Rhabakhukhu
3 Umthandazo womphorofidi uRhabakhukhu, ngeengoma zesililo:
2 Maye! Jehova ngiwuzwile umbiko ngawe.
Maye! Jehova imisebenzakho iyangikara.
Ngesikhathi sakho* uzoyenza iphile!
Ngesikhathi sakho* uzoyenza yaziwe.
Kwanga ungaba nomusa ngesikhathi serawurawu.+
3 UZimu uvele eTemani,
Ocwengileko uvele eNtabeni iParana.+ (Sela)*
Ubukhosi bakhe bugubuzese izulu,+
Iphasi lizele ngabantu abamdumisako.
4 Ukhanya njengelanga lemini.+
Imisebe emibili ehlaba isuka esandleni sakhe,
Lapha amandlakhe afihlakele khona.
5 Phambi kwakhe kuphuma ukugula okubulalako,+
Nomkhuhlani omumbi uvela ngemva kwakhe.
6 Wajama tsi! Wahlengezelisa iphasi.+
Waqala iintjhaba wazenza zahlengezela.+
Iintaba zanini nanini zitjhatjalalisiwe,
Imibundu yakade ikhotheme.+
Iindlela zakade ngezakhe.
7 Ngibone amatende weKhutjhana agandelelekile.
Amatjhila wamatende wenarheni yakwaMidiyani ahlengezela.+
8 Inga-kghani usilingwe milambo Jehova,
Inga-kghani imilambo ngiyo engakhenge ikuthabise?
Namkha usilingwe lilwandle?+
9 Umsubelakho uwukhuphile begodu ulungele ukudumuza.
Iinkhali zakho zilungele* ukwenza umsebenzi njengombana kufungiwe. (Sela)
Uhlukanisa iphasi ngemilambo.
10 Iintaba zezwa ubuhlungu khulu nazikubonako.+
Izulu elinamandla larhurhula inarha.
Amanzi abhodla ekuzikeni,+
Aphakamela phezulu.
11 Ilanga nenyanga zajama tsi emkayini phezulu.+
Imisubelakho yaphuma njengomkhanyo.+
Umkhontwakho wamanyazela.
12 Ukhambe phezu kwephasi usilingekile.
Wagadanga iintjhaba ngelaka.
13 Uphumile bona uyokusindisa abantu bakho, wasindisa nozesiwekwakho.
Watshidlha umdosiphambili wendlu yabakhohlakeleko.
Wayitjhabalalisa kusuka phezulu ukuya esisekelweni. (Sela)
14 Wabulala amabuthwakhe ngeenkhali zawo
Kwathi lokha nabaphuma njengesiwuruwuru bona bangenze ngiphadlhalale
Bakuthabela khulu ukubulala otlhagileko ngemsitheleni.
15 Ngeenjomani zakho wayama ilwandle,
Wadlula amagagasi amakhulu.
16 Ngathi nangizwa umlayezo lo ngathukwa,
Umlomami wahlengezela,
Amathambami abogaboga,+
Amadolwami ahlengezela.
Kodwana ngalindela ilanga lokugandeleleka buthule,+
Ngombana belizobafikela labo abasisahlelako.
17 Ngitjho nanyana umuthi wamafeyi ungatlhurhi,
Begodu kungabi nesithelo emthini wamadiribe.
Ngitjho nanyana umuthi wama-oliva ungatheli,
Begodu nemasimini kungabi nokudla.
Ngitjho nanyana umhlambi wezimvu unganyamalala esibayeni,
Begodu kungabi neenkomo esibayeni,
18 Ngizokuthaba ngoJehova,
Ngizokuthaba ngebanga lakaZimu wesindiswami.+
19 IKosi ePhakemeko uJehova imamandlami,+
Izokwenza iinyawo zami zifane nezeqina
Izongenza ngeqele eendaweni eziphakamileko.+
Iya kumnqophisi, ikhambisana neenliliso zesinara.