithombe esibaziweko
Esenziwe ngothileko?
Sisiza ngani isithombe esenziwe ngesimbi nomfundisi wamala,
Ngitjho nanyana osenzileko asithemba,
Begodu enza abozimu abangasizi ngalitho nabangakhulumiko?+
19 Maye! Kiloyo othi esigodweni, “Vuka!”
Namkha othi elitjeni elingakhulumiko, “Vuka! Usifundise!”
20 Kodwana uJehova usethempelini lakhe elicwengileko.+
Iphasi loke alithule phambi kwakhe!’”+